ປັດຈຸບັນ ການລະບາດຂອງພະຍາດໄຂ້ຍຸງລາຍ ນັບມື້ນັບເພີ່ມຂຶ້ນ ດັ່ງນັ້ນ ກະຊວງສາທາລະນະສຸກ ກໍຄືພະແນກ ແລະ ບັນດາຫ້ອງການສາທາລະນະສຸກເມືອງ ໄດ້ສຸມໃສ່ໃນການຄວບຄຸມ ໃນນີ້ຫ້ອງການສາທາລະນະສຸກເມືອງສີໂຄດຕະບອງ ນະຄອນຫຼວງວຽງຈັນ ກໍໄດ້ຖືສຳຄັນໃນການຕ້ານ ແລະ ປ້ອງກັນພະຍາດໄຂ້ຍຸງໃຫ້ນັບມື້ຫຼຸດລົງ.
ທ່ານ ປາວີ ຟະລິຈິດທະວົງ ຫົວໜ້າຫ້ອງການສາທາລະນະສຸກເມືອງສີໂຄດຕະບອງ ໃຫ້ສຳພາດວັນທີ 19 ພຶດສະພາ 2020 ວ່າ: ເພື່ອປ້ອງກັນ ແລະ ຄວບຄຸມການລະບາດຂອງພະຍາດໄຂ້ຍຸງລາຍໃຫ້ນັບມື້ຫຼຸດລົງ ເຊິ່ງການນຳເມືອງໄດ້ຊີ້ນຳຢ່າງໃກ້ຊິດ ໃຫ້ກັບຫ້ອງການສາທາລະນະສຸກເມືອງ ສົມທົບອາສາສະໝັກບ້ານ ເພື່ອກວດກາ ຕິດຕາມສະພາບການລະບາດຢູ່ໃນຈຳນວນ 60 ບ້ານຂອງເມືອງ ດ້ວຍການລົງກວດກາໜອນນ້ຳຍຸງລາຍໃນແຕ່ລະຄອບຄົວ ໂຄສະນາເຜີຍແຜ່ວິທີການປ້ອງກັນໄຂ້ຍຸງລາຍ ການປະຕິບັດ 5 ປ ຂອງກະຊວງສາທາລະນະສຸກວາງອອກ.
ສຳລັບມື້ນີ້ ຫ້ອງການສາທາລະນະສຸກເມືອງ ສົມທົບກັບອາສາສະໝັກສອງບ້ານຄື ບ້ານໂພນສະຫວາດໃຕ້ (ມີຜູ້ເປັນພະຍາດໄຂ້ຍຸງລາຍ 1 ກໍລະນີ) ແລະ ບ້ານໜອງດ້ວງ ເພື່ອລົງກວດກາໜອນນ້ຳຍຸງລາຍ ຜ່ານການກວດ ເຫັນວ່າຄວາມໜາແໜ້ນຂອງໜອນນ້ຳຍຸງລາຍບໍ່ພົບ (ເທົ່າກັບ 0) ເຊິ່ງໄດ້ກວດຈຸດທີ່ເກີດມີກໍລະນີໄຂ້ຍຸງໃນລັດສະໝີ 100 ແມັດ.
ນັບແຕ່ເດືອນມັງກອນມາຮອດປັດຈຸບັນ ທົ່ວເມືອງມີລາຍງານຜູ້ເປັນພະຍາດໄຂ້ຍຸງລາຍ 24 ກໍລະນີ ໃນຈຳນວນ 20 ບ້ານ ຖ້າທຽບໃສ່ໄລຍະດຽວກັນຂອງປີຜ່ານມາແມ່ນຫຼຸດລົງ ເຖິງແມ່ນວ່າປີນີ້ຈະມີຜູ້ເປັນພະຍາດໄຂ້ຍຸງລາຍຫຼຸດລົງກໍຕາມ ແຕ່ກໍຍັງສືບຕໍ່ຈັດຕັ້ງປະຕິບັດການຄວບຄຸມ ໂດຍໄດ້ແນະນຳໃຫ້ບ້ານເພີ່ມທະວີໂຄສະນາ ແລະ ເຜີຍແຜ່ການປ້ອງກັນໄຂ້ຍຸງລາຍ ໂດຍສະເພາະການປະຕິບັດຫຼັກການ 5 ປ ຂອງກະຊວງສາທາລະນະສຸກວາງອອກ ພ້ອມນີ້ ກໍໄດ້ຮຽກຮ້ອງມາຍັງພໍ່ແມ່ນປະຊາຊົນຈົ່ງພ້ອມກັນອະນາໄມສາມສະອາດເປັນປະຈຳ ທຳລາຍແຫຼ່ງເພາະພັນຂອງຍຸງລາຍ ແລະ ອື່ນໆ.
# ຂ່າວ & ພາບ: ອົ່ນ ໄຟສົນທອງ