ພິທີມອບ-ຮັບພາສີຊັບພະຍາກອນແຮ່ທາດ ຈາກການຜະລິດ-ຈຳໜ່າຍໂລຫະຄຳ ແລະ ທອງ ຂອງໂຄງການຂຸດຄົ້ນບໍ່ຄໍາ-ທອງ ເຊໂປນ ໄຕມາດທີ 1 ປີ 2022 ມູນຄ່າ 5.846.693,2 ໂດລາສະຫະລັດ ຈັດຂຶ້ນວັນທີ 1 ມິຖຸນາ 2022 ຢູ່ກົມຄຸ້ມຄອງຊັບສິນແຫ່ງລັດ ກະຊວງການເງິນ ເຊິ່ງມອບໂດຍທ່ານ ສະໝານ ອະເນກາ ຜູ້ອຳນວຍການໃຫຍ່ບໍລິສັດ ລ້ານຊ້າງ ມິເນໂຣນສ໌ ລິມິເຕັດ ບໍ່ຄຳ-ທອງເຊໂປນ (ລຊມລ) ແລະ ຮັບໂດຍທ່ານ ພຸດທະສິນ ເຮືອງທະວົງ ຫົວໜ້າກົມຄຸ້ມຄອງຊັບສິນແຫ່ງລັດ ມີພາກສ່ວນກ່ຽວຂ້ອງ ເຂົ້າຮ່ວມ.
ປີ 2021 ລຊມລ ໄດ້ມອບລາຍຮັບໂດຍກົງຈາກການເສຍພາສີອາກອນ ແລະ ຄ່າຊັກອື່ນໆທີ່ກ່ຽວຂ້ອງ ໃຫ້ລັດຖະບານ ສປປ ລາວ ຫຼາຍກວ່າ 40,84 ລ້ານໂດລາສະຫະລັດ ນັບແຕ່ເລີ່ມມີການຂຸດຄົ້ນ-ປຸງແຕ່ງ-ຜະລິດຄຳ-ທອງ ປີ 2003 ເປັນຕົ້ນມາ ລຊມລ ໄດ້ປະກອບສ່ວນພັນທະທີ່ເປັນລາຍຮັບໂດຍກົງໃຫ້ລັດຖະບານ ສປປ ລາວ ຫຼາຍກວ່າ 1,6 ຕື້ໂດລາສະຫະລັດ ໃນນີ້ ຄ່າຊັບພະຍາກອນແຮ່ທາດ ຫຼາຍກ່ວາ 389 ລ້ານໂດລາສະຫະລັດ ນອກນີ້ ບໍລິສັດຍັງໄດ້ລົງທຶນຕື່ມອີກຫຼາຍຮ້ອຍລ້ານໂດລາສະຫະລັດ ໃນການປະກອບສ່ວນທາງອ້ອມ ເຊັ່ນ: ການເຝິກອົມຮົມສີມືແຮງງານ ການສະໜັບສະໜູນກຸ່ມທຸລະກິດທ້ອງຖິ່ນ ແລະ ການພັດທະນາຊຸມຊົນເຈົ້າພາບ ສໍາລັບໄຕມາດທີ 1 ປີ 2022 ບໍ່ຄຳ-ທອງເຊໂປນ ສາມາດຜະລິດຄຳ ໄດ້ 1.783 ກິໂລ ແລະ ທອງ 2.426 ໂຕນ.
ທ່ານ ສະໝານ ອະເນກາ ກ່າວວ່າ: ລຊມລ ມີຄວາມພາກພູມໃຈໃນການເປັນຄູ່ຮ່ວມງານທີ່ດີກັບກົມຄຸ້ມຄອງຊັບສິນແຫ່ງລັດ ແລະ ໄດ້ປະກອບສ່ວນດ້ານການເງິນທີ່ສຳຄັນໃນການພັດທະນາເສດຖະກິດ-ສັງຄົມ ຂອງ ສປປ ລາວ ດ້ວຍການຈ່າຍພາສີຊັບພະຍາກອນແຮ່ທາດ ອາກອນກຳໄລ ເງິນປັນຜົນ ອາກອນເງິນເດືອນພະນັກງານ ກອງທຶນພັດທະນາຊຸມຊົນ ກອງທຶນຊຸກຍູ້ຄອບຄົວຜູ້ດ້ອຍໂອກາດ ເງິນສະສົມເພື່ອພື້ນຟູສິ່ງແວດລ້ອມ ຄ່າສຳປະທານ ການປະກອບສ່ວນຊ່ວຍເຫຼືອສັງຄົມ ແລະ ພັນທະອາກອນອື່ນໆ ລຊມລ ສະແດງຄວາມຂອບໃຈຕໍ່ຂະແໜງການລັດຖະບານ ສປປ ລາວ ໃນການສະໜັບສະໜູນໂຄງການຂຸດຄົ້ນບໍ່ຄຳ-ທອງ ເຊໂປນ ໂດຍການຄົ້ນຄວ້າພິຈາລະນາໃນການອະນຸມັດ ແລະ ອອກໃບອະນຸຍາດທີ່ກ່ຽວຂ້ອງໃນດ້ານຕ່າງໆ ໂດຍສອດຄ່ອງຕາມສັນຍາ.
(ສະບາໄພ 3/6/2022)