ທ່ານ ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ (ສພຊ) ພ້ອມດ້ວຍຄະນະ ລົງພົບປະ ຢ້ຽມຢາມ ແລະ ເຮັດວຽກຮ່ວມກັບຄະນະນຳແຂວງບໍລິຄໍາໄຊ ເພື່ອຕິດຕາມຊີ້ນໍາການຈັດຕັ້ງເຊື່ອມຊຶມ ແລະ ຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງພັກໃນທ້າຍອາທິດຜ່ານມານີ້ ຕ້ອນຮັບໂດຍທ່ານ ກອງແກ້ວ ໄຊສົງຄາມ ເຈົ້າແຂວງບໍລິຄຳໄຊ ມີຄະນະປະຈຳພັກແຂວງ ສະພາປະຊາຊົນແຂວງ ເລຂາພັກເມືອງ ແລະ ອົງການຈັດຕັ້ງທີ່ກ່ຽວຂ້ອງເຂົ້າຮ່ວມ.
ທ່ານ ກອງແກ້ວ ໄຊສົງຄາມ ໄດ້ລາຍງານກ່ຽວກັບສະພາບການພັດທະນາເສດຖະກິດ-ສັງຄົມຂອງແຂວງໃນໄລຍະ 1 ປີຜ່ານມາ ແລະ ທິດທາງແຜນການໃນຕໍ່ໜ້າ ການຈັດຕັ້ງຜັນຂະຫຍາຍ 2 ວາລະແຫ່ງຊາດ ແລະ ການຈັດຕັ້ງເຜີຍແຜ່ຊື່ອມຊຶມມະຕິກອງປະຊຸມໃຫຍ່ ຄັ້ງທີ XI ຂອງພັກ ເຊິ່ງການຈັດຕັ້ງປະຕິບັດວຽກງານໄລຍະຜ່ານມາ ໄດ້ປະເຊີນໜ້າກັບຫຼາຍຂໍ້ຫຍຸ້ງຍາກ ແລະ ສິ່ງທ້າທາຍຫຼາຍດ້ານ ເປັນຕົ້ນແມ່ນບັນຫາການແຜ່ລະບາດຂອງພະຍາດໂຄວິດ -19 ໄດ້ສົ່ງຜົນກະທົບໂດຍກົງ ແລະ ທາງອ້ອມ ເກີດມີຄວາມຫຍຸ້ງຍາກທາງດ້ານເສດຖະກິດ-ການເງິນ ປາກົດການຫຍໍ້ທໍ້ ໄພວ່າງງານ ບັນຫາຢາເສບຕິດ ແລະ ອື່ນໆ ແນວໃດກໍຕາມ ກໍໄດ້ມີຄວາມພະຍາຍາມເອົາໃຈໃສ່ຊີ້ນໍາ-ນໍາພາ ແກ້ໄຂບັນຫາໃນດ້ານຕ່າງໆດ້ວຍຄວາມຮັບຜິດຊອບສູງ ແລະ ເປັນເຈົ້າການເພຶ່ອເຮັດໃຫ້ເສດຖະກິດຂອງແຂວງສາມາດຟື້ນຕົວໄດ້ ພ້ອມກັນນັ້ນ ກໍໄດ້ສືບຕໍ່ແກ້ໄຂຂອດຂັ້ນຕ່າງໆໃນການສົ່ງເສີມການລົງທຶນຂອງພາກເອກະຊົນທັງພາຍໃນ ແລະ ຕ່າງປະເທດ ຕິດພັນກັບການຜັນຂະຫຍາຍນະໂຍບາຍຕ່າງໆ ເພຶ່ອຍູ້ແຮງເສດຖະກິດຂອງແຂວງໃຫ້ມີການຂະຫຍາຍຕົວຢ່າງຕໍ່ເນື່ອງ ປີ 2021 ອັດຕາການເຕີບໂຕເສດຖະກິດພາຍໃນແຂວງ ລວມຍອດຜະລິດຕະພັນພາຍໃນ (GPP) ໄດ້ 6.670 ກວ່າຕື້ກີບ ອັດຕາການຂະຫຍາຍຕົວປະມານ 4,7 % ສະເລ່ຍຕໍ່ຫົວຄົນ 20 ລ້ານກວ່າກີບ ໃນນີ້ ຂະແໜງກະສິກໍາ-ປ່າໄມ້ຂະຫຍາຍຕົວ 12,8 % ກວມ 34 % ຂະແໜງອຸດສະຫະກໍາ-ກໍ່ສ້າງຂະຫຍາຍຕົວ 4,92% ກວມ 44 % ແລະ ຂະແໜງການບໍລິການຫຼຸດລົງ -4,49 % ກວມ 22 %.
ໂອກາດດັ່ງກ່າວ ທ່ານ ປອ ນາງ ສູນທອນ ໄຊຍະຈັກ ໄດ້ສະແດງຄວາມຍ້ອງຍໍຊົມເຊີຍມາຍັງຄະນະພັກແຕ່ລະຂັ້ນ ທີ່ໄດ້ເອົາໃຈໃສ່ຈັດຕັ້ງປະຕິບັດວຽກງານໃນດ້ານຕ່າງໆ ພ້ອມນັ້ນ ທ່ານໄດ້ຮຽກຮ້ອງມາຍັງຄະນະຮັບຜິດຊອບວຽກງານທີ່ກ່ຽວຂ້ອງ ຈົ່ງໄດ້ສືບຕໍ່ເອົາໃຈໃສ່ຈັດຕັ້ງປະຕິບັດວຽກງານທີ່ຍັງຄົງຄ້າງ ໂດຍສະເພາະແມ່ນການຊຸກຍູ້ສົ່ງເສີມການລົງທຶນຂອງພາກເອກະຊົນ ການຈັດຫາສ້າງວຽກເຮັດງານທໍາໃຫ້ກັບພໍ່ແມ່ປະຊາຊົນພາຍໃນແຂວງທີ່ໄດ້ຮັບຜົນກະທົບຈາກພະຍາດໂຄວິດ-19 ສຶບຕໍ່ເອົາໃຈໃສຕໍ່ກັບວຽກງານ ປກຊ-ປກສ ການພົວພັນຮ່ວມມືກັບຕ່າງປະເທດ ແລະ ອື່ນໆ.
ຕອນບ່າຍຂອງວັນດຽວກັນ ທ່ານຮອງປະທານສະພາແຫ່ງຊາດພ້ອມຄະນະ ໄດ້ເດີນທາງໄປສໍາຫຼວດເບິ່ງໂຄງການກໍ່ສ້າງຂົວຂ້າມແມ່ນໍ້າຂອງແຫ່ງທີ V ລາວ-ໄທ ປາກຊັນ-ບຶງການ ທີ່ບ້ານກ້ວຍອຸດົມ ເມືອງປາກຊັນ ປັດຈຸບັນ ການກໍ່ສ້າງຂົວຂ້າມນ້ຳຂອງແຫ່ງດັ່ງກ່າວມີຄວາມຄືບໜ້າ 25,76 % ຂອງບັນດາໜ້າວຽກທັງໝົດ ແລະ ລື່ນແຜນການ 4,66 % ຈາກນັ້ນ ກໍໄດ້ລົງພົບປະຢ້ຽມຢາມພໍ່ແມ່ປະຊາຊົນບ້ານຫາງຊິງສະຫວ່າງ ເພື່ອຢ້ຽມຊົມການປູກຜັກເຮືອນຮົ່ມເປັນສິນຄ້າຂອງປະຊາຊົນ ໂຄງການພັດທະນາບ້ານແບບໃໝ່ແຊມາອຶນອຸນດົງ ສ.ເກົາຫຼີ ປະຈຳ ສປປ ລາວ ທີ່ໄດ້ໃຫ້ທຶນສະໜັບສະໜູນ.
# ຂ່າວ-ພາບ : ສະພາແຫ່ງຊາດ