ອີງຕາມບົດລາຍງານການຄາດຄະເນເສດຖະກິດຂອງອາຊີປະຈຳປີ 2022 ທີ່ໄດ້ຖືກນໍາມາເຜີຍແຜ່ວັນທີ 6 ເມສາ 2022 ໂດຍທະນາຄານພັດທະນາອາຊີ (ADB) ວ່າ ເສດຖະກິດຂອງ ສປປ ລາວ ຄາດວ່າຈະຂະຫຍາຍຕົວ 3,4% ໃນປີນີ້ ແລະ ໃນປີ 2023 ຄາດຈະຂະຫຍາຍຕົວລະດັບ 3,7% ຍ້ອນການລົງທຶນຂອງປະເທດທີ່ສົ່ງເສີມການສົ່ງອອກ.
ທ່ານ ນາງ ໂຊໂນມິ ທະນາກະ ຜູ້ຕາງໜ້າ ADB ປະຈໍາ ສປປ ລາວ ໃຫ້ຮູ້ວ່າ: “ໃນປີ 2021 ເສດຖະກິດຂອງ ສປປ ລາວ ໄດ້ຄ່ອຍໆຟື້ນຕົວຈາກສະພາບເສດຖະກິດທີ່ຕົກຕໍ່າທີ່ສຸດໃນຮອບຫຼາຍທົດສະວັດ ແຕ່ວ່າເຊື້ອຈຸລະໂລກຊະນິດໃໝ່ ແລະ ອັດຕາເງິນເຟີ້ທີ່ສູງ ອາດເຮັດໃຫ້ສະພາບການຟຶ້ນຕົວມີທ່າອ່ຽງຫຼຸດລົງ” ລັດຖະບານຈະຕ້ອງຄອຍເຝົ້າລະວັງ ໂດຍການສັກຢາວັກຊີນຢ່າງຕ່ຳສອງເຂັມໃຫ້ກັບພົນລະເມືອງຂອງຕົນຫຼາຍເທົ່າທີ່ຈະຫຼາຍໄດ້ ແລະ ເພີ່ມທະວີຄວາມໂປ່ງໃສໃນການຄຸ້ມຄອງການເງິນພາກລັດ ເພື່ອຟື້ນຟູຄວາມໝັ້ນໃຈຂອງຕະຫຼາດ ແລະ ດຶງດູດການລົງທຶນທີ່ພ້ອມຮັບກັບສະພາບ ແລະ ຍືນຍົງ.
ການລະບາດພະຍາດໂຄວິດ-19 ຮອບ 2 ໃນເດືອນເມສາ 2021 ຜ່ານມາ ໄດ້ເຮັດໃຫ້ລັດຖະບານປະກາດປິດເມືອງຫຼາຍຄັ້ງ ເຊິ່ງໄດ້ລົບກວນກິດຈະກໍາທາງດ້ານເສດຖະກິດໃນຂະແໜງການບໍລິການພາຍໃນປະເທດ ລວມທັງໂຮງແຮມ ຮ້ານອາຫານ ແລະ ການຂົນສົ່ງ ເພື່ອຊຸກຍູ້ການຟື້ນຟູຕະຫຼາດພາຍໃນປະເທດ ລວມທັງການທ່ອງທ່ຽວ ໃນເດືອນມັງກອນ 2022 ລັດຖະບານໄດ້ຜ່ອນຜັນມາດຕະການຄວບຄຸມພະຍາດໂຄວິດ-19 ແລະ ເລັ່ງໃສ່ການສັກຢາວັກຊີນ ໂດຍມີເປົ້າໝາຍໃຫ້ບັນລຸ 80% ຂອງປະຊາກອນໃນທົ່ວປະເທດໃນທ້າຍປີ 2022 ເມື່ອທຽບໃສ່ 50% ໃນຄັ້ງເດືອນທັນວາ ປີ 2021.
ການສົ່ງອອກຂອງຂະແໜງອຸດສະຫະກຳ ແລະ ຂະແໜງກະສິກຳ ໄດ້ປະກອບສ່ວນໃຫ້ແກ່ການຟື້ນຕົວຂອງເສດຖະກິດໃນປີທີ່ຜ່ານມາ ສະພາບອາກາດທີ່ເອື້ອອຳນວຍ ຍັງເຮັດໃຫ້ບັນດາເຂື່ອນຜະລິດໄຟຟ້າຫຼາຍແຫ່ງ ສາມາດດໍາເນີນການຜະລິດໄດ້ເຕັມກຳລັງ ແລະ ເພີ່ມການຜະລິດໄຟຟ້າເພື່ອການສົ່ງອອກ ການສົ່ງອອກສິນຄ້າກະສິກຳໄດ້ເພີ່ມຂື້ນໃນຫຼາຍຊະນິດ ສ່ວນໜຶ່ງແມ່ນເພື່ອຕອບສະໜອງຄວາມຕ້ອງການຂອງ ສປ ຈີນ ທີ່ເພີ່ມຂຶ້ນ ການເຕີບໂຕຂອງການສົ່ງອອກ ຄາດວ່າຈະສືບຕໍ່ໃນປີນີ້ ແລະ ປີຕໍ່ໄປ ເນື່ອງຈາກວ່າຈະມີການໄຫຼເຂົ້າຂອງການລົງທຶນຈາກຕ່າງປະເທດເຂົ້າໃນການພັດທະນາພະລັງງານໄຟຟ້າດ້ວຍແຮງລົມ ແສງອາທິດ ແລະ ພະລັງງານໄຟຟ້າທີ່ປ່ອຍອາຍກາກບອນຕໍ່າອື່ນໆເພື່ອຕະຫຼາດສົ່ງອອກ.
ການເພີ່ມຂຶ້ນຂອງລາຄານໍ້າມັນເຊື້ອໄຟ ແລະ ການອ່ອນຄ່າຂອງເງິນກີບ ເຊິ່ງພາໃຫ້ມີເງິນເຟີ້ໃນອັດຕາ 5,3% ໃນເດືອນທັນວາ 2021 ອາດຈະຊຸກຍູ້ໃຫ້ອັດຕາເງິນເຟີ້ສະເລ່ຍຂອງປະເທດຮອດ 5,8% ໃນປີ 2022 ແລະ 5,0% ໃນປີ 2023. ເງິນເຟີ້ຈະສ້າງຄວາມຫຍຸ້ງຍາກໃຫ້ແກ່ໜີ້ສິນຂອງປະເທດທີ່ມີຄວາມສ່ຽງສູງ ບົດລາຍງານໄດ້ຮຽກຮ້ອງໃຫ້ລັດຖະບານເພີ່ມທະວີຄວາມໂປ່ງໃສໃນການຄຸ້ມຄອງໜີ້ສິນສາທາລະນະກັບຕ່າງປະເທດ ເຊິ່ງຈະຊ່ວຍເປີດໂອກາດໃຫ້ ສປປ ລາວ ເຂົ້າເຖິງແຫຼ່ງທຶນເພື່ອການພັດທະນາແບບຍືນຍົງ.
ສໍາລັບການຄາດຄະເນການພັດທະນາຂອງອາຊີປະຈຳປີ 2022 ໄດ້ໃຫ້ຮູ້ວ່າ: ປະເທດໄດ້ມີຄວາມຄືບໜ້າຢ່າງຕັ້ງໜ້າ ໃນການບັນລຸແຜນງານແຫ່ງຊາດໃນການປະກອບສ່ວນແກ້ໄຂບັນຫາການປ່ຽນແປງດິນຟ້າອາກາດພາຍໃຕ້ສັນຍາປາຣີ ເພື່ອຫຼຸດຜ່ອນການປ່ອຍ ແລະ ເພີ່ມການດູດຊັບທາດອາຍແກັດເຮືອນແກ້ວໃຫ້ເປັນສູນ ໂດຍສະເພາະໃນຂົງເຂດຂອງການພັດທະນາພະລັງງານໄຟຟ້າ ແລະ ການຂະຫຍາຍໄຟຟ້າໄປສູ່ຄົວເຮືອນ ແຕ່ເຖິງຢ່າງໃດກໍຕາມ ຄຳໝັ້ນສັນຍາດ້ານນະໂຍບາຍຂອງປະເທດກ່ຽວກັບປ່າໄມ້ ການຂົນສົ່ງ ແລະ ພະລັງງານທົດແທນແມ່ນຍັງບໍ່ໄດ້ຕາມແຜນການ ດັ່ງນັ້ນ ເພື່ອແກ້ໄຂບັນຫາດັ່ງກ່າວ ລັດຖະບານໄດ້ດໍາເນີນຫຼາຍບາດກ້າວເພື່ອຮັບປະກັນການລົງທຶນຈາກສາກົນ ແລະ ກ່ອນອື່ນ ຈະຕ້ອງໄດ້ສ້າງຄວາມຄືບໜ້າໃນການແກ້ໄຂຊ່ອງຫວ່າງຂອງນະໂຍບາຍດິນຟ້າອາກາດ ແລະ ໂຄງປະກອບອົງການຈັດຕັ້ງ ການເພີ່ມທະວີການກະກຽມໂຄງການ ແລະ ອື່ນໆໃຫ້ມີຄວາມຖືກຕ້ອງສອດຄ່ອງຍິ່ງຂຶ້ນ
ADB ມີຄວາມມຸ່ງໝັ້ນທີ່ຈະບັນລຸ ເຮັດໃຫ້ພາກພື້ນອາຊີ ແລະ ປາຊີຟິກມີຄວາມຈະເລີນກ້າວໜ້າຢ່າງທົ່ວເຖິງ ພ້ອມຮັບກັບການປ່ຽນແປງ ແລະ ຍືນຍົງ ໄປພ້ອມກັບການຮັກສາຄວາມພະຍາຍາມຂອງຕົນໃນການລົບລ້າງຄວາມທຸກຍາກ ເຊິ່ງ ADB ໄດ້ຮັບສ້າງຕັ້ງຂຶ້ນໃນປີ 1966 ປັດຈຸບັນມີສະມາຊິກ 68 ປະເທດ ໃນນີ້ມີ 49 ປະເທດມາຈາກພາກພື້ນດັ່ງກ່າວ.