ທ່ານ ພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກ ທັງເປັນຜູ້ປະຈຳການຄະນະສະເພາະກິດຄວບຄຸມພະຍາດໂຄວິດ-19 ພ້ອມຄະນະ ຖະແຫຼງຂ່າວຕໍ່ສື່ມວນຊົນ ໃນວັນທີ 14 ພຶດສະພາ 2020 ທີ່ສູນປະຕິບັດຄະນະສະເພາະກິດຄວບຄຸມພະຍາດອັກເສບປອດຈາກເຊື້ອຈຸລະໂຣກສາຍພັນໃໝ່ (COVID-19) ວ່າ: ໃນວັນທີ 13 ພຶດສະພາ 2020 ໄດ້ເກັບຕົວຢ່າງມາກວດທັງໝົດ 117 ຄົນ ໃນນັ້ນ ມີກໍລະນີສົງໄສ 38 ຄົນ ແລະ ແຮງງານລາວທີ່ກັບມາຈາກປະເທດໄທ 79 ຄົນ ແຮງງານດັ່ງກ່າວແມ່ນຈາກສະຫວັນນະເຂດ 53 ຄົນ ຄຳມ່ວນ 11 ຄົນ ສາລະວັນ 9 ຄົນ ບໍລິຄຳໄຊ 2 ຄົນ ຈຳປາສັກ2 ຄົນ ແລະ ອຸດົມໄຊ 2 ຄົນ ຜົນກວດທັງໝົດແມ່ນບໍ່ພົບເຊື້ອ ໝາຍຄວາມວ່າໃນວັນທີ 13 ພຶດສະພາ 2020 ບໍ່ມີຜູ້ຕິດເຊື້ອໃໝ່ ສັງລວມການກວດວິເຄາະແຕ່ເດືອນມັງກອນຮອດວັນທີ 13 ພຶດສະພາ 2020 ໄດ້ເກັບຕົວຢ່າງມາກວດທັງໝົດ ມີ 4.092 ຕົວຢ່າງ ກວດພົບເຊື້ອສະສົມ 19 ຄົນ (32 ມື້ແລ້ວທີ່ບໍ່ພົບຜູ້ຕິດເຊື້ອໃໝ່).
ສຳລັບການຕິດຕາມຜູ້ເດີນທາງມາຈາກຕ່າງປະເທດ ໂດຍສະເພາະແຮງງານລາວຢູ່ສະຖານທີ່ຈຳກັດບໍລິເວນຕ່າງໆຂອງແຂວງ ປັດຈຸບັນນີ້ ທົ່ວປະເທດມີສູນຈຳກັດບໍລິເວນທັງໝົດ 66 ສູນ ມີຜູ້ຈຳກັດບໍລິເວນຢູ່ສູນ 2.097 ຄົນ ໄດ້ເກັບຕົວຢ່າງມາກວດວິເຄາະທັງໝົດ ແລະ ບໍ່ມີຜູ້ຕິດເຊື້ອ ສ່ວນການຕິດຕາມປີ່ນປົວຄົນເຈັບຢູ່ໂຮງໝໍ ປັດຈຸບັນມີຜູ້ນອນຕິດຕາມຢູ່ໂຮງໝໍມິດຕະພາບ 5 ຄົນ ຍິງ 4 ຄົນ ທັງໝົດເຫັນວ່າມີອາການປົກກະຕິ.
ສ່ວນການຕິດຕາມສະພາບການລະບາດຂອງປະເທດໃກ້ຄຽງ ແລະ ການລະບາດຢູ່ໃນໂລກ ເຫັນວ່າມາຮອດເວລາ 6:00 ໂມງຂອງວັນທີ 14 ພຶດສະພາ 2020 ທົ່ວໂລກມີການລາຍງານການລະບາດທັງໝົດ 213 (ປະເທດ/ເຂດ) ວັນທີ 13 ພຶດສະພາ 2020 ເພີ່ມອີກປະເທດໜຶ່ງ (ປະເທດເລໂຊໂຕ ທະວີບອາຟຣິກາໃຕ້) ມີການຢັ້ງຢືນຜູ້ຕິດເຊື້ອພະຍາດ COVID-19 ແມ່ນ 4.422.147 (84.710 ໃໝ່) ເສຍຊິວິດ 297.552 (5.101 ໃໝ່) ກວມເອົາ 6,72% ຂອງຜູ້ຕິດເຊື້ອທັງໝົດ ປີ່ນປົວຫາຍດີ 1.654.819 (79.261 ໃໝ່) ກວມເອົາ 37,42% ຂອງຜູ້ຕິດເຊື້ອທັງໝົດ ບັນຫາສຳຄັນແມ່ນມີບາງປະເທດ ຈຳນວນຜູ້ຕິດເຊື້ອມື້ດຽວມີເຖິງ 19.103 ຄົນ ແລະ ເສຍຊີວິດ 1.616 ຄົນຕໍ່ມື້ ອັດຕາຄວາມຮ້າຍແຮງຂອງມື້ນີ້ ແມ່ນ 6.72 % (ມື້ວານນີ້ 6,74 %).
ສະເພາະກຸ່ມປະເທດອາຊຽນກໍເຫັນວ່າຍັງມີບາງປະເທດທີ່ມີອັດຕາການຕິດເຊື້ອໃໝ່ປະຈຳວັນທີ 13 ພຶດສະພາ 2020 ສູງເຖິງ 689 ຄົນ ໃນມື້ດຽວນີ້ ຢູ່ກຸ່ມປະເທດອາຊຽນ ມີຜູ້ເສຍຊີວິດ 44 ຄົນ.
ແນວໃດກໍຕາມ ຂ້າພະເຈົ້າຂໍຮຽກຮ້ອງໃຫ້ທຸກພາກສ່ວນໃນສັງຄົມ ຊຸມຊົນ ຄອບຄົວ ແລະ ສ່ວນບຸກຄົນ ມີຄວາມອົດທົນພະຍາຍາມ ເອົາໃຈໃສ່ຮ່ວມແຮງຮ່ວມໃຈກັນສືບຕໍ່ຈັດຕັ້ງປະຕິບັດຄຳແນະນຳ ແລະ ມາດຕະການຕ່າງໆໃຫ້ຖືກຕ້ອງ ແລະ ເຂັ້ມງວດ ໂດຍສະເພາະການລ້າງມືດ້ວຍນ້ຳສະອາດ ແລະ ສະບູ ຫຼືໃຊ້ເຈວລ້າງມື ການປະຕິບັດໄລຍະຫ່າງທາງສັງຄົມ ການໃສ່ຜ້າປິດປາກ-ດັງ ເວລາອອກຈາກບ້ານ ຫຼື ໄປສະຖານທີ່ບໍລິການຕ່າງໆ ໃຫ້ກາຍເປັນຄວາມຊິນເຄີຍໃນການດຳລົງຊີວິດປະຈຳວັນ.
# ຂ່າວ & ພາບ : ສີພອນ