ພິທີລົງນາມບົດບັນທຶກຄວາມເຂົ້າໃຈ ເພື່ອຈັດຕັ້ງປະຕິບັດ “ໂຄງການປັບປຸງການຄໍ້າປະກັນສະບຽງອາຫານ ແລະ ໂພຊະນາການ ຢູ່ເຂດພູດອຍພາກເໜືອ ໄລຍະ 2” ລະຫວ່າງກົມພັດທະນາຊົນນະບົດ ກະຊວງກະສິກໍາ ແລະ ປ່າໄມ້ ແລະ ອົງການເຮລວີຕັດ ເພື່ອການຮ່ວມມືສາກົນປະຈໍາ ສປປ ລາວ ຈັດຂຶ້ນວັນທີ 7 ມີນາ 2022 ຢູ່ຫ້ອງວ່າການປົກຄອງແຂວງຫຼວງນໍ້າທາ ໂດຍມີຜູ້ຕາງໜ້າຈາກກະຊວງການຕ່າງປະເທດ ກະຊວງກະສິກຳ ແລະ ປ່າໄມ້ ຫ້ອງວ່າການປົກຄອງແຂວງ ສະຫະພາບເອີຣົບ ປະຈຳ ສປປ ລາວ ແລະ ພາກສ່ວນກ່ຽວຂ້ອງ ເຂົ້າຮ່ວມ.
ງົບປະມານໃນການຈັດຕັ້ງປະຕິບັດໂຄງການດັ່ງກ່່າວ 996.676 ເອີໂຣ ໂດຍການສະໜັບສະໜູນຂອງສະຫະພາບເອີຣົບ ແລະ ອົງການເຮວວີຕັດ ເຢຍລະມັນ ຈະຈັດຕັ້ງປະຕິບັດຢູ່ 38 ບ້ານ ໃນນີ້ 15 ບ້ານ ຂອງເມືອງງອຍ ແຂວງຫຼວງພະບາງ 15 ບ້ານ ຂອງເມືອງວຽງພູຄາ ແຂວງຫຼວງນໍ້າທາ 4 ບ້ານ ຂອງເມືອງຫ້ວຍຊາຍ ແລະ 4 ບ້ານ ຂອງເມືອງເມິງ ແຂວງບໍ່ແກ້ວ ມີປະຊາກອນໄດ້ຮັບຜົນປະໂຫຍດ 21.613 ຄົນ.
ທ່ານ ອ່ອນຈັນ ຄໍາພາວົງ ຮອງເຈົ້າແຂວງຫຼວງນໍ້າທາ ກ່າວວ່າ: ການສົ່ງເສີມການຜະລິດເປັນສິນຄ້າ ແລະ ການປັບປຸງໂພຊະນາການ ແມ່ນວຽກງານຍຸດທະສາດພືີ້ນຖານຍາວນານ ແລະ ເປັນວຽກງານບູລິມະສິດຂອງພັກ-ລັດ ເຊິ່ງພວກເຮົາຈະຕ້ອງຮ່ວມແຮງຮ່ວມໃຈກັນແກ້ໄຂ ແລະ ພັດທະນາຢ່າງຕໍ່ເນື່ອງ ເປັນລະບົບຄົບຊຸດ ແລະ ຮອບດ້ານ ເພື່ອເຮັດໃຫ້ປະຊາຊົນມີຊີວິດການເປັນຢູ່ດີຂຶ້ນ ຢູ່ດີກິນດີ ແລະ ກ້າວໄປເຖິງການຫຼຸດພົ້ນອອກຈາກຄວາມທຸກຍາກ.
ທ່ານ ພອນສະຫວັນ ເສດຖານະໄພສານ ຜູ້ຕາງໜ້າສໍານັກງານຜູ້ຕາງໜ້າສະຫະພາບເອີຣົບປະຈໍາ ສປປ ລາວ ໄດ້ເນັ້ນເຖິງຄວາມສຳຄັນວ່າ: ເປັນຫຍັງອົງການຈັດຕັ້ງທາງສັງຄົມ ຈຶ່ງຄວນມີສ່ວນຮ່ວມໃນການຈັດຕັ້ງປະຕິບັດໂຄງການນີ້ ແລະ ເຮັດໃຫ້ການມີສ່ວນຮ່ວມເປັນກຸນແຈສຳຄັນໃນການປະສານງານ ແລະ ເຮັດວຽກຮ່ວມກັນ ເພື່ອຫຼຸດຜ່ອນການຂາດສານອາຫານໃນ ສປປ ລາວ ໃຫ້ມີປະສິດທິຜົນທີ່ດີ.
ຜົນໄດ້ຮັບຂອງໂຄງການນີ້ ຈະຕອບສະໜອງການໃຫ້ບໍລິການດ້ານໂພຊະນາການທີ່ມີຄຸນນະພາບ ເພື່ອຫຼຸດຜ່ອນອັດຕາການຂາດສານອາຫານໃນບ້ານເປົ້າໝາຍໃນເຂດຫ່າງໄກສອກຫຼີກ ແລະ ປັບປຸງຂອດປະສານງານລະຫວ່າງບັນດາຄູ່ຮ່ວມງານພາກລັດ ແລະ ອົງການຈັດຕັ້ງທາງສັງຄົມໃນ ສປປ ລາວ ໃຫ້ມີຄວາມກົມກຽວ ສອດຄ່ອງ ແລະ ຮັດກຸມ ບັນລຸແຜນພັດທະນາເສດຖະກິດ-ສັງຄົມ 5 ປີ ຄັ້ງທີ 9 ກ່ຽວກັບວຽກງານໂພຊະນາການ ແລະ ການປັບປຸງຊີວິດການເປັນຢູ່ຂອງຊົນນະບົດ.
ໂດຍການຮ່ວມມືລະຫວ່າງຄູ່ຮ່ວມງານພາກລັດ ກັບ 5 ສະມາຄົມທີ່ບໍ່ຫວັງຜົນກຳໄລ ເພື່ອສ້າງຕັ້ງ 50 ອົງການຈັດຕັ້ງຊຸມຊົນຢູ່ຂັ້ນບ້ານ ເຊິ່ງຈະເປັນຜູ້ຈັດຕັ້ງປະຕິບັດໂຄງການຂະໜາດນ້ອຍ ເພື່ອປັບປຸງໂພຊະນາການໃນບ້ານຂອງເຂົາເຈົ້າ ໂດຍອີງໃສ່ບົດສະເໜີຂອງກຸ່ມ ໂດຍໂຄງການຈະໃຫ້ຄໍາແນະນໍາ ແລະ ການສະໜັບສະໜູນການບໍລິການດ້ານໂພຊະນາການສໍາລັບກິດຈະກໍາທີ່ກຸ່ມໄດ້ປະຕິບັດ ໂຄງການຈະອຳນວຍຄວາມສະດວກໃຫ້ການປະສານງານ ລະຫວ່າງອົງການຈັດຕັ້ງທີ່ກ່ຽວຂ້ອງ ເພື່ອຊຸກຍູ້ການປະສານງານວຽກງານໂພຊະນາການ ແລະ ເຊື່ອມໂຍງບັນດາສິ່ງທ້າທາຍຂັ້ນບ້ານ ຫາຂັ້ນເທິງ ເພື່ອແກ້ໄຂ ແລະ ພັດທະນານະໂຍບາຍດ້ານອາຫານ ແລະ ໂພຊະນາການ.
# ຂ່າວ & ພາບ : ສະບາໄພ