ເພື່ອຄວາມເປັນລະບຽບຮຽບຮ້ອຍ ແລະ ແກ້ໄຂການສັນຈອນແອອັດໃນຕົວເມືອງ ໃນຜ່ານມາ ເມືອງໄຊເສດຖາ ນະຄອນຫຼວງວຽງຈັນ ໄດ້ເອົາໃຈໃສ່ແກ້ໄຂຄວາມບໍ່ເປັນລະບຽບຮຽບຮ້ອຍຕາມແຄມຖະໜົນສາຍຫຼັກພາຍໃນເມືອງຂອງຕົນ ເປັນຕົ້ນການຂາຍເຄື່ອງຊະຊາຍ ການມ້າງເທີບເງີບ ປ້າຍໂຄສະນາ ແລະ ສິ່ງກີດຂວາງຕ່າງໆອອກຈາກເຂດສະຫງວນແຄມທາງສາຍຫຼັກ ໂດຍປະຕິບັດຕາມກົດໝາຍຜັງເມືອງ ແລະ ກົດໝາຍທາງຫຼວງ ກໍຄືມະຕິຄຳສັ່ງ ແລະ ຂໍ້ຕົກຂອງທ່ານເຈົ້າຄອງນະຄອນຫຼວງວຽງຈັນ ແລະ ທ່ານເຈົ້າເມືອງໄຊເສດຖາ ນອກນີ້ ແຜນຕໍ່ໜ້າ ຍັງມີການກຳນົດເອົາຖະໜົນຂາຍເຄື່ອງກໍ່ສ້າງ ເຄື່ອງເອເລັກໂຕຣນິກ ເຄື່ອງໄຟຟ້າ ແລະ ຖະໜົນເຂດບໍລິການຮ້ານອາຫານ ເຂດສະຖານທີ່ທ່ອງທ່ຽວຕື່ມອີກ ທັງນີ້ກໍເພື່ອຄວາມສະດວກສະບາຍໃຫ້ແກ່ການຊື້ຂາຍ.
![](https://v2.vientianemai.net/wp-content/uploads/2022/03/89147439-ee9b-4f8b-b25d-1a7ec0414d96-1024x681.jpg)
ທ່ານ ທະວີໄຊ ໄຊປະເສີດ ຫົວໜ້າຫ້ອງການໂຍທາທິການ ແລະ ຂົນສົ່ງ (ຍທຂ) ເມືອງໄຊເສດຖາ ຕາງໜ້າໃຫ້ຄະນະຈັດສັນຄວາມບໍ່ເປັນລະບຽບຮຽບຮ້ອຍພາຍໃນເມືອງໄຊເສດຖາ ໃຫ້ສຳພາດວັນທີ 11 ມີນາ 2022 ວ່າ: ໂດຍປະຕິບັດຕາມແຜນຢູ່ມະຕິກອງປະຊຸມໃຫຍ່ ຄັ້ງທີ VII ຂອງອົງຄະນະພັກເມືອງໄຊເສດຖາ ຢູ່ໃນມະຕິນີ້ ມີ 8 ຂໍ້ ແຕ່ມີ 1 ຂໍ້ ໄດ້ກຳນົດວ່າ ເສັ້ນທາງແຕ່ບ້ານຫົວຂົວຮອດສາມແຍກບ້ານໄຮ່ຄຳ ຈະກຳນົດເປັນເຂດຮ້ານຂາຍເຄື່ອງກໍ່ສ້າງ ຂາຍເຄື່ອງເອເລັກໂຕຣນິກ ຂາຍເຄື່ອງໄຟຟ້າ ເຄື່ອງສຽງ ແລະ ແຕ່ສາມແຍກບ້ານຄຳສະຫວາດ ຫາບ້ານຊຽງດາ ຈະກຳນົດເປັນບ່ອນບໍລິການຮ້ານອາຫານ ແລະ ແຫຼ່ງທ່ອງທ່ຽວ ປັດຈຸບັນໄດ້ມອບໃຫ້ຫ້ອງການອຸດສາຫະກຳ ແລະ ການຄ້າເມືອງໄຊເສດຖາເປັນຜູ້ກຽມລົງເກັບກຳເອົາຂໍ້ມູນບັນດາຮ້ານຂາຍເຄື່ອງກໍ່ສ້າງ ແລະ ຮ້ານຂາຍເຄື່ອເອເລັກໂຕຣນິກຕ່າງໆຢູ່ພາຍໃນເມືອງໄຊເສດຖາ ເພື່ອຈະເຊີນເຂົາເຈົ້າມາເພື່ອແຈ້ງກຳນົດເວລາ 6 ເດືອນ ຫຼື 1 ປີ ໃຫ້ຍົກຍ້າຍອອກມາຂາຍຢູ່ເສັ້ນທາງທີ່ກຳນົດໃຫ້ ເຊິ່ງຕາມແຜນການວຽກງານນີ້ ໃຫ້ສຳເລັດກ່ອນກອງປະຊຸມໃຫຍ່ ຄັ້ງທີ VIII ຂອງອົງຄະນະພັກເມືອງໄຊເສດຖາ ກໍຄືນັບແຕ່ນີ້ຫາປີ 2025 ໝາຍຄວາມວ່າ ຜູ້ທີ່ຂາຍເຄື່ອງກໍ່ສ້າງ ແລະ ເຄື່ອງເອເລັກໂຕຣນິກທົ່ວເມືອງໃນປັດຈຸບັນທີ່ຂາຍຢູ່ຕາມເສັ້ນທາງຫຼາຍເສັ້ນພາຍໃນເມືອງໄຊເສດຖາ ແມ່ນໃຫ້ຂາຍຢູ່ເສັ້ນທາງທີ່ກຳນົດໃຫ້ ທັງນີ້ກໍເພື່ອສ້າງຄວາມສະດວກ ແລະ ຄວາມເປັນລະບຽບຮຽບຮ້ອຍ.
# ຂ່າວ & ພາບ : ສົມສະຫວັນ