ເລື່ອງທີ່ເລືອກສັນມາໃຫ້ອ່ານໃນບົດນີ້ ລວມມີຂ່າວກ່ຽວກັບຫົວຄິດລິເລີ່ມຂອງຮ້ານອາຫານຢູ່ສິງກະໂປ ໃນການຊຸກຍູ້ໃຫ້ລູກຄ້າງົດການໃຊ້ໂທລະສັບມືຖືເວລາຮັບປະທານອາຫານ ແລະ ເລື່ອງຂີ້ເຫຍື້ອເອເລັກໂຕຣນິກຢູ່ຫວຽດນາມ.
ທີ່ ສິງກະໂປ: ມີເລື່ອງລາວເກົ່າໆ ແຕ່ມີປະໂຫຍດມະຫາສານຈາກປະເທດສິງກະໂປ ກ່ຽວກັບຂໍ້ລິເລີ່ມຂອງບາງກຸ່ມຮ້ານອາຫານໃນການຊັກຊວນໃຫ້ລູກຄ້າເວັ້ນການໃຊ້ໂທລະສັບມືຖືເວລາຮ່ວມໂຕະອາຫານນຳກັນ ກຸ່ມຮ້ານອາຫານເຫຼົ່ານີ້ຖືວ່າເວລາຮັບປະທານອາຫານຮ່ວມກັນນັ້ນ ທຸກຄົນຄວນເອົາໃຈໃສ່ເລື່ອງມະນຸດສຳພັນ ຕ້ອງເບິ່ງໜ້າ ເວົ້າຈາທັກທາຍກັນເພື່ອສ້າງບັນຍາກາດ ບໍ່ແມ່ນແຕ່ລະຄົນມີຕາຍແຕ່ເບິ່ງໜ້າຈໍ ຈົນປ່ອນອາຫານເກືອບບໍ່ຖືກປາກ ເພາະມົວແຕ່ຈ້ອງຕາໃສ່ໜ້າຈໍ ບໍ່ສົນນຳຜູ້ຮ່ວມໂຕະ ບໍ່ສົນນຳລົດຊາດອາຫານ.
ຄຳຂວັນຊັກຊວນຂອງກຸ່ມຮ້ານອາຫານທີ່ວ່ານີ້ແມ່ນ ຈົ່ງມ້ຽນໂທລະສັບມືຖື-ເຄື່ອງສື່ສານເອເລັກໂຕຣນິກຂອງທ່ານໄວ້ກ່ອນ ແລ້ວຫັນມາສົນໃຈຜູ້ຮ່ວມໂຕະອາຫານຂອງທ່ານ ຖ້າຫຍໍ້ເປັນຄຳເວົ້າສັ້ນໆກໍແມ່ນ “ກິນເຂົ້າເຊົາໃຊ້ !” (ໝາຍຄວາມວ່າເຊົາໃຊ້ໂທລະສັບຫັ້ນລະ) ຮ້ານອາຫານທີ່ລິເລີ່ມຄຳຂວັນ “ ກິນເຂົ້າເຊົາໃຊ້ ” ນີ້ມີຊື່ວ່າ ເດິ ແມນແຮດເຕິນ ຟິດ ມາກເກັດ (Manhattan Fish Market) ບວກກັບອີກຢ່າງໜ້ອຍ 13 ຮ້ານກາເຟ.
ຂ່າວບອກວ່າ: ສຳລັບຢູ່ຮ້ານອາຫານ ແມນແຮດເຕິນ ເຊິ່ງມີແຂກຕອມບໍ່ຂາດສາຍນັ້ນ ທາງຮ້ານໄດ້ຈັດໃຫ້ມີແອບມ້ຽນໂທລະສັບມືຖືຂອງແຂກຢູ່ແຕ່ລະໂຕະ ພ້ອມດ້ວຍປະໂຫຍກຄຳເວົ້າຊັກຊວນໃຫ້ແຂກປິດສຽງ ຂວ້ຳໜ້າໂທລະສັບໄວ້ໃນແອບຕະຫຼອດເວລາຮັບປະທານອາຫານ ບໍ່ພຽງແຕ່ເທົ່ານັ້ນ ຢູ່ແຕ່ລະໂຕະກໍຍັງມີບັນດາຫົວຂໍ້ທີ່ໜ້າສົນໃຈສຳລັບໃຫ້ບັນດາແຂກສາມາດເລືອກມາສົນທະນາກັນ.
ພິເສດສຸດໆໄປກວ່ານັ້ນ ທາງຮ້ານກໍຍັງມີປີ້ລາງວັນມີມູນຄ່າເປັນເງິນ 5 ໂດລາສິງກະໂປ ເພື່ອຮັບປະທານອາຫານສຳລັບແຂກທີ່ມ້ຽນໂທລະສັບໄວ້ໃນແອບຕະຫຼອດໄລຍະຮັບປະທານອາຫານໂດຍບໍ່ຍອມເປີດເບິ່ງໂທລະສັບເລີຍ ໃນຂະນະທີ່ຂໍ້ລິເລີ່ມນີ້ກາຍເປັນຂ່າວດັງເມື່ອ 6 ປີຜ່ານມານັ້ນ ທາງຮ້ານອາຫານ ແມນແຮດເຕິນ ໄດ້ມີແອບມ້ຽນໂທລະສັບ ຈຳນວນ 10.000 ໜ່ວຍ ເພື່ອຢາຍຢູ່ໜ້າໂຕະຂອງຮ້ານ ແລະ ສາຂາຮ້ານອີກ 16 ແຫ່ງໃນທົ່ວສິງກະໂປ.
ທີ່ ຫວຽດນາມ: ໃນປັດຈຸບັນ ທຸກໆປະເທດໃນໂລກພວມປະເຊີນກັບບັນຫາຂີ້ເຫຍື້ອລົ້ນປະເທດ ລາມໄປເປັນຂີ້ເຫຍື້ອລົ້ນໂລກ ມາດຕະການຈຳກັດ ແລະ ກຳຈັດຂີ້ເຫຍື້ອຂອງແຕ່ລະປະເທດນັ້ນ ລ້ວນແຕ່ສຸມໃສ່ປະເພດຂີ້ເຫຍື້ອຜະລິດຕະພັນທີ່ເຮັດດ້ວຍຢາງ ຫຼື ປຼັສຕິກທີ່ໃຊ້ເທື່ອດຽວແລ້ວຖິ້ມ ເຊັ່ນ: ຖົງຢາງໃສ່ເຄື່ອງ ຈານ ຈອກ ສ້ອມ ບ່ວງ ທໍ່ດູດ ທີ່ເຮັດດ້ວຍຢາງ.
ແຕ່ກໍມີປະເພດຂີ້ເຫຍື້ອອີກປະເພດໜຶ່ງ ເຊິ່ງເຖິງວ່າບໍ່ທັນລົ້ນເມືອງ ແຕ່ເປັນໄພອັນຕະລາຍສຸດໆຕໍ່ສິ່ງແວດລ້ອມ ແລະ ສຸຂະພາບຂອງຄົນເຮົານັ້ນ ກໍຄື ຂີ້ເຫຍື້ອເອເລັກໂຕຣນິກ ຢູ່ຫວຽດນາມ ທາງການກໍໄດ້ປະກາດຫ້າມນຳເຂົ້າເຄື່ອງໃຊ້ໄອທີປະເພດມືສອງຈາກຕ່າງປະເທດຢ່າງເດັດຂາດ ນັບແຕ່ວັນທີ 15 ທັນວາ ປີ 2015 ເປັນຕົ້ນມາ ຜະລິດຕະພັນທີ່ເຄື່ອງມືດ້ານໄອທີມືສອງທີ່ຫ້າມນຳເຂົ້ານັ້ນລວມມີ ໜ່ວຍຄອມພິວເຕີຕັ້ງຕັກ ແທັບເລັດ ໂທລະສັບມືຖື ເຄື່ອງຂະຫຍາຍສຽງ ແຟຼດດິສ ລວມທັງຊິ້ນສ່ວນປະກອບຂອງຜະລິດຕະພັນເຫຼົ່ານີ້ດ້ວຍ ນີ້ແມ່ນສ່ວນໜຶ່ງໃນການປ້ອງກັນຂີ້ເຫຍື້ອເອເລັກ ໂຕຣນິກພາຍໃນປະເທດ ເພາະເຄື່ອງມືສອງເຫຼົ່ານີ້ບໍ່ດົນກໍຈະກາຍເປັນຂີ້ເຫຍື້ອນັ້ນເອງ.