ບໍລິສັດ Northrop Grumman ສົ່ງກະສວຍອະວະກາດ Cygnus ບັນທຸກສິ່ງຂອງຕ່າງໆຂອງອົງກອນນາຊາ ໄປຍັງສະຖານີອະວະກາດລະຫວ່າງປະເທດ ເມື່ອຕົ້ນເດືອນທັນວາທີ່ຜ່ານມາ ໂດຍການເດີນທາງເປັນໄປດ້ວຍດີ ແລະ ຄາດວ່າຈະໄປເຖິງສະຖານີອະວະກາດໃນກາງເດືອນທັນວານີ້.
ລາຍງານລະບຸວ່າ ສິ່ງຂອງທີ່ສົ່ງໄປນັ້ນ ມີນ້ຳໜັກປະມານ 3.700 ກິໂລກຼາມ ເຊິ່ງມີຊິ້ນສ່ວນລົດສະປອຣ໌ດ ເຕົາອົບເຂົ້າໜົມຄຸກກີ ແລະ ເສື້ອເກາະປ້ອງກັນກຳມັນຕະພາບລັງສີລວມຢູ່ດ້ວຍ.
ໂດຍນັກບິນອະວະກາດຈະທົດສອບການອົບເຂົ້າໜົມຄຸກກີດ້ວຍເຕົາອົບ ແລະ ທົດສອບເສື້ອປ້ອງກັນກຳມັນຕະພາບລັງສີ ສຳລັບການເດີນທາງໄກໃນອະວະກາດ ເຊັ່ນ: ການໄປສຳຫຼວດດາວອັງຄານ.
ຂະນະທີ່ບໍລິສັດລົດໃຫຍ່ ແລມບໍກີນີ ຈາກອິຕາລີ ໄດ້ສົ່ງຕົວຢ່າງວັດສະດຸຄາຣ໌ບອນໄຟເບີໄປກັບຍານລຳນີ້ດ້ວຍ ເພື່ອນຳໄປທົດສອບກັບສະພາບໃນອະວະກາດ ກ່ອນທີ່ຈະນຳໄປຜະລິດເປັນເຄຶ່ອງມືທາງການແພດ ສຳລັບການປ່ຽນຖ່າຍອະໄວຍະວະສຳຄັນໃນຮ່າງກາຍມະນຸດ.
ໂດຍຜູ້ຊ່ຽວຊານດ້ານການແພດນາໂນ ເຊິ່ງເຮັດວຽກຮ່ວມກັບບໍລິສັດ ແລມບໍກີນີ ກ່າວວ່າ ສະພາບແວດລ້ອມໃນອະວະກາດນັ້ນມີຄວາມເຂັ້ມຂຸ້ນສຸດຂົ້ວ ບໍ່ຕ່າງຈາກພາຍໃນຮ່າງກາຍຂອງມະນຸດເຮົາ.
ປັດຈຸບັນ ນາຊ່າມີສັນຍາກັບບໍລິສັດ Northrop Grumman ແລະ SpaceX ເພື່ອໃຫ້ຈັດສົ່ງສິ່ງຂອງ ແລະ ສະບຽງຕ່າງໆໃຫ້ກັບນັກບິນອະວະກາດ ທີ່ສະຖານີອະວະກາດລະຫວ່າງປະເທດເປັນປະຈຳ ໂດຍຄັ້ງນີ້ຖືເປັນຄັ້ງທີ 12 ນັບຕັ້ງແຕ່ປີ 2013 ທີ່ Northrop Grumman ສົ່ງກະສວຍອະວະກາດໄປຍັງສະຖານີອະວະກາດເປັນຜົນສຳເລັດ.