ກອງປະຊຸມການຈັດຕັ້ງກົນໄກການປະສານງານເພື່ອຄຸ້ມຄອງຕົວເມືອງ (Urban management Platform) (UMP) ຄັ້ງທີ 1 ໄດ້ຈັດຂຶ້ນວັນທີ 2 ກຸມພາ 2022 ຜ່ານມາ ໃນຮູບແບບປະຊຸມທາງໄກ ໂດຍໂດຍການເປັນປະທານຂອງທ່ານ ຮສ ປອ ອະພິໄຊຍະເດດ ອິນສີຊຽງໃໝ່ ຮອງຫົວໜ້າສະຖາບັນຄົ້ນຄວ້າ ໂຍທາທິການ ແລະ ຂົນສົ່ງ (ຍທຂ) ທ່ານ ນະລົງໄຊ ມີວາປະດິດ ຮອງຫົວໜ້າກົມເຄຫາ ແລະ ຜັງເມືອງ ກະຊວງ ຍທຂ ມີຕົວແທນຈາກກະຊວງ ກົມ ພະແນກການຂະແໜງການທີ່ກ່ຽວຂ້ອງ ເຂົ້າຮ່ວມ.
ທ່ານ ຮສ ປອ ອະພິໄຊຍະເດດ ອິນສີຊຽງໃໝ່ ໄດ້ກ່າວຈຸດປະສົງ ແລະ ກໍານົດໝາຍການຈັດຕັ້ງກົນໄກການປະສານງານເພື່ອການຄຸ້ມຄອງຕົວເມືອງ ແມ່ນການເປີດການເຊື່ອມຕໍ່ຜູ້ທີ່ມີສ່ວນກ່ຽວຂ້ອງຕ່າງໆໃນການພັດທະຕົວເມືອງ ໂດຍຍົກໃຫ້ເຫັນກົນໄກການປະສານງານເພື່ອຄຸ້ມຄອງຕົວເມືອງ UMP ເປັນກົນໄກການປຶກສາຫາລື ແລະ ແລກປ່ຽນຂໍ້ມູນຂ່າວສານກ່ຽວກັບນະໂຍບາຍ ແລະ ບັນຫາຂອງການພັດທະນາຕົວເມືອງໃນທົ່ວຂະແໜງການ ກອງປະຊຸມ UMP (Urban management Platform) ນຳພາໂດຍ ກະຊວງໂຍທາທິການແລະຂົນສົ່ງ (MPWT) ແລະ ບໍລິຫານໂດຍຄະນະປະຕິບັດງານກ່ຽວກັບໂຄງການ JICA ສໍາລັບ “ການພັດທະນາສ້າງຂີດຄວາມສາມາດໃນການຄວບຄຸມ ແລະ ສົ່ງເສີມການພັດທະນາຕົວເມືອງ” ໂດຍມີການຮ່ວມມືຂອງພະແນກການຕ່າງໆຈາກນະຄອນຫຼວງວຽງຈັນ ກະຊວງການເງີນ ກະຊວງແຜນການ ແລະ ການລົງທືນ ແລະ ກະຊວງຊັບພະຍາກອນທຳມະຊາດ ແລະ ສີ່ງແວດລ້ອມ.
ກອງປະຊຸມຄັ້ງນີ້ ໄດ້ພ້ອມກັນຄົ້ນຄວ້າປຶກສາຫາລືຫຼາຍບັນຫາ ພ້ອມທັງໄດ້ຮັບຝັງການນຳສະເໜີຫຼາຍ ຫົວຂໍ້ຈາກພາກສ່ວນກ່ຽວຂ້ອງ ເພື່ອພ້ອມກັນຄົ້ນຄວ້າ ພິຈາລະນາ ສ້າງຄວາມເປັນເອກະພາບໃນການ ຈັດຕັ້ງປະຕິບັດ ເພື່ອໃຫ້ໄດ້ປະສິດທີ່ຜົນຕາມຄາດໝາຍທີ່ວາງໄວ້.
..# ຂ່າວ & ພາບ : ບຸນມີ