ພິທີເຊັນສັນຍາຮ່ວມມື ລະຫວ່າງກົມຄື້ນຄວາມຖີ່ວິທະຍຸສື່ສານ ແລະ ບໍລິສັດ ລືໄຊຈະເລີນ ຈໍາກັດ ກ່ຽວກັບວຽກງານການກວດກາ ແລະ ຢັ້ງຢືນມາດຕະຖານເຕັກນິກອຸປະກອນໂທລະຄົມມະນາຄົມ ແລະ ICT ຈັດຂຶ້ນວັນທີ 30 ພຶດສະພາ 2022 ທີ່ກະຊວງເຕັກໂນໂລຊີ ຮ່ວມລົງນາມຂອງທ່ານ ໄຊລືຊາ ອິນສີຊຽງໃໝ່ ຫົວໜ້າກົມຄື້ນຄວາມຖີ່ວິທະຍຸສື່ສານ ແລະ ທ່ານ ຂັນທອງ ລືໄຊອິນທະວົງ ປະທານບໍລິສັດ ລືໄຊຈະເລີນ ຈໍາກັດ ມີທ່ານ ບັນດິດ ສາດສະດາຈານ ດຣ ບໍ່ວຽງຄໍາ ວົງດາລາ ລັດຖະມົນຕີກະຊວງເຕັກໂນໂລຊີ ແລະ ການສື່ສານ ພ້ອມດ້ວຍຄະນະກົມ ກອງ ສູນ ສະຖາບັນອ້ອມຂ້າງ ແລະ ພະນັກງານວິຊາການກ່ຽວຂ້ອງເຂົ້າຮ່ວມ.
ທ່ານ ໄຊລືຊາ ອິນສີຊຽງໃໝ່ ກ່າວວ່າ: ເພື່ອຈັດຕັ້ງປະຕິບັດວຽກງານກວດກາ ແລະ ຢັ້ງຢືນມາດຕະຖານເຕັກນິກອຸປະກອນໂທລະຄົມມະນາຄົມ ແລະ ICT ເພາະຖືວ່າເປັນບາດກ້າວອັນສຳຄັນໃນການພັດທະນາວຽກງານນີ້ໃຫ້ສາມາດຈັດຕັ້ງປະຕິບັດໄດ້ຕາມກົດໝາຍ ລະບຽບການຂອງ ສປປ ລາວ ແລະ ສອດຄ່ອງກັບແນວທາງນະໂຍບາຍ ລະບຽບການຂອງ ITU ເພື່ອພັດທະນາ ແລະ ຮັບປະກັນວ່າອຸປະກອນໂທລະຄົມມະນາຄົມ ແລະ ICT ໄດ້ມາດຕະຖານເຕັກນິກທີ່ກະຊວງເຕັກໂນໂລຊີ ແລະ ການສື່ສານ ກຳນົດ ແລະ ຮັບປະກັນ ຄວາມສາມາດ ແລະ ຄວາມປອດໄພຂອງອຸປະກອນ.
ການຮ່ວມມືໃນຄັ້ງນີ້ ແມ່ນສອດຄ່ອງກັບແຜນພັດທະນາເສດຖະກິດ-ສັງຄົມຂອງລັດຖະບານໃນຊຸມປີຕໍ່ໜ້າເຊິ່ງເປັນພື້ນຖານໃຫ້ແກ່ຂະແໜງການຢູ່ໃນປະຊາຄົມເສດຖະກິດອາຊຽນ ເຊິ່ງທຸກໆປະເທດ ປະກອບສ່ວນດ້ານຄວາມປອດໄພ ຄຸນນະພາບ ແລະ ການຈໍາໜ່າຍຂອງອຸປະກອນໂທລະຄົມມະນາຄົມ ແລະ ICT ແມ່ນສ່ວນໜຶ່ງທີ່ເປັນພັນທະຂອງການປະຕິບັດຕາມກົດລະບຽບ ແລະ ຂໍ້ກຳນົດທີ່ສະມາຊິກຂອງອົງການການຄ້າໂລກຕ້ອງປະຕິບັດຮ່ວມກັບບັນດາປະເທດຄູ່ເຈລະຈາດ້ານການຄ້າ ຫຼື ຮ່ວມກັບປະເທດຜູ້ສົ່ງອອກອຸປະກອນໂທລະຄົມມະນາຄົມ ແລະ ICT ເຊິ່ງທັງໝົດທຸກຝ່າຍຈະນຳໃຊ້ຫຼັກການ ແລະ ກົດລະບຽບດຽວກັນ ກ່ຽວກັບການຜະລິດ ສົ່ງອອກ ນໍາເຂົ້າ ແລະ ການຈໍາໜ່າຍອຸປະກອນໂທລະຄົມມະນາຄົມ ແລະ ICT.
ທ່ານ ຂັນທອງ ລືໄຊອິນທະວົງ ກ່າວວ່າ: ໃນການຮ່ວມມືກັບກົມຄື້ນຄວາມຖີ່ວິທະຍຸສື່ສານ ເພື່ອຈັດຕັ້ງປະຕິບັດວຽກງານ ການກວດກາ ແລະ ຢັ້ງຢືນມາດຕະຖານເຕັກນິກອຸປະກອນໂທລະຄົມມະນາຄົມ ແລະ ICT ເຊິ່ງເປັນວຽກງານໜຶ່ງທີ່ສຳຄັນຂອງຂະແໜງການເຕັກໂນໂລຊີ ແລະ ການສື່ສານ ເພື່ອສົ່ງເສີມການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດຄັ້ງທີ່ 9 ແຜນພັດທະນາເສດຖະກິດດິຈິຕອນຂອງລັດຖະບານ ເພື່ອການຫັນເປັນດິຈິຕອນ ແລະ ແຜນວິໄສທັດ ແຜນຍຸດທະສາດການພັດທະນາຂະແໜງການ ຂອງກະຊວງ ເຕັກໂນໂລຊີ ແລະ ການສື່ສານ.
ວຽກງານການກວດກາ ແລະ ຢັ້ງຢືນ ມາດຕະຖານເຕັກນິກອຸປະກອນໂທລະຄົມມະນາຄົມ ແລະ ICT ເປັນວຽກງານທີ່ທຸກປະເທດໃນໂລກນີ້ໃຫ້ຄວາມສຳຄັນທີ່ສຸດ ເພາະເປັນວຽກງານຫຼັກໃນການຮັບປະກັນມາດຕະຖານເຕັກນິກ ຄວາມສາມາດຂອງອຸປະກອນ ຄວາມປອດໄພຂອງອຸປະກອນ ເພື່ອໃຫ້ການປົກປ້ອງຜົນປະໂຫຍດອັນຊອບທຳໃຫ້ແກ່ຜູ້ອຸປະໂພກ ການປ້ອງກັນອຸປະກອນລອກຮຽນແບບ (ຂອງປອມ) ການປ້ອງກັນຄື້ນຄວາມຖີ່ລົບກວນຂອງວຽກງານເຕັກໂນໂລຊີ ແລະ ອື່ນໆ.
ຂ້າພະແຈົ້າເຊື່ອໝັ້ນຢ່າງຍິ່ງວ່າ ວຽກງານການກວດກາ ແລະ ຢັ້ງຢືນມາດຕະຖານເຕັກນິກອຸປະກອນໂທລະຄົມມະນາຄົມ ແລະ ICT ນີ້ ຈະເປັນອົງປະກອບໜຶ່ງທີ່ສາມາດຊ່ວຍພັກ ແລະ ລັດ ກໍຄືກະຊວງເຕັກໂນໂລຊີ ແລະ ການສື່ສານ ໃນການຮັບປະກັນມາດຕະຖານເຕັກນິກ ຄວາມສາມາດຂອງອຸປະກອນ ຄວາມປອດໄພຂອງອຸປະກອນ ແລະ ອັນສຳຄັນທີ່ສຸດແມ່ນສາມາດສ້າງແຫຼ່ງລາຍຮັບໃໝ່ເພີ່ມໃຫ້ກັບລັດຖະບານ.