ໃນວັນທີ 11-12 ເມສາ 2022 ຫ້ອງການຖະແຫຼງຂ່າວ ວັດທະນະທຳແລະທ່ອງທ່ຽວເມືອງ ໄຊທານີນະຄອນຫຼວງວຽງຈັນ ສົມທົບກັບຄະນະສະເພາະກິດຂັ້ນເມືອງລົງເຜີຍແຜ່ແຈ້ງການ ເລກທີ 03 ແລະ ຄຳສັ່ງເລກທີ 04 ຂອງທ່ານເຈົ້າຄອງນະຄອນຫຼວງວຽງຈັນ ໃຫ້ແກ່ຫົວໜ່ວຍທຸ ລະກິດຮ້ານອາຫານທົ່ວເມືອງ ນຳໂດຍ ທ່ານ ນວນລະແສງ ເນດທອງສະຫວັນ ປະທານສາຫະ ພັນກຳມະບານເມືອງ ຮອງຫົວໜ້າຄະນະສະເພາະກິດຂັ້ນເມືອງ ເມືອງໄຊທານີ ທ່ານ ນຸໄລ ລັດ ຕະນະ ຮອງຫົວໜ້າຫ້ອງການຖະແຫຼງຂ່າວ ວັດທະນະທຳ ແລະ ທ່ອງທ່ຽວເມືອງ ມີພະນັກງານ ວິຊາການຄະນະກຳມະການສະເພາະກິດຂັ້ນເມືອງ ປກສ ກຸ່ມບ້ານນາຍບ້ານ ເຂົ້າຮ່ວມ.
ການລົງເຄື່ອນໄຫວຂອງຫ້ອງການຖະແຫຼງຂ່າວ ວັດທະນະທຳ ແລະ ທ່ອງທ່ຽວເມືອງ ແລະ ຄະ ນະ ສະເພາະກິດຂັ້ນເມືອງໃນຄັ້ງນີ້ ແມ່ນໄດ້ລົງເຜີຍແຜ່ແຈ້ງການ ເລກທີ 03/ຈນວ ລົງວັນທີ 16 ມີນາ 2022 ວ່າດ້ວຍການຫ້າມເປີດເຄື່ອງຂະຫຍາຍສຽງດົນຕີ ແລະ ເສບດົນຕີສົ່ງສຽງເນືອງນັນ ລົບກວນເຮືອນອ້ອມຂ້າງ ຄຳສັ່ງ ເລກທີ 04/ຈນວ ລົງວັນທີ 31 ມີນາ 2022 ວ່າດ້ວຍຄວາມເປັນ ລະບຽບຮຽບຮ້ອຍໃນຊ່ວງໄລຍະບຸນປີໃໝ່ລາວ ພສ 2565 ຢູ່ນະຄອນຫຼວງວຽງຈັນ ໃຫ້ແກ່ຫົວ ໜ່ວຍທຸລະກິດຮ້ານອາຫານ ລວມທັງມີອະນຸຍາດ ແລະ ບໍ່ມີອະນຸຍາດ ພ້ອມທັງເຮັດບົດບັນທຶກ ຄວາມເຂົ້າໃຈ ໄດ້ທັງໝົດ 24 ຫົວໜ່ວຍ.
ທ່ານ ນຸໄລ ສັດຕະນະ ຮອງຫົວໜ້າຫ້ອງການຖະແຫຼງຂ່າວ ວັດທະນະທຳ ແລະ ທ່ອງທ່ຽວ ຍັງ ກ່າວຕື່ມອີກວ່າ: ຜ່ານມາໄດ້ລົງກວດກາແກ້ໄຂຮ້ານທີ່ສົ່ງຜົນກະທົບກັບສັງຄົມ ຕາມການໄດ້ຮັບ ສາຍດ່ວນໄດ້ 8 ຫົວໜ່ວຍ ກວດກາປະເມີນການຂໍເຮັດກິດຈະກຳຕາມຮີດຄອງປະເພນີໄດ້ 5 ຈຸດ ທິດທາງໃນຕໍ່ໜ້າໃນຊ່ວງສະເຫຼີມສະຫຼອງປີໃໝ່ລາວນີ້ ທາງຄະນະກຳມະການຈະໄດ້ລົງຕິດຕາມ ສະພາບລວມຢູ່ແຕ່ລະບ້ານ ແລະ ກຸ່ມບ້ານ ເພື່ອລາຍງານສະພາບໃຫ້ການນຳເມືອງເປັນແຕ່ລະ ໄລຍະທັງນີ້ ກໍເພື່ອເຮັດໃຫ້ການຫຼິ້ນບຸນປີໃໝ່ລາວຢູ່ພາຍໃນເມືອງໄຊທານີ ມີຄວາມສະຫງົບ ປອດໄພ ແລະ ເປັນລະບຽບຮຽບຮ້ອຍຈົບງາມ.