ສະພາການຄ້າ ແລະ ອຸດສາຫະກໍາແຫ່ງຊາດລາວ ຮ່ວມກັບສູນເຕັກໂນໂລຊີ ແລະ ການສື່ສານ ກະຊວງອຸດສາຫະກໍາ ແຫ່ງລາຊະອານາຈັກໄທ ແລະ ບໍລິສັດ AEC Trade Center ຈໍາກັດ ໄດ້ຈັດງານຈັບຄູ່ຮ່ວມທຸລະກິດຂອງບັນດາຜູ້ປະກອບການລາວ-ໄທ ດ້ວຍຮູບແບບລະບົບທາງໄກ ພາຍໃຕ້ຫົວຂໍ້ “ ສ້າງໂອກາດຈັບຄູ່ຮ່ວມທຸລະກິດໃນ ສປປ ລາວ ວັນທີ 18 ມີນາ 2022 ທີ່ສູນການຄ້າທາດຫຼວງພລາຊາ ໂດຍມີທ່ານ ນາງ ລັດສະໝີ ເວດສະພົງ ປະທານສະມາຄົມສົ່ງເສີມຜະລິດຕະພັນລາວ ເຈົ້າຂອງບໍລິສັດແມ່ຂອງລາວ ຂາອອກ-ຂາເຂົ້າ ຈໍາກັດ ແລະ ທ່ານ ສະຫຼອງໄຊ ຊໍຍຸຕະພົງ ຮອງປະທານສະພາທຸລະກິດລາວ-ໄທ ແລະ ຜູ້ປະກອບການທຸລະກິດຂະໜາດນ້ອຍ ແລະ ກາງ ທັງລາວ ແລະ ໄທເຂົ້າຮ່ວມ.
![](https://v2.vientianemai.net/wp-content/uploads/2022/03/274206805_504351627835629_6920456741579244206_n-1024x678.jpg)
ການຈັດງານຄັ້ງນີ້ ເປັນການສ້າງຂີດຄວາມສາມາດ ແລະ ເປີດໂອກາດໃນການເຈລະຈາຫາຄູ່ຮ່ວມທຸລະກິດຈາກຕ່າງປະເທດ ການເຂົ້າເຖິງຕະຫຼາດຂອງບັນດາຜູ້ປະກອບການທຸລະກິດຂະໜາດນ້ອຍ ແລະ ກາງ (SME) ໃນໄລຍະການລະບາດຂອງພະຍາດໂຄວິດ-19.
![](https://v2.vientianemai.net/wp-content/uploads/2022/03/274820836_2263484573828367_8857722434864115218_n-1024x678.jpg)
ທ່ານນາງ ລັດສະໝີ ເວດສະພົງ ໃຫ້ສໍາພາດຕື່ມວ່າ: ການຈັດງານຄັ້ງນີ້ ເປັນນິມິດໝາຍສໍາຄັນໃນການສ້າງຄວາມສໍາພັນລະຫວ່າງປະເທດລາວ-ໄທ ທັງເປັນການນໍາເອົາຜະລິດຕະພັນທັງລາວ ແລະ ໄທ ມາພົບປະກັນ ພ້ອມນັ້ນ ຍັງເປັນການເປີດການຮຽນຮູ້ ແລກປ່ຽນການພັດທະນາຜະລິດຕະພັນທີ່ຍັງຕ້ອງການໃນການພັດທະນາຕື່ມ ເພື່ອໃຫ້ຜະລິດຕະພັນຂອງລາວເຮົາສາມາດສົ່ງອອກ ແລະ ເປັນທີ່ຍອມຮັບຂອງລູກຄ້າຈາກຕ່າງປະເທດ ເຊິ່ງງານໃນຄັ້ງນີ້ ໄດ້ເຊື້ອເຊີນເອົາຜູ້ປະກອບການທຸກຂະແໜງການ ໂດຍສະເພາະຜູ້ຜະລິດຂັ້ນເມືອງ ແລະ ຜູ້ປະກອບການນໍາເຂົ້າສິນຄ້າຈາກປະເທດໄທມາຈໍາໜ່າຍທີ່ຕະຫຼາດລາວ ໄດ້ມາຮຽນຮູ້ ນອກນັ້ນສະມາຊິກສະມາຄົມສົ່ງເສີມຜະລິດຕະພັນລາວ ໄດ້ມີການສຶກສາຊ່ອງທາງຂະຫຍາຍຂອບເຂດການຮ່ວມມືທັງສອງຝ່າຍ ແລະ ອື່ນໆ.
![](https://v2.vientianemai.net/wp-content/uploads/2022/03/275153713_490254709253833_9129517044378077997_n-1024x678.jpg)
# ຂ່າວ – ພາບ: ຂັນທະວີ