ສປປ ລາວ ແລະ ສາທາລະນະລັດສະຫະພັນບຣາຊິນ ລົງນາມສັນຍາວ່າດ້ວຍການຮ່ວມດ້ານເຕັກນິກຮ່ວມກັນ ໂດຍມີເປົ້າໝາຍສົ່ງເສີມການຮ່ວມມືດ້ານວິຊາການໃນຂະແໜງການທີ່ເປັນບູລິມະສິດຂອງສອງຝ່າຍ ເຊັ່ນ: ກະສິກໍາ ລ້ຽງສັດ ສາທາລະນະສຸກ ການສຶກສາ ການຫຼຸດຜ່ອນຄວາມທຸກຍາກ ຄວາມໝັ້ນຄົງດ້ານອາຫານ ການເປັນມືອາຊີບ ແລະ ຂະແໜງການອື່ນໆທີ່ມີຄວາມສົນໃຈ ເພື່ອການສົ່ງເສີມການພັດທະນາເສດຖະກິດ-ສັງຄົມ.
![](https://v2.vientianemai.net/wp-content/uploads/2022/03/275335433_1048453819081212_2244720497783082674_n-1024x683.jpg)
ພິທີລົງລົງນາມດັ່ງກ່າວ ຈັດຂຶ້ນວັນທີ 17 ມີນາ 2022 ຢູ່ສະຖານເອກອັກຄະລັດຖະທູດ ສປປ ລາວ ປະຈຳລາຊະອານາຈັກໄທ ເຊິ່ງລົງນາມໂດຍທ່ານ ແສງ ສຸຂະທິວົງ ເອກອັກຄະລັດຖະທູດວິສາມັນຜູ້ມີອຳນາດເຕັມ ສປປ ລາວ ປະຈຳລາຊະອານາຈັກໄທ ແລະ ທ່ານ José Borges dos Santos Júnior ເອກອັກຄະລັດ ຖະທູດວິສາມັນຜູ້ມີອຳນາດເຕັມສາທາລະນະລັດສະຫະພັນບຣາຊິນ ໂດຍມີສຳນັກງານຕັ້ງຢູ່ບາງກອກ ລາຊະອານາຈັກໄທໄທ ມີພາກສ່ວນກ່ຽວຂ້ອງເຂົ້າຮ່ວມ.
![](https://v2.vientianemai.net/wp-content/uploads/2022/03/273447070_3163220643996152_4572698910375603975_n-1024x683.jpg)
ໂອກາດນີ້ ທ່ານເອກອັກຄະລັດຖະທູດທັງສອງປະເທດ ກໍໄດ້ສະແດງຄວາມປິຕິຍິນດີ ແລະ ເຊື່ອໝັ້ນວ່າ ສັນຍາວ່າດ້ວຍການຮ່ວມມືດ້ານເຕັກນິກຄັ້ງນີ້ ຈະສ້າງເງື່ອນໄຂສະດວກໃຫ້ການຮ່ວມມືຂະແໜງການຕ່າງໆ ໂດຍສະເພາະ ການສົ່ງເສີມການພັດທະນາເສດຖະກິດ-ສັງຄົມ ລະຫວ່າງສອງປະເທດໃຫ້ມີການ ຂະຫຍາຍຕົວເພີ່ມຂຶ້ນ ເພື່ອນຳເອົາຜົນປະໂຫຍດຕົວຈິງມາສູ່ສອງປະເທດ ແລະ ປະຊາຊົນສອງຊາດລາວ ແລະ ບຣາຊິນໃນຊຸມປີຕໍ່ໜ້າ ສປປ ລາວ ແລະ ສາທາລະນະລັດສະຫະພັນບຣາຊິນ ສ້າງຕັ້ງສາຍພົວພັນການທູດນຳກັນ ວັນທີ 12 ມິຖຸນາ 1995 ນັບແຕ່ສ້າງຕັ້ງສາຍພົວພັນການທູດຮ່ວມກັນເປັນຕົ້ນມາ ສາຍພົວພັນມິດ ຕະພາບ ແລະ ການຮ່ວມມືສອງຝ່າຍ ລາວ-ບຣາຊິນ ໄດ້ມີການຂະຫຍາຍຕົວຢ່າງຕໍ່ເນື່ອງ ໂດຍສອງຝ່າຍໄດ້ ແລກປ່ຽນການຢ້ຽມຢາມຂອງຄະນະຜູ້ແທນໃນຫຼາຍລະດັບ ການພົວພັນສອງຝ່າຍມີການພົວພັນຮ່ວມມືກັນຢ່າງ ປົກກະຕິນໍາກັນຕະຫຼອດມາ ໂດຍສະເພາະ ໃນໂອກາດສໍາຄັນຕ່າງໆ ການນໍາຂັ້ນສູງຂອງສອງປະເທດ ກໍໄດ້ສົ່ງສານອວຍພອນເຊິ່ງກັນ ແລະ ກັນ.
![](https://v2.vientianemai.net/wp-content/uploads/2022/03/274670533_333015208790670_767949724523850228_n-1024x683.jpg)
ໃນຜ່ານມາ ລັດຖະບານບຣາຊິນ ໄດ້ໃຫ້ທຶນເຝິກອົບຮົມສໍາລັບນັກການທູດໜຸ່ມນ້ອຍ ກີລາບານເຕະ ແລະ ຂໍ້ລິເລີ່ມໂຄງການຊົນລະປະທານແກ່ພາກສ່ວນກ່ຽວຂ້ອງຂອງ ສປປ ລາວ ນອກນີ້ ບຣາຊິນຍັງໄດ້ ສະແດງຄວາມສົນໃຈໃນການສຶກສາຄວາມເປັນໄປໄດ້ການຮ່ວມມືດ້ານການລ້ຽງງົວພັນຊີ້ນເພື່ອສົ່ງອອກ ຂາຍໃຫ້ ສປ ຈີນ.
# ຂ່າວ – ພາບ: ສະບາໄພ