ໂຄງການກໍ່ສ້າງອາຄານໂຮງຮຽນອະນຸບານ ແລະ ຫ້ອງການຄູ ໂຮງຮຽນເຂດຈັດສັນ ບ້າoດົງບາກໃໝ່ຫີນຄໍາ ເມືອງ ສະໜາມໄຊ ແຂວງ ອັດຕະປື ສໍາເລັດການກໍ່ສ້າງ 100% ໂດຍແມ່ນບໍລິສັດ ຄໍາພວງ ກໍ່ສ້າງ ແລະ ສ້ອມແປງເຄຫາສະຖານ ເປັນຜູ້ຮັບເໝົາການກໍ່ສ້າງ ແລະ ພະແນກສຶກສາທິການ ແລະ ກີລາແຂວງອັດຕະປື ເປັນເຈົ້າຂອງໂຄງການ ພາຍໃຕ້ການສະໜອງທຶນຂອງກະຊວງສຶກສາທິການ ແລະ ກີລາ ໃນມູນຄ່າການກໍ່ສ້າງທັງໝົດ 1,7 ຕື້ກວ່າກີບ ມອບໃຫ້ພະແນກສຶກສາທິການ ແລະ ກີລາແຂວງ ເປັນຜູ້ຄຸ້ມຄອງນຳໃຊ້ເຂົ້າໃນວຽກງານພັດທະນາການສຶກສາ ແລະ ກີລາ ຕໍ່ໄປ.
![](https://v2.vientianemai.net/wp-content/uploads/2022/04/277938756_1623193858040904_339529138306249311_n.jpg)
ພິທີມອບ-ຮັບໂຄງການດັ່ງກ່າວ ໄດ້ຈັດຂຶ້ນວັນທີ 4 ເມສາ 2022 ຜ່ານມານີ້ ທີ່ໂຮງຮຽນເຂດຈັດສັນດົງບາກ ບ້ານດົງບາກໃໝ່ຫີນຄຳ ເມືອງສະໜາມໄຊ ແຂວງອັດຕະປື ກ່າວມອບຂອງທ່ານ ໂພຄາ ວົງພູທອນ ຜູ້ຕາງໜ້າບໍລິສັດ ຄຳພວງກໍ່ສ້າງ ແລະ ສ້ອມແປງເຄຫະສະຖານ ແລະ ກ່າວຮັບແມ່ນ ທ່ານ ອຸດົມສິນ ສີຊານົນ ຫົວໜ້າພະແນກສຶກສາທິການ ແລະ ກີລາແຂວງ ມີທ່ານ ທອງໄຊ ບຸດທອງດີ ຫົວໜ້າຫ້ອງການສຶກສາທິການ ແລະ ກີລາເມືອງສະໜາມໄຊ ແລະ ພາກສ່ວນກ່ຽວຂ້ອງເຂົ້າຮ່ວມເປັນສັກຂີພິຍານ.
![](https://v2.vientianemai.net/wp-content/uploads/2022/04/277683119_539626380968361_5959479392114543559_n.jpg)
ທ່ານ ນິລະນາມ ແວວສີ ວິຊາການກໍ່ສ້າງ ພະແນກສຶກສາທິການ ແລະ ກີລາແຂວງ ກ່າວໃຫ້ຮູ້ວ່າ: ໂຄງການກໍ່ສ້າງອາຄານໂຮງຮຽນອະນຸບານ ແລະ ຫ້ອງການຄູ 2 ຫຼັງນີ້ ເຊິ່ງແມ່ນໂຄງການລົງທຶນຂອງກະຊວງສຶກສາ ແລະ ກີລາ ອາຄານໂຮງຮຽນດັ່ງກ່າວແມ່ນໄດ້ຖືກສ້າງຂື້ນເພື່ອຮອງຮັບນັກຮຽນອະນຸບານ ໃນເຂດຈັດສັນ ບ້ານດົງບາກໃໝ່ຫີນຄຳ ແລະ ເຂດບໍລິການບ້ານໃກ້ຄຽງ ແນໃສ່ສົ່ງເສີມການສຶກສາຢູ່ເຂດຈັດສັນດັ່ງກ່າວໃຫ້ດີຂື້ນຫລາຍກວ່າເກົ່າ.
![](https://v2.vientianemai.net/wp-content/uploads/2022/04/275793909_658201248586318_7175558647922974729_n.jpg)
ໂຄງການກໍ່ສ້າງອາຄານໂຮງຮຽນອະນຸບານເຂດຈັດສັນນີ້ ປະກອບເປັນ 2 ອາຄານຄື: ອາຄານຫ້ອງຮຽນຊັ້ນດຽວ 1 ຫຼັງ ປະກອບມີ 4 ຫ້ອງຮຽນ ໃນອາຄານປະກອບມີຫ້ອງນ້ຳ 3 ຫ້ອງ ແລະ ມີຫ້ອງອາບນ້ຳສຳລັບເດັກ 1 ຫ້ອງ ພ້ອມສຸຂະພັນ ອາຄານມີລວງຍາວ 32 ແມັດ ລວງກວ້າງ 8 ແມັດ ແລະ ອາຄານຫ້ອງການຄູ ຊັ້ນດຽວ ປະກອບມີ 2 ຫ້ອງ ໃນອາຄານປະກອບມີຫ້ອງນ້ຳ 2 ຫ້ອງພ້ອມດ້ວຍສຸຂະພັນ ອາຄານມີລວງຍາວ 16,5 ແມັດ ລວງກວ້າງ 8 ແມັດ ອາຄານທັງ 2 ຫຼັງເປັນອາຄານເບຕົງເສີມເຫຼັກ ພື້ນເບຕົງປູດ້ວຍກາໂຣ ໂຄງຫຼັງຄາເຫຼັກມຸງດ້ວຍກະເບື້ອງ ເພດານເຮັດດ້ວຍແຜ່ນລຽບ ອາຄານດັ່ງກ່າວປະກອບເຟີນີເຈີໂຕະ-ຕັ່ງຄູ ຕູ້ໃສ່ເອກະສານ ມີລະບົບໄຟຟ້າໃນອາຄານຄື: ດອກໄຟ ພັດລົມ ປັກສຽບ ແລະ ອື່ນໆຄົບຊຸດ ພ້ອມນີ້ ໂຄງການດັ່ງກ່າວ ຍັງໄດ້ມີການສະໜອງນ້ໍາ ແລະ ແທ່ງບັນຈຸນໍ້າ 200 ລິດ ເພື່ອອຳນວຍ ຄວາມສະດວກໃຫ້ແກ່ໂຮງຮຽນຊົມໃຊ້ ນອກຈາກນັ້ນ ຍັງປະກອບມີເຄື່ອງຫຼີ້ນກາງແຈ້ງສຳລັບເດັກຄື: ໂອ້ນຊ້າ ຕະລູດຊິງຊ້າ ຄານດ່ຽວ ຄານຄູ່ ມ້າເດື່ອງຕື່ມອີກ.
![](https://v2.vientianemai.net/wp-content/uploads/2022/04/277409573_317528923775783_4986478327088383215_n.jpg)
ໂຄງການກໍ່ສ້າງດັ່ງກ່າວ ໄດ້ດຳເນີນການກໍ່ສ້າງມາແຕ່ຕົ້ນເດືອນພະຈິກ 2021 ແລະ ສຳເລັດ 100% ໃນວັນທີ 4 ເມສາ 2022 ພິເສດແມ່ນໂຄງການນີ້ສ້າງສຳເລັດກ່ອນກໍານົດເວລາຕາມສັນຍາກໍ່ສ້າງ 4 ເດືອນ ໂດຍຜ່ານການຕິດຕາມກວດກາດ້ານເຕັກນິກການກໍ່ສ້າງຈາກຄະນະກຳມະການທີ່ກ່ຽວຂ້ອງ ທຸກຂັ້ນຕອນຢ່າງຖືກຕ້ອງ ການມອບ-ຮັບໂຄງການຮົ້ວອ້ອມໂຮງຮຽນ ລະຫວ່າງ ບໍລິສັດ ໂພສີ ກໍ່ສ້າງ ແລະ ສ້ອມແປງ ເຄຫະສະຖານ ກັບພະແນກສຶກສາທິການ ແລະ ແຂວງຄັ້ງນີ້ ເປັນການມອບ-ຮັບ ຊົ່ວຄາວ ຍັງຢູ່ໃນໄລຍະການຄ້ຳປະກັນການເປ່ເພ ຕາມລະບຽບຫຼັກການອີກ 12 ເດືອນ.
# ຂ່າວ – ພາບ : ເພັດສະໝອນ