ກອງປະຊຸມຄະນະກໍາມະການແຫ່ງຊາດຕ້ານເອດສ໌ ຈັດຂຶ້ນວັນທີ 9 ມີນາ 2022 ທີ່ໂຮງແຮມ ດອນຈັນພາເລດ ນະຄອນຫຼວງວຽງຈັນ ໂດຍເປັນປະທານຂອງທ່ານ ປອ ບຸນແຝງ ພູມມະໄລສິດ ລັດຖະມົນຕີ ກະຊວງສາທາລະນະສຸກ ປະທານຄະນະກໍາມະການແຫ່ງຊາດຕ້ານເອດສ໌ ທ່ານ ປອ ນາງ ສີສຸກ ວົງວິຈິດ ຮອງລັດຖະມົນຕີກະຊວງສຶກສາທິການ ແລະ ກີລາ ຮອງປະທານຄະນະການແຫ່ງຊາດຕ້ານເອດສ໌ ພ້ອມດ້ວຍທ່ານຫົວໜ້າກົມ ຮອງກົມ ບັນດາທ່ານຜູ້ຕາງໜ້າຈາກກະຊວງ ສຳນັກງານ ອົງການ ແລະ ພາກສ່ວນກ່ຽວຂ້ອງເຂົ້າຮ່ວມ.
![](https://v2.vientianemai.net/wp-content/uploads/2022/03/received_642764366962452-1024x718.jpeg)
ທ່ານ ດຣ ພູທອນ ສຸດທິລັກ ຫົວໜ້າສູນຕ້ານເອດສ໌ ແລະ ພຕພ ກ່າວລາຍງານຕໍ່ກອງປະຊຸມຄະນະກໍາມະການແຫ່ງຊາດຕ້ານເອດສ໌ ວ່າ: ໃນປີຜ່ານມາ ເປັນໄລຍະທີ່ມີຄວາມຫຍຸ້ງຍາກຈາກການລະບາດ ພະຍາດໂຄວິດ-19 ໄດ້ສ້າງຜົນກະທົບຕໍ່ການເດີນທາງ ການສັນຈອນໄປມາ ເຮັດໃຫ້ການເຄື່ອນໄຫວວຽກງານຕ້ານເອດສ໌ພົບຂໍ້ຫຍຸ້ງຍາກ ໃນການເຂົ້າເຖິງກຸ່ມທີ່ມີຄວາມສຽງ ການບໍລິການສຸຂະພາບ ແລະ ກວດເລືອດຊອກຫາການຕິດເຊື້ອ HIV ກໍມີຂໍ້ຫຍຸ້ງຍາກ ຜູ້ຕິດເຊື້ອ HIV ບໍ່ສາມາດມາຮັບການບໍລິການສຸຂະພາບ ແລະ ມາຮັບຢາຢູ່ສະຖານທີ່ບໍລິການສາທາລະນະສຸກ ແລະ ເຮັດໃຫ້ຈໍານວນຜູ້ຕິດເຊື້ອ HIV ຂາດການຕິດຕາມໃນການປິ່ນປົວມີຈໍານວນຫຼາຍຂຶ້ນ ຕາມການລາຍງານຂອງສູນຕ້ານເອດl% ແລະ ພຕພ ໄດ້ໃຫ້ຮູ້ວ່າ ເຖິງຈະມີການລະບາດຂອງພະຍາດໂຄວິດ-19 ຮ້ານບັນເທີງ ການບໍລິການຕ່າງໆໄດ້ປີດການບໍລິການກໍຕາມ ແຕ່ການແຜ່ລະບາດຂອງເຊື້ອ HIV ບໍ່ໄດ້ຢຸດສະງັກ ແລະ ຍັງມີທ່າອ່ຽງເພີ່ມຂຶ້ນໃນແຕ່ລະປີ ເຊັ່ນ: ປີ 2020 ເຮົາກວດພົບຜູ້ຕິດເຊື້ອທັງໝົດ 1.579 ຄົນ ກົງກັນຂ້າມ ພຽງແຕ່ 6 ເດືອນຕົ້ນປີ 2021 ພວກເຮົາກວດພົບຜູ້ຕິດເຊື້ອ HIV 818 ຄົນ ຖ້າ 6 ເດືອນທ້າຍປີ ຫາກຕິດຊໍ້າກັນກັບ 6 ເດືອນຕົ້ນປີ ໝາຍຄວາມວ່າ ຖ້າພວກເຮົາເອົາ 818 ມາຄູນໃຫ້ 2 ກໍຈະເທົ່າກັບ 1.639 ໝາຍວ່າ ຈໍານວນຜູ້ຕິດເຊື້ອຫຼາຍກວ່າ ປີ 2020.
ສິ່ງທ້າທາຍ ແລະ ເປັນອຸປະສັກໃນການວຽກງານດັ່ງກ່າວ ແມ່ນບັນຫາທາງດ້ານງົບປະມານ ເພື່ອ ນຳໃຊ້ເຂົາໃນການໂຄສະນາປະຊາສຳພັນ ເພາະການເຂົ້າເຖິງຂໍ້ມູນຂ່າວສານຂອງສັງຄົມຍັງຕ່ຳ ການ ຮັບຮູ້ຂອງຄົນໃນສັງຄົມກໍຍັງເປັນບໍ່ສາມາດຮັບຮູ້ຢ່າງເລິກເຊິ່ງ ໂດຍສະເພາະໃນເຂດຫ່າງໄກສອກຫຼຼີກ ລວມທັງບາງກຸ່ມຄົນຈຳນວນໜຶ່ງກໍຍັງຖືເບົາ.
ສິ່ງສຳຄັນ ວຽກງານຈຸດສຸມໃນສະເພາະໜ້າ ຈະຕ້ອງພ້ອມກັນສູ້ຊົນຜ່ານຜ່າ ຊອກຫາວິທີທາງລະດົມທຶນເຂົ້າໃນການສະກັດກັ້ນ ແລະ ຕ້ານເຊື້ອ HIV ພະຍາດເອດສ໌ ແລະ ພະຍາດຕິດຕໍ່ທາງເພດສໍາພັນ ແລະ ສະກັດກັ້ນບໍ່ໃຫ້ພະຍາດດັ່ງກ່າວລະບາດໃນອະນາຄົດ ສູ້ຊົນຈັດຕັ້ງປະຕິບັດທຸກວຽກງານ ເພື່ອບັນລຸໃຫ້ໄດ້ເປົ້າໝາຍແບບເລັ່ງລັດ (Fast-Tract) ຂອງອົງການສະຫະປະຊາຊາດຕ້ານເອດສ໌ (UNAIDS) ຄື: ພາຍໃນ ປີ 2025 ບັນລຸໃຫ້ໄດ້ 95-95-95 ແລະ ຢຸດຕິການແຜ່ລະບາດຂອງເຊື້ອ HIV ແລະ ບັນລຸເປົ້າໝາຍການພັດທະນາແບບຍືນຍົງ ( SDC ) ໃຫ້ໄດ້ໃນປີ 2030.
![](https://v2.vientianemai.net/wp-content/uploads/2022/03/received_1090961415017794-1024x544.jpeg)
# ຂ່າວ & ພາບ : ບຸນມີ