ກ້າວເຂົ້າສູ່ລະດູຝົນຢ່າງເຕັມຕົວ ເຮົາບໍ່ຮູ້ວ່າຝົນຈະຕົກມາເມື່ອໃດ ເຊິ່ງມື້ນີ້ພວກເຮົາຂໍນຳສະເໜີການຂັບຂີ່ລົດລຸຍນ້ຳຖ້ວມ ລະດູຝົນເປັນອີກສາເຫດເຮັດໃຫ້ເກີດອຸບັດເຫດຕາມເສັ້ນທາງ ເພາະນ້ຳຝົນທີ່ຕົກລົງມາ ເຮັດໃຫ້ທາງມື່ນ ອັນເປັນເຫດເຮັດໃຫ້ໄລຍະໃນການເບຣກລົດຍາວຂຶ້ນກວ່າປົກກະຕິ ທັງຍັງຫຼຸດທັດສະນະໃນການເບິ່ງເຫັນຂອງຜູ້ຂັບລົດ ສາເຫດເຫຼົ່ານີ້ເປັນປັດໄຈພາຍນອກທີ່ຫຼາຍໆທ່ານຂັບລົດຄວບຄຸມບໍ່ໄດ້ ແຕ່ຕ້ອງເພີ່ມຄວາມລະມັດລະວັງໃຫ້ຫຼາຍຂຶ້ນ ທີ່ສຳຄັນແມ່ນຕ້ອງປັບວິທີການຂັບລົດ ໃຫ້ສອດຄ່ອງກັບສະພາບໃນແຕ່ລະໄລຍະ ສະນັ້ນ ຈຶ່ງຂໍແນະນຳວິທີປະຕິບັດໃນການຂັບຂີ່ລົດໃນໄລຍະລະດູຝົນ ຫຼື ຂັບລົດຜ່ານນ້ຳຖ້ວມຢ່າງປອດໄພ ຄື: ກວດສອບຄວາມພ້ອມຂອງລົດ ເປັນຕົ້ນແມ່ນລະບົບໄຟເຍື່ອງທາງ ແລະ ໄຟສັນຍານຕ່າງໆ ກວດເບິ່ງຢາງປັດນ້ຳຝົນ ລະດັບນ້ຳລ້າງແວ່ນລົດ ກວດເຊັກລະບົບເບຣກລົດ ສະພາບຢາງຕີນລົດ ລົມຢາງລົດ (ລົມຢາງທີ່ອ່ອນເກີນໄປ ພາໃຫ້ປະສິດທິພາບໃນການຮີດນ້ຳໄດ້ໜ້ອຍລົງ ຈະເຮັດໃຫ້ເກີດການມື່ນໄດ້ງ່າຍ) ເມື່ອຝົນຕົກແຮງໃຫ້ເປີດໄຟໜ້າ ແລະ ໄຟຕັດໝອກ (ຖ້າມີ) ບໍ່ຄວນເປີດໄຟສຸກເສີນ.
ໃນໄລຍະ 5 ນາທີທຳອິດທີ່ຝົນຕົກໃໝ່ໆ ໃຫ້ເພີ່ມຄວາມລະມັດລະວັງເປັນພິເສດ ເພາະເສັ້ນທາງຈະມື່ນ ເນື່ອງຈາກດິນມີການສະສົມຄວາມຮ້ອນ ຖ້າເກີດມີຝົນຕົກ ຈະເຮັດໃຫ້ຄວາມຮ້ອນກັບເຢັນມາກະທົບໃສ່ກັນ ຈະພາໃຫ້ໜ້າຢາງປູທາງມື່ນ ໃນໄລຍະ 5 ນາທີທຳອິດ ໃຊ້ຄວາມໄວໃຫ້ເໝາະສົມກັບສະພາບເສັ້ນທາງ ແລະ ວິໄສທັດໃນການເບິ່ງເຫັນ ຈົ່ງໄລຍະຫ່າງລະຫວ່າງຂັບລົດຕາມຫຼັງລົດຄັນທາງໜ້າໃຫ້ຫຼາຍກວ່າປົກກະຕິ 2 ເທົ່າ ຫຼີກລ່ຽງການເບຣກລົດຢ່າງກະທັນຫັນ ແລະ ການໃຊ້ເບຣກໂດຍບໍ່ຈຳເປັນ.
ເພີ່ມການສັງເກດການຈຸດທີ່ມີນ້ຳຫົ້ງເສັ້ນທາງ ຫຼຸດຄວາມໄວ ເມື່ອຂັບຜ່ານຈຸດທີ່ນ້ຳຫົ້ງ ເພາະຈະເກີດການເຫີນນ້ຳເຮັດໃຫ້ລົດມື່ນ (ເຈືອກ) ໄດ້ຖ້າຂັບມາດ້ວຍຄວາມໄວສູງ ໃນກໍລະນີຂັບໄປໃນເສັ້ນທາງນ້ຳຖ້ວມຂັງ ຫຼື ນ້ຳໄຫຼແຮງ ໃຫ້ສັງເກດລະດັບຄວາມເລິກຂອງນ້ຳຈາກລົດຄັນທາງໜ້າ ຫຼື ຂອບທາງເພື່ອປະເມີນສະຖານະການຂະນະທີ່ຂັບລົດຜ່ານນ້ຳຖ້ວມຂັງຄວນປິດແອ ແລະ ໃຊ້ເກຍຕ່ຳ ຫຼື ເກຍ 1 ເພື່ອບໍ່ໃຫ້ຮອບເຄື່ອງຈັກຕ່ຳເກີນໄປ ເພື່ອຫຼີກລ່ຽງບໍ່ໃຫ້ຈັກມອດກາງນ້ຳ ນ້ຳອາດຈະໄຫຼເຂົ້າທໍ່ຄວັນໄດ້.
ຫຼັງຈາກທີ່ຜ່ານຈຸດນ້ຳຖ້ວມຂັງ ແລ້ວໃຫ້ຢຽບເບຣກເລື້ອຍໆ ເພື່ອຮີດນ້ຳໃຫ້ຝາເບຣກແຫ້ງ ປ້ອງກັນອາການເບຣກມື່ນ ແຕ່ຖ້າຕ້ອງຈອດລົດເປັນເວລາດົນນານ ຄວນຫຼີກລ່ຽງການໃຊ້ເບຣກມືຈອດລົດ ເພື່ອປ້ອງອາການເບຣກຕິດ ຖ້າຝົນຕົກແຮງຈົນບໍ່ສາມາດເບິ່ງເຫັນທາງຂ້າງໜ້າໃນໄລຍະ 10 ແມັດ ຄວນຫາບ່ອນຈອດລົດທີ່ປອດໄພ ຖ້າຝົນເຊົາຕົກ ຫຼື ຕົກໃນປະລິມານເບິ່ງເຫັນ ຈຶ່ງເດີນທາງຕໍ່ຕ້ອງໄດ້ກວດສອບສະພາບເສັ້ນທາງທີ່ຈະໄປ ໂດຍສະເພາະໃນໄລຍະນີ້ເມືອງທ່າພະບາດ ແຂວງບໍລິຄຳໄຊ ຖືກນ້ຳຖ້ວມໄຫຼຜ່ານເສັ້ນທາງ ເສັ້ນທາງທ່າງ່ອນ ບ້ານເກິນ ຖືກນ້ຳຖ້ວມ ຖ້າບໍ່ມີວຽກຈຳເປັນກໍຄວນຫຼີກລ່ຽງການສັນຈອນໄປມາຕາມເສັ້ນທາງດັ່ງກ່າວ ເພື່ອຮັບປະກັນຄວາມປອດໄພ.