ຫ້ອງການຖະແຫຼງຂ່າວຂອງຄະນະລັດຖະບານຈີນ ເຜີຍແຜ່ “ປຶ້ມປົກຂາວວ່າດ້ວຍການພັດທະນາວຽກງານກີລາຄົນພິການຂອງຈີນ ແລະ ການປົກປ້ອງສິດ ແລະ ຜົນປະໂຫຍດຂອງຄົນພິການຈີນ” ໂດຍໄດ້ສະຫຼຸບການພັດທະນາວຽກງານກີລາຄົນພິການຈີນຢ່າງເປັນລະບົບ ເມື່ອບໍ່ດົນມານີ້ວ່າ: ໃນຖານະເປັນກຸ່ມຄົນພິເສດ ຄົນພິການມີລັກສະນະພິເສດໃນການເຂົ້າຮ່ວມການແຂ່ງຂັນກີລາຄົນພິການ ຕ້ອງຜ່ານຫຼາຍຂັ້ນຕອນ ຈຶ່ງສາມາດເຂົ້າຮ່ວມການແຂ່ງຂັນກີລາໄດ້ ເຊັ່ນ: ການຟື້ນຟູສຸຂະພາບ ການອອກກຳລັງກາຍ ແລະ ການເຂົ້າຮ່ວມການແຂ່ງຂັນກີລາ ເພື່ອເຮັດສຳເລັດຂັ້ນຕອນດັ່ງກ່າວ ເຂົາເຈົ້າຕ້ອງຜ່ານຜ່າອຸປະສັກ ດ້ານຮ່າງກາຍ ແລະ ຈິດໃຈ ມັນບໍ່ພຽງແຕ່ຕ້ອງເຄົາລົບຫຼັກວິທະຍາສາດໃນການຟື້ນຟູສຸຂະພາບຂອງຄົນພິການເທົ່ານັ້ນ ຍັງຕ້ອງປະສານສົມທົບກັບສະພາບຄວາມຈິງຂອງຄົນພິການອີກດ້ວຍ.
![](https://v2.vientianemai.net/wp-content/uploads/2022/03/273544235_2520604014739018_1900590793760145033_n.jpg)
ເນື່ອງຈາກຄົນພິການເປັນກຸ່ມຄົນພິເສດ ແລະ ດ້ອຍໂອກາດ ເມື່ອທຽບກັບການຫຼິ້ນກີລາ ແລະ ການແຂ່ງຂັນກີລາຂອງຄົນປົກກະຕິ ການແຂ່ງຂັນກີລາ ແລະ ການຍົກສູງລະດັບການແຂ່ງຂັນກີລາຂອງຄົນພິການ ຕ້ອງການການສະໜັບສະໜູນຈາກດ້ານເຕັກນິກວິທະຍາສາດການກີລາ ຖ້າຢາກໃຫ້ວຽກງານກີລາຄົນພິການໄດ້ຮັບການພັດທະນາຢ່າງສະດວກ ແລະ ພັດທະນາໃຫ້ດີຂຶ້ນ ຈຶ່ງບໍ່ສາມາດປາສະຈາກເຕັກນິກ ແລະ ຫຼັກວິທະຍາສາດໄດ້ ເປັນຕົ້ນການແຂ່ງຂັນຄວາມໄວລໍ້ຄົນພິການ ຄຸນນະພາບຂອງລໍ້ມີຜົນໂດຍກົງຕໍ່ຄະແນນການແຂ່ງຂັນ ການຍົກລະດັບເຕັກນິກວິທະຍາສາດ ຈະສາມາດຍົກສູງລະດັບຄວາມຄ່ອງແຄ້ວລະຫວ່າງລໍ້ກັບຄົນພິການໄດ້ ແລະ ສາມາດຍົກສູງຄວາມສາມາດໃນການແຂ່ງລໍ້ຄົນພິການໃຫ້ໄວຂຶ້ນ ການອອກແຮງພັດທະນາເຕັກນິກວິທະຍາສາດທີ່ກ່ຽວຂ້ອງ ກໍເປັນສ່ວນໜຶ່ງທີ່ຂາດບໍ່ໄດ້ໃນການພັດທະນາວຽກງານກີລາຄົນພິການ.
![](https://v2.vientianemai.net/wp-content/uploads/2022/03/275333048_2118946421614346_1688926789720908990_n.jpg)
ຫຼາຍປີຜ່ານມານີ້ ການພັດທະນາອົງການຄົ້ນຄວ້າວິທະຍາສາດກີລາຄົນພິການຂອງຈີນ ຈຶ່ງໄດ້ເພີ່ມຄວາມໄວຂຶ້ນ ການສ້າງບຸກຄະລາກອນດ້ານກີລາຄົນພິການໄດ້ກາຍເປັນລະບົບໃນເບື້ອງຕົ້ນ ການຄົ້ນຄວ້າດ້ານກີລາຄົນພິການໄດ້ຮັບຜົນສຳເລັດນັບມື້ນັບຫຼາຍຂຶ້ນ ປີ 2021 ກອງທຶນສຳລັບໂຄງການວິທະຍາສາດສັງຄົມແຫ່ງຊາດຈີນ ທີ່ກ່ຽວຂ້ອງກັບການຄົ້ນຄວ້າກີລາຄົນພິການ ມີຫຼາຍກວ່າ 20 ໂຄງການ.
![](https://v2.vientianemai.net/wp-content/uploads/2022/03/274920351_3079192672347770_4605917262492783910_n.jpg)
ພາຍໃຕ້ການສະໜັບສະໜູນຈາກພັກກອມມູນິດຈີນ ແລະ ລັດຖະບານຈີນ ວຽກງານກີລາຄົນພິການຂອງຈີນ ຈຶ່ງໄດ້ຮັບໝາກຜົນຢ່າງຫຼວງຫຼາຍ ໃນໄລຍະຈັດຕັ້ງປະຕິບັດ “ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ 13” ຄະນະນັກກີລາຄົນພິການຂອງຈີນ ໄດ້ເຂົ້າຮ່ວມການແຂ່ງຂັນກີລາລະດັບສາກົນ 160 ຄັ້ງ ໃນນີ້ໄດ້ຮັບຫຼຽນຄຳ 1.114 ຫຼຽນ ໃນການແຂ່ງຂັນມື້ທຳອິດໃນງານກີລາໂອແລມປິກຄົນພິການລະດູໜາວ ປັກກິ່ງ 2022 ທີ່ກຳລັງດຳເນີນຢູ່ ທີມຊາດຈີນ ສາມາດຍາດໄດ້ແລ້ວ 2 ຫຼຽນຄຳ 3 ຫຼຽນເງິນ 3 ຫຼຽນທອງ ລວມ 8 ຫຼຽນ ການແຂ່ງຂັນມື້ທີສອງ ທີມຊາດຈີນຍາດໄດ້ຮັບອີກ 8 ຫຼຽນ ໃນນີ້ ຫຼຽນຄຳ 4 ຫຼຽນ ການຍົກສູງລະດັບການແຂ່ງຂັນກີລາຂອງຄົນພິການຈີນ ສະແດງໃຫ້ເຫັນຜົນສຳເລັດຂອງ ວຽກງານກີລາຄົນພິການຈີນຢ່າງເຕັມທີ່ ງານກີລາໂອແລມປິກຄົນພິການລະດູໜາວ ປັກກິ່ງ 2022 ໄດ້ເຮັດໃຫ້ຊາວໂລກ ສຸມຄວາມສົນໃຈໃສ່ນັກກີລາຄົນພິການ ເຊິ່ງເປັນໂອກາດໃໝ່ຂອງການພັດທະນາວຽກງານກີລາຄົນພິການຂອງຈີນ ທັງເປັນການປະກອບສ່ວນຊຸກຍູ້ໃຫ້ວຽກງານກີລາຄົນພິການທົ່ວໂລກ “ກ້າວສູ່ອະນາຄົດຮ່ວມກັນ”.
![](https://v2.vientianemai.net/wp-content/uploads/2022/03/275170423_512369640535276_8313116249914793092_n.jpg)
# ຂ່າວ – ພາບ: ສະບາໄພ