ວັນທີ 5 ກຸມພາ 2022 ຜ່ານມາ ໜ່ວຍພັກຫ້ອງການກະສິກໍາ ແລະ ປ່າໄມ້ເມືອງຫົງສາ ແຂວງໄຊຍະບູລີ ຈັດກອງປະຊຸມ ປະເມີນຜົນການກໍ່ສ້າງໜ່ວຍພັກປອດໃສ ເຂັ້ມແຂງ ໜັກແໜ້ນ ປະຈຳປີ 2021 ແລະ ທິດທາງແຜນການປະຈຳປີ 2022 ໂດຍການເປັນປະທານຂອງສະຫາຍ ພູວົງ ກອງຊັບ ຄະນະພັກເມືອງ ເລຂາໜ່ວຍພັກ ຫ້ອງການກະສິກໍາ ແລະ ປ່າໄມ້ ເມືອງຫົງສາ ມີສະຫາຍ ຈັນເພັງ ອູ່ທອງຄໍາ ຄະນະປະຈໍາພັກເມືອງ ຮອງເຈົ້າເມືອງ ຜູ້ຊີ້ນໍາວຽກງານຂົງເຂດເສດຖະກິດ ພ້ອມທີມງານຂອງເມືອງ ຄະນະພັກ ສະມາຊິກພັກ ແລະ ພະນັກງານຫ້ອງການດັ່ງກ່າວເຂົ້າຮ່ວມ.
ສະຫາຍ ພູວົງ ກອງຊັບ ໄດ້ກ່າວເປີດກອງປະຊຸມ ພ້ອມທັງຜ່ານບົດສະຫຼຸບຕີລາຄາການເຄື່ອນໄຫວຈັດຕັ້ງປະຕິບັດໜ້າທີ່ການເມືອງໄລຍະ 1 ປີຜ່ານມາ ໜ່ວຍພັກຫ້ອງການກະສິກໍາ ແລະ ປ່າໄມ້ ເປັນໜ່ວຍພັກຮາກຖານໜຶ່ງ ມີພາລະບົດບາດສຶກສາອົບຮົມການເມືອງ-ແນວຄິດໃຫ້ສະມາຊິກພັກ ພະນັກງານລັດຖະ ກອນ ແລະ ຈັດຕັ້ງປະຕິບັດ ຄົ້ນຄ້ວາເຊື່ອມຊຶມແນວທາງນະໂຍບາຍ ກົດລະບຽບພັກ ກົດໝາຍ ແລະ ລະບຽບການຕ່າງໆຂອງລັດ ຫັນມະຕິ ຄຳສັ່ງ ຂອງຄະນະພັກຂັ້ນເທິງມາເປັນແຜນການ ໂຄງການລະອຽດໜ່ວຍພັກມີຄະນະໜ່ວຍພັກ 3 ສະຫາຍ ມີສະມາຊິກພັກທັງໝົດ 40 ສະຫາຍ ຍິງ 10 ສະຫາຍ ສະມາຊິກພັກສໍາຮອງ 2 ສະຫາຍ ຍິງ 1 ສະຫາຍ ຂອບເຂດຄວາມຮັບຜິດຊອບກວມເອົາ 7 ໜ່ວຍງານ 1 ສະຖານີ ໄດ້ນຳເອົາແນວທາງ ແຜນນະໂຍບາຍ ມະຕິ ຄຳສັ່ງ ລະບຽບຂອງພັກ ກົດໝາຍ ລະບຽບການຕ່າງໆໃນຂົງເຂດກະສິກໍາ ແລະ ປ່າໄມ້ ມະຕິຂອງຄະນະພັກຂັ້ນເທີິງຫັນມາເປັນທິດທາງ ແຜນການລະອຽດຂອງຕົນສະແດງອອກໄດ້ກຳນົດແຜນການປູກເຂົ້າທັງໝົດ 2.605,08 ເຮັກຕາ ປະຕິ ບັດໄດ້ 2.674,49 ເຮັກຕາ ຜົນຜະລິດໄດ້ 9.054,56 ໂຕນ ເທົ່າກັບ102,66% ການປູກພືດລະດູແລ້ງ ສາມາດປະຕິບັດໄດ້ 820,35 ເຮັກຕາ ທຽບໃສ່ແຜນການປະຕິບັດໄດ້ 71,96% ການປູກພືດລະດູຝົນ ປະຕິບັດໄດ້ 4.497,84 ເຮັກຕາ ມີຊົນລະປະທານ 3 ແຫ່ງ ມູນຄ່າ 995 ລ້ານກ່ວາກີບ ທົ່ວເມືອງ ມີສວນກ້າ 3 ແຫ່ງ ຜະລິດເບ້ຍໄມ້ໄດ້ 197.448 ເບ້ຍ ທຽບໃສ່ແຜນແມ່ນ 78,98% ປູກໄມ້ທັງໝົດໄດ້ 192,4 ເຮັກຕາ ເທົ່າກັບ 64,13% ແຜນການ ມີກອງທືນພັດທະນາບ້ານທັງໝົດ 37 ກອງທຶນ ມີສະມາຊິກ 5.417 ຄົນ ມີເງິນຝາກຈຳນວນ 25,63 ຕື້ກ່ວາກີບ ລວມທຶນທັງໝົດ 25,9 ຕື້ກ່ວາກີບ ( ໃນນີ້ທາງພາກລັດຮັບຜິດຊອບມີຈໍານວນ 17 ກອງທຶນ ).
ຜ່ານການປະເມີນຕີລາຄາແບ່ງປະເພດໜ່ວຍພັກຕາມ 5 ດ້ານ ໄດ້ປະເພດໜ່ວຍພັກປອດໃສ ເຂັ້ມ ແຂງ ໜັກແໜ້ນ.
..# ຂ່າວ & ພາບ : ບຸນມີ