ທ່ານ ຈັນສຸກ ພະນັກງານບໍລິສັດ ພູເບ້ຍ ມາຍນິງ ໃຫ້ສຳພາດຕໍ່ນັກຂ່າວເມື່ອບໍ່ດົນມານີ້ວ່າ: ຂີ່ລົດໄຟ ຈະໃຊ້ເວລາໜ້ອຍກວ່າ ແລະ ລາຄາຖືກກວ່າ ຮູ້ສຶກມີຄວາມປອດໄພກວ່າຂີ່ລົດບັດ ແລະ ຮູ້ສຶກໄວ້ວາງໃຈ ຍ້ອນຕົນເອງໄປເຮັດວຽກຢູ່ຕ່າງແຂວງເລື້ອຍໆ ແຕ່ກ່ອນແມ່ນໄດ້ຂີ່ລົດບັດໄປ ບໍ່ພຽງແຕ່ໃຊ້ເວລາຫຼາຍ ບາງຄັ້ງຍັງພົບກໍລະນີດິນເຈື່ອນໃນການເດີນທາງ ພາຍຫຼັງເປີດນຳໃຊ້ທາງລົດໄຟ ລາວ-ຈີນ ການຂີ່ລົດໄຟໄດ້ເປັນທາງເລືອກບູລິມະສິດຂອງຕົນ ເຊິ່ງການເປີດນຳໃຊ້ທາງລົດໄຟ ໄດ້ພຽງ 100 ວັນ ຕົນ ໄດ້ຂີ່ລົດໄຟໄປແລ້ວ 10 ກວ່າຄັ້ງ ສໍາລັບຕົນ ການຂີ່ລົດໄຟແມ່ນໄວກວ່າ ສະບາຍກວ່າ ແລະ ປອດໄພກວ່າ.
ວັນທີ 12 ມີນາ 2022 ທາງລົດໄຟ ລາວ-ຈີນ ໄດ້ເປີດນຳໃຊ້ຄົບຮອບ 100 ວັນ ໄລຍະ 100 ວັນຜ່ານມາ ເພື່ອອຳນວຍຄວາມສະດວກໃຫ້ປະຊາຊົນລຽບຕາມທາງລົດໄຟ ລາວ-ຈີນ ບໍ່ພຽງແຕ່ໄດ້ເພີ່ມຖ້ຽວລົດໄຟໂດຍສານໃຫ້ຫຼາຍຂຶ້ນ ແຕ່ຍັງໄດ້ດຳເນີນການທົດລອງແລ່ນລົດໄຟ EMU ຂະບວນລ້ານຊ້າງ 2 ຂະບວນຕໍ່ໃສ່ກັນ ເພື່ອເພີ່ມຄວາມສາມາດດ້ານການຕອບສະໜອງຕາມຄວາມຕ້ອງການໃນການເດີນທາງຂອງຜູ້ໂດຍສານຢູ່ຕາມທາງລົດໄຟ ລາວ-ຈີນ.
ຕາມຂ່າວແຈ້ງໃຫ້ຮູ້ວ່າ: ການເປີດນຳໃຊ້ທາງລົດໄຟ ລາວ-ຈີນ ໄດ້ 100 ວັນ ຂະບວນລົດໄຟໂດຍສານຕອນຢູ່ພາຍໃນປະເທດຈີນ ໄດ້ເປີດຖ້ຽວລົດໄຟ ໄປ-ກັບ 23,5 ຂະບວນຕໍ່ວັນ ແລະ ໄດ້ຂົນສົ່ງຜູ້ໂດຍສານຫຼາຍກວ່າ 1,65 ລ້ານຄົນ ໂດຍສາມາດຂົນສົ່ງຜູ້ໂດຍສານສູງສຸດ 33.000 ຄົນຕໍ່ວັນ ທາງລົດໄຟຕອນຢູ່ພາຍໃນປະເທດລາວ ໄດ້ເປີດຂະບວນລົດໄຟໂດຍສານ ໄປ-ກັບ 2 ຂະບວນຕໍ່ວັນ ລວມແລ້ວໄດ້ຂົນສົ່ງຜູ້ໂດຍສານ 150.000 ຄົນ ແລະ ສາມາດຂົນສົ່ງຜູ້ໂດຍສານສູງສຸດ 2.800 ຄົນຕໍ່ວັນ ທາງລົດໄຟ ລາວ-ຈີນ ໄດ້ຮັບຄວາມຊົມເຊີຍຈາກຜູ້ໂດຍສານທັງຫຼາຍ ຍ້ອນມີສະພາບແວດລ້ອມທີ່ປອດໄພ ສີຂຽວມີປະສິດທິຜົນສູງ ແລະ ສະດວກສະບາຍ.
ນັບແຕ່ເປີດນຳໃຊ້ທາງລົດໄຟ ລາວ-ຈີນ ເປັນຕົ້ນມາ ທາງລົດໄຟສາຍນີ້ໄດ້ກາຍເປັນຊ່ອງທາງຈະລາຈອນສິນຄ້າ ທີ່ສະດວກສະບາຍ ຢູ່ລະຫວ່າງຈີນ ແລະ ປະເທດສະມາຊິກອາຊຽນ 100 ວັນຜ່ານມາ ສາ ມາດຂົນສົ່ງສິນຄ້າຫຼາຍກວ່າ 1,2 ລ້ານໂຕນ ແລະ ຂົນສົ່ງສິນຄ້າຂ້າມຊາຍແດນຫຼາຍກວ່າ 280.000 ໂຕນ ໄດ້ຂົນສົ່ງສິນຄ້າໄປເຖິງຫຼາຍປະເທດ ເພື່ອຍົກຄຸນນະພາບດ້ານການຂົນສົ່ງສິນຄ້າໃຫ້ສູງຂຶ້ນ ທາງລົດໄຟ ລາວ-ຈີນ ຍັງໄດ້ໃຫ້ບໍລິການຂົນສົ່ງສິນຄ້າ “ເສັ້ນທາງສາຍດ່ວນແມ່ນ້ຳລ້ານຊ້າງ-ແມ່ນ້ຳຂອງ” ຂົນສົ່ງສິນຄ້າຈາກນະຄອນຄຸນມິງ ປະເທດຈີນ ເຖິງ ນະຄອນຫຼວງວຽງຈັນ ປະເທດລາວ ໃຊ້ເວລາ 26 ຊົ່ວໂມງ ເຊິ່ງສາມາດປະຢັດເວລາໄດ້ຢ່າງຫຼວງຫຼາຍ ທຽບໃສ່ຂະບວນລົດໄຟຂົນສົ່ງສິນຄ້າສາກົນທຳມະດາ.
ພາຍຫຼັງເປີດນຳໃຊ້ທາງລົດໄຟ ລາວ-ຈີນ ຕົ້ນທຶນໃນການຂົນສົ່ງສິນຄ້າຈາກ ນະຄອນຫຼວງວຽງຈັນ ເຖິງ ນະຄອນຄຸນມິງ ຫຼຸດລົງ 40-50% ຕົ້ນທຶນຂົນສົ່ງສິນຄ້າພາຍໃນປະເທດລາວ ຫຼຸດລົງ 20-40% ຄຽງຄູ່ກັບສົນທິສັນຍາການພົວພັນຄູ່ຮ່ວມເສດຖະກິດຮອບດ້ານຂອງພາກພື້ນ (RCEP) ມີຜົນບັງຄັບໃຊ້ເປັນທາງການ ຍອດປະລິມານການຂົນສົ່ງສິນຄ້າທາງລົດໄຟ ລາວ-ຈີນ ຍັງຈະເພີ່ມຂຶ້ນຢ່າງຫຼວງຫຼາຍ.
ການເປີດນຳໃຊ້ທາງລົດໄຟ ລາວ-ຈີນ ໄດ້ຊຸກຍູ້ການພັດທະນາເສດຖະກິດຢູ່ລຽບຕາມທາງລົດໄຟຢ່າງແຂງແຮງ ພ້ອມທັງໄດ້ປັບປຸງເງື່ອນໄຂ ແລະ ວິທີການອອກເດີນທາງຂອງປະຊາຊົນຢູ່ລຽບຕາມທາງລົດໄຟເປັນຢ່າງດີ ເຊິ່ງທ່ານ ຄຳພອນ ສິດທິເດດ ຮອງຫົວໜ້າພະແນກຮ່ວມມືສາກົນ ຄະນະພົວພັນຕ່າງປະເທດ ສູນກາງຊາວໜຸ່ມປະຊາຊົນປະຕິວັດລາວ ກ່າວວ່າ: ການເປີດນຳໃຊ້ທາງລົດໄຟ ລາວ-ຈີນ ໄດ້ປັບປຸງການສ້າງພື້ນຖານໂຄງລ່າງຢູ່ລຽບຕາມທາງລົດໄຟໃຫ້ດີຂຶ້ນ ເຊິ່ງມີບົດບາດໃຫຍ່ຫຼວງໃນການຊຸກຍູ້ການພັດທະນາເສດຖະກິດຂອງທ້ອງຖິ່ນ ແລະ ການປະກອບອາຊີບຂອງຊາວໜຸ່ມ ພ້ອມທັງໄດ້ຊ່ວຍຊຸກຍູ້ໃຫ້ປະເທດລາວ ຈາກປະເທດທີ່ບໍ່ມີທາງອອກສູ່ທະເລ ເປັນປະເທດເຊື່ອມໂຍງເຊື່ອມຈອດຂອງພາກພື້ນ.
(ສະບາໄພ)