ການແຂ່ງຂັນກີລາລາຍການຕ່າງໆໃນງານກີລາໂອແລມປິກລະດູໜາວ ຄັ້ງທີ 24 ທີ່ປັກກິ່ງ ສປ ຈີນ ພວມດຳເນີນໄປຢ່າງຂຸ້ນຂ້ຽວ ໃນຖານະເປັນມະໂຫລານດ້ານກີລາ ເຊິ່ງໄດ້ດຶງດູດຄວາມສົນໃຈຈາກມວນຊົນທົ່ວໂລກ ຍ້ອນການຈັດງານແມ່ນໄດ້ໃຊ້ວິທະຍາສາດເຕັກນິກຂັ້ນສູງຫຼາຍຢ່າງ.
ໃນງານກີລາໂອແລມປິກລະດູໜາວ ປັກກິ່ງ ຄັ້ງນີ້ ມວນຊົນທັງຫຼາຍສາມາດຮັບຊົມລີລາ ແລະ ຄວາມໄວຂອງກີລາຫິມະ ແລະ ນ້ຳກ້ອນລາຍການຕ່າງໆໄດ້ຢ່າງສົມໃຈ ຜ່ານການຖ່າຍທອດສົດ ລວມທັງຄວາມກະຕືລືລົ້ນ ແລະ ມິດຕະພາບ ລະຫວ່າງນັກກີລາດ້ວຍກັນ ນອກນີ້ ງານດັ່ງກ່າວຍັງໄດ້ນຳໃຊ້ວິທະຍາສາດເຕັກນິກຂັ້ນສູງ ແລະ ໃໝ່ຫຼາຍຢ່າງ ໂດຍປະຕິບັດຕາມແນວຄວາມຄິດການຈັດງານໂອແລມປິກຕາມທິດສີຂຽວ ແລະ ກາກບອນຕ່ຳ ໃນຂະນະທີ່ຈັດງານໂອແລມປິກລະດູໜາວໃຫ້ດີ ຍັງເຮັດໃຫ້ງານກີລາໂອແລມປິກຄັ້ງນີ້ກາຍເປັນງານວາງສະແດງດ້ານວິທະຍາສາດເຕັກນິກຂັ້ນສູງ ແລະ ໃໝ່ອີກດ້ວຍ.
ທວນໄຟສຳລັບງານກີລາໂອແລມປິກລະດູໜາວ ປັກກິ່ງ ເປັນທວນໄຟທີ່ໃຊ້ເຊື້ອໄຟຮີໂດຣແຊນເປັນຄັ້ງທຳອິດໃນປະຫວັດສາດຂອງງານກີລາໂອແລມປິກລະດູໜາວ ວິທະຍາສາດເຕັກນິກການບິນອະວະກາດຈີນ ໄດ້ຊ່ວຍແກ້ໄຂບັນຫາຫຍຸ້ງຍາກໃນການນຳໃຊ້ເຊື້ອໄຟຮີໂດຣແຊນ ເຊັ່ນ: ບໍ່ໃຫ້ມັນລະເບີດ ຮົ່ວໄຫຼ ແລະ ຄວບຄຸມຍາກ ເຊິ່ງໄດ້ບັນລຸເປົ້າໝາຍການນຳໃຊ້ທວນໄຟທີ່ລະບາຍກາກບອນດິອັອກຊິດເປັນຄັ້ງທຳອິດໃນປະຫວັດສາດງານກີລາໂອແລມປິກລະດູໜາວ.
ບໍ່ວ່າຈະຢູ່ສະໜາມແຂ່ງຂັນ ຫຼື ເຮືອນພັກນັກກີລາ ຫຸ່ນຍົນອັດສະລິຍະຈະປາກົດໃຫ້ເຫັນຢູ່ເລື້ອຍໆ ພວກມັນໄດ້ແລ່ນໄປ-ມາຢູ່ຫົນທາງທຸກສາຍ ອະນາໄມຄວາມສະອາດ ຂ້າເຊື້ອ ປຸງແຕ່ງອາຫານ ສົ່ງອາຫານ ແລະ ອື່ນໆ ໃນຫ້ອງອາຫານສຳລັບນັກກີລາໂອແລມປິກລະດູໜາວປັກກິ່ງ ມີລະບົບບໍລິການສັ່ງອາຫານແບບອັດຕະໂນມັດຕະຫຼອດ 24 ຊົ່ວໂມງ ອຸປະກອນປຸງແຕ່ງອາຫານແບບອັດຕະໂນມັດ ສາມາດປຸງແຕ່ງອາຫານໄດ້ 10 ກວ່າຊະນິດ ເຊັ່ນ: ແຮມເບີເກີ ຂະໜົມກ້ຽວ ຂົ້ວຜັກ ສ່ວນອາຫານທີ່ປຸງແຕ່ງຮຽບຮ້ອຍແລ້ວ ຈະຜ່ານຈາກ “ລະບົບຂົນສົ່ງເທິງເພດານ” ສົ່ງໄປເຖິງໜ້າໂຕະຂອງຜູ້ສັ່ງອາຫານ ນອກນີ້ ຫຸ່ນຍົນຍັງສາມາດປຸງແຕ່ງເຫຼົ້າຄັອກເທວ ເຮັດໃຫ້ໄດ້ຮັບຄວາມສົນໃຈຈາກບັນດານັກກີລາ ເຊິ່ງທ້າວ ວິນລຽມ ດາວກລາສ ຊາວເນັດອັງກິດ ກ່າວວ່າ: ຫຸ່ນຍົນໂຕນີ້ ມັນທັງໜ້າຮັກ ທັງສະຫຼາດ ໂດຍສະເພາະໃນຍາມເຮັດເຫຼົ້າຄອກເທວ.
ສະໜາມແຂ່ງຂັນກີລາຂອງງານກີລາໂອແລມປິກລະດູໜາວ ປັກກິ່ງ ໄດ້ນຳໃຊ້ວິທະຍາສາດຂັ້ນສູງ ແລະ ໃໝ່ຫຼາຍຢ່າງ ເຊັ່ນ: ເຕັກນິກເຮັດນ້ຳກ້ອນດ້ວຍກາກບອນດິອັອກຊິດໂດຍກົງ ຢູ່ສະໜາມແຂ່ງຂັນກີລາສະເກັດຄວາມໄວແຫ່ງຊາດຈີນ ໂດຍໃຊ້ວິທີການວາງເຫຼັກສະແຕນເລດຢູ່ໃຕ້ພື້ນນ້ຳກ້ອນ ເຮັດໃຫ້ອຸນຫະພູມຂອງໜ້ານ້ຳກ້ອນບໍ່ຫຼຸດ-ລື່ນ 0,5 ອົງສາ ເຊິ່ງໄດ້ກາຍເປັນນ້ຳກ້ອນທີ່ສົມບູນທີ່ສຸດ ແລະ ສະໝ່ຳສະເໝີທີ່ສຸດ ສະໜາມກີລາລອຍນ້ຳ “ຮູບຈະຕຸລັດ” ຖືກດັດແປງໃຫ້ເປັນສະໜາມກີລາ “ນ້ຳກ້ອນຈະຕຸລັດ” ເຮັດໃຫ້ສະໜາມກີລາລອຍນ້ຳແຫ່ງຊາດຈີນ ກາຍເປັນສະໜາມກີລານ້ຳກ້ອນແຫ່ງຊາດຈີນ ແລະ ຍັງສາມາດດັດແປງໃຫ້ເປັນສະໜາມກີລາລອຍນ້ຳຄືນໃໝ່ໄດ້ອີກ ດ້ວຍການນຳໃຊ້ເຕັກນິກຂັ້ນສູງ ແລະ ໃໝ່ ເຊິ່ງແມ່ນແບບຢ່າງທີ່ດີເດັ່ນຂອງຈີນ ໃນການນຳໃຊ້ສະໜາມກີລາໂອແລມປິກແບບຍືນຍົງ “ລານສະກີໂດດທີ່ສວນໂສກ່າງ” ທີ່ສ້າງຂຶ້ນຢູ່ໂຮງງານຜະລິດເຫຼັກ ແລະ ເຫຼັກກ້າຮ້າງ ໂສກ່າງ ໃນນະຄອນຫຼວງປັກກິ່ງ ໄດ້ນຳໃຊ້ເຫຼັກກ້າແບບໃໝ່ທີ່ທົນຕໍ່ຄວາມໜາວ ແລະ ການກັດເຊາະຈາກສານລະລາຍຫິມະໄດ້ເປັນຢ່າງດີ ທີ່ຖືກຄົ້ນຄວ້າຜະລິດອອກມາໃໝ່ ທັງມີຄວາມປອດໄພ ທັງເປັນມິດຕໍ່ສິ່ງແວດລ້ອມ “ໜັງສືພິມເວທີປຶກສາຫາລືຊີກາໂກ” ຂອງ ສ ອາເມຣິກາ ສະບັບວັນທີ 7 ກຸມພາ 2022 ໄດ້ລົງພິມບົດຄວາມວ່າ: “ຢູ່ນະຄອນຫຼວງປັກກິ່ງ ໂຮງງານຜະລິດເຫຼັກກ້າຮ້າງແຫ່ງໜຶ່ງ ໄດ້ນຳໃຊ້ “ທໍ່ຄວັນຮ້າງໄດ້ຢ່າງອັດສະຈັນ” ສົ່ງນັກກີລາສະກີ ສະແດງລີລາຢູ່ກາງເວຫາ ເພື່ອສະທ້ອນໃຫ້ເຫັນການຍ້ອງຍໍສັນລະເສີນລານສະກີໂດດທີ່ມີເອກະລັກພິເສດຢູ່ສວນໂສກ່າງ.
ນອກນີ້ ການນຳໃຊ້ເຕັກນິກຂັ້ນສູງ ແລະ ໃໝ່ຫຼາຍຢ່າງ ໃນການຊຳລະຂີ້ເຫຍື້ອ ແລະ ນ້ຳເປື້ອນໃນງານກີລາໂອແລມປິກລະດູໜາວຄັ້ງນີ້ ຍັງມີເຕັກນິກທີ່ນຳໃຊ້ພະລັງງານສີຂຽວ ແລະ ພາຫະນະດ້ານຄົມມະນາຄົມທີ່ປ່ອຍກາກບອນຕ່ຳ ເຮັດໃຫ້ງານກີລາໂອແລມປິກຄັ້ງນີ້ ເປັນງານກີລາໂອລິມປິກລະດູໜາວທີ່ “ເປັນມິດຕໍ່ສິ່ງແວດລ້ອມທີ່ສຸດ” ໃນປະຫວັດສາດງານກີລາໂອລິມປິກລະດູໜາວ ງານມະໂຫລານດ້ານກີລາຄັ້ງນີ້ ເປັນການໂຮມສູນວາງສະແດງ ແລະ ນຳໃຊ້ວິທະຍາສາດເຕັກນິກຂັ້ນສູງ ແລະ ໃໝ່ຂອງຈີນ ສະ ຈິ່ງຖືໄດ້ວ່າເປັນ “ງານວາງສະແດງດ້ານວິທະຍາສາດເຕັກນິກ” ທີ່ແທ້ຈິງຄັ້ງໜຶ່ງ.
# ສະບາໄພ