ການແຜ່ລະບາດຂອງພະຍາດໂຄວິດ-19 ທົ່ວໂລກ ທີ່ສົ່ງຜົນກະທົບຕໍ່ຊີວິດຢ່າງໃຫຍ່ຫຼວງ ເຮັດໃຫ້ຫຼາຍຄົນໄດ້ຄົ້ນຄິດສັງລວມບົດຮຽນລາຄາແພງໄດ້ວ່າ ອະນາຄົດຂ້າງໜ້າໂລກເຮົາກໍອາດຈະເກີດມີເຫດການແບບນີ້ເກີດຊ້ຳໄດ້ຕະຫຼອດເວລາ ຜົນກະທົບທີ່ຄວບຄຸມໄດ້ຍາກຈາກພະຍາດໂຄວິດ-19 ນີ້ ບາງປະເທດມີຈຳນວນຜູ້ເສຍຊີວິດຫຼາຍ ຍ້ອນປະໝາດ ແລະ ເຄີຍຊິນກັບຊີວິດອິດສະຫຼະເສລີ ເຊິ່ງເຫດການທີ່ເວົ້າບໍ່ພຽງແຕ່ພາກປະຊາຊົນແຕ່ລະດັບຜູ້ນຳກໍເປັນ.
ກ່ອນພະຍາດລະບາດທຳມະຊາດຂອງຄົນ ເຄີຍຊິນກັບການໃຊ້ຊີວິດອິດສະຫຼະ ເບິ່ງປັດໄຈພາຍນອກຫຼາຍ ເຊັ່ນ: ພຶດຕິກຳບໍລິໂພກຖືເປັນປົກກະຕິ ຄົນໃນເມືອງຈະຊິນກັບການຊື້ບໍລິໂພກຫຼາຍກວ່າເຮັດກິນເອງ ແຕ່ຫຼັງຈາກເກີດພະຍາດລະບາດ ຄົນໃນເມືອງຈະຫັນໄປເພິ່ງການສົ່ງອາຫານບໍລິໂພກອອນລາຍ ເຊິ່ງບ້ານເຮົາມີ Food Panda ທີ່ຮັບສົ່ງເຫັນໄດ້ວ່າເປັນທຸລະກິດອອນລາຍສ້າງກຳໄລສູງ ແລະ ຫຼັງຈາກພະຍາດລະບາດ ຄາດວ່າຄົນຄົງເຄີຍຊິນກັບຄວາມສະດວກສະບາຍ ເຊິ່ງນີ້ຄືນິໄສທຳມະຊາດຂອງມະນຸດ ຜົນກະທົບອັນໜຶ່ງຂອງຄົນຢູ່ໃນເມືອງ ຄືຂາດພື້ນທີ່ປູກຝັງເພິ່ງຕົນເອງຍາກ ຖ້າວ່າຂາດວຽກເຮັດຍິ່ງຊ້ຳບັນຫາໜັກຂຶ້ນ ເຊັ່ນ: ຜູ້ທີ່ດາວລົດ ຫຼື ເຄື່ອງໃຊ້ຕ່າງໆຖ້າຂາດເງິນເດືອນຈ່າຍ ຖືວ່າກະທົບຫຼີກລ້ຽງບໍ່ໄດ້.
ສຳລັບປະຊາຊົນຢູ້ທ້ອງຖິ່ນຕາມໄດ້ຍິນຫາງສຽງ ແມ່ນກະທົບໜ້ອຍກວ່າຄົນເມືອງ ເພາະປະຊາຊົນມີຊີວິດສ່ວນໃຫຍ່ເພິ່ງພາການກະເສດປູກຝັງ-ລ້ຽງສັດ ປູກກິນຖ້າວ່າຂີ້ຄ້ານພັດທະນາຄວາມຮູ້ດ້ານກະເສດ ເພື່ອຫັນເປັນເສດຖະກິດໄລຍະຍາວ ຫຼື ວ່າຄົນໃນເມືອງກໍສາມາດເຮັດໄດ້ ສຳລັບຜູ້ມີຜືນດິນ ໄຮ່ນາ ສວນປູກຝັງ-ລ້ຽງສັດ ດັ່ງນັ້ນ ການພິຈາລະນາເບິ່ງຢ່າງຮອບຄອບຈຶ່ງເຫັນໄດ້ວ່າ ການໃຊ້ຊີວິດຢ່າງຮອບຄອບແບບຫຼຸດຜ່ອນການເພິ່ງພາປັດໄຈພາຍນອກໃຫ້ໜ້ອຍລົງ ໂດຍໃຊ້ເວລາວ່າງໃສ່ການກະເສດ ຫຼື ການມີລາຍຮັບຮູ້ຈັກແບ່ງອອມເປັນງົບໄວ້ໃຊ້ຍາມສຸກເສີນ ຈຳເປັນ ຈຶ່ງຄວນຖືເປັນບົດຮຽນລາຄາແພງ.
ສັງລວມໄດ້ວ່າ: ບໍ່ວ່າຍາມໃດການໃຊ້ຊີວິດກໍບໍ່ຄວນປະໝາດຂາດສະຕິ ບໍ່ປະໝາດວ່າດິນຜືນນ້ອຍ ຈະຊ່ອຍຊີວິດບໍ່ໄດ້ເພາະໂຄວິດ-19 ຄືບົດທົດສອບຊີວິດ.
ໂຄວິດ-19 ແມ່ນສັດຕູທີ່ແນມບໍ່ເຫັນ ສົງຄາມທີ່ບໍ່ມີພົມແດນ.
ໂດຍ: ດັ້ນກີບເມກ