ໃນວັນທີ 23 ມີນາ 2022 ທີ່ຫ້ອງວ່າການປົກຄອງນະຄອນຫຼວງວຽງຈັນ (ນວ) ມີພິທີເຊັນບົດ ບັນທຶກລະຫວ່າງອົງການແນວລາວສ້າງຊາດ ນວ ແລະ ສະມາຄົມພັດທະນາເພື່ອແມ່ຍິງ ແລະ ການສືກສາກົດໝາຍ ຮ່ວມລົງນາມໂດຍທ່ານ ສົມໃຈ ຊົົ່ງຈົ່ງເຕັງ ຮອງປະທານອົງການແນວລາວສ້າງຊາດ ນວ ແລະ ທ່ານ ນາງ ອິນທະນາ ບຸບຜາສະຫວັນ ຜູ້ອໍານວຍການສະມາຄົມພັດທະນາເພື່ອແມ່ຍິງ ແລະ ການສືກສາກົດໝາຍ ກ່ຽວກັບການຈັດຕັ້ງປະຕິບັດກິດຈະກຳ ການສົ່ງເສີມສ້າງຄວາມຮູ້ດ້ານບົດບາດ ຍິງ-ຊາຍ ແລະ ສິດທິທາງດ້ານກົດໝາຍ ໃຫ້ແກ່ບັນດາອົງການຈັດຕັ້ງສຳລັບຄົນພິການ ໂດຍມີທ່ານ ຖະໜອມ ທໍາທອງ ປະທານອົງການແນວລາວສ້າງຊາດ ນວ ແລະ ພາກສ່ວນກ່ຽວຂ້ອງເຂົ້າຮ່ວມ ເປັນສັກຂີພິຍານ.
ສະມາຄົມພັດທະນາເພື່ອແມ່ຍິງ ແລະ ການສືກສາກົດໝາຍ ມີ 6 ອົງການຈັດຕັ້ງສໍາລັບຄົນພິການຄື
- ສະມາຄົມຄົນພິການແຫ່ງຊາດ
- ສະມາຄົມແມ່ຍິງພິການ
- ສະມາຄົມພັດທະນາ ແລະ ສົ່ງເສີມອາຊີບຄົນພິການຕາ
- ສະມາຄົມຊ່ວຍເຫຼືອເດັກນ້ອຍພິການ
- ສະມາຄົມຄົນພິການ ເມືອງໄຊເສດຖາ
- ສະມາຄົມ ພັດທະນາຄົນພິການແຂວງຊຽງຂວາງ.
ຈຸດປະສົງຂອງກິດຈະກຳ ເພື່ອຜັນຂະຫຍາຍແຜນພັດທະນາຂອງແນວລາວສ້າງຊາດ ກໍຄືແຜນພັດທະນາ ເສດຖະກິດ-ສັງຄົມ 5 ປີ (2021-2025) ທີ່ນອນຢູ່ໃນ ແຜນວຽກຈຸດສຸມທີ່ 3 ການສົ່ງເສີມ ແລະ ສ້າງໂອກາດໃຫ້ແມ່ຍິງ ໄວໜຸ່ມ ເດັກ ຜູ້ອາວຸໂສ ຜູ້ດ້ອຍໂອກາດ ແລະ ຜູ້ພິການ/ເສຍອົງຄະ ໄດ້ຮັບການພັດທະນາ ແລະ ປະກອບສ່ວນຢ່າງເຕັມທີ່ໃນການພັດທະນາ
ກິດຈະກໍາຫຼັກ ປະກອບມີການປະສານງານຮ່ວມກັບອົງການຈັດຕັ້ງສໍາລັບຄົນພິການ ພັດທະນາ ແລະ ຈັດພີມເອກະສານຕ່າງໆທີ່ກ່ຽວຂ້ອງກັບບົດບາດຍິງ-ຊາຍ ກົດໝາຍກ່ຽວກັບແມ່ຍິງ ແລະ ກົດ ໝາຍວ່າດ້ວຍຄົນພິການ ເຝິກອົບຮົມກ່ຽວກັບບົດບາດຍິງ-ຊາຍ ອົບຮົມທັກສະການເປັນຄູເຝິກ ໃຫ້ແກ່ຜູ້ຕ່າງໜ້າຈາກ 6 ອົງການຈັດຕັ້ງສໍາລັບຄົນພິການ ລົງເຜີຍແຜ່ບົດຮຽນໂດຍຄູເຝິກ ຕິດຕາມສັງເກດການສອນ ແລະ ໃຫ້ຄໍາແນະນໍາແກ່ຄູເຝິກ ການສ້າງວີດີໂອພາບເຄື່ອນໄຫວ ໂດຍການເລົ່າເລື້ອງກ່ຽວກັບບົດບາດຍິງ-ຊາຍ ແລະ ຄວາມພິການ ແລະ ກິດຈະກໍາທີຊ່ວຍໃຫ້ຄົນພິການສາມາດນໍາໃຊ້ການບໍລິການທາງດ້ານກົດໝາຍຂອງ ADWLE ໄດ້ໂດຍບໍ່ເສຍຄ່າ ໂດຍຜ່ານຫ້ອງການໃຫ້ຄໍາປືກສາ ແລະ ຊ່ວຍເຫຼືອແມ່ຍິງ (WACO) ບ້ານຈອມມະນີ ເມືອງໄຊເສດຖາ ນວ ຜູ້ໃຫ້ທຶນສະໜັບສະໜູນ ກອງທືນ MAKE THE RIGHT REAL FUND GRANT 2021 (MRR) ອີນຊອນ ປະເທດ ສ ເກົາຫຼີ ມູນຄ່າ 24.000 ໂດລາສະຫະລັດ ປະມານ 275 ລ້ານກວ່າກີບ ໄລຍະເວລາຂອງການດຳເນີນກິດຈະ ກຳ ແຕ່ເດືອນມັງກອນ ຈົນເຖິງເດືອນສິງຫາ 2022.
# ຂ່າວ – ພາບ : ບຸນມີ