ກົມສົ່ງເສີມວິສາຫະກິດຂະໜາດນ້ອຍ ແລະ ກາງ ກະຊວງອຸດສາຫະກຳ ແລະ ການຄ້າ ໄດ້ຈັດກອງປະຊຸມທາບທາມເປີດກວ້າງຂັ້ນສູນກາງ ເພື່ອລະດົມຄຳເຫັນຕໍ່ຮ່າງກົດໝາຍວ່າດ້ວຍການສົ່ງເສີມຈຸນລະວິສາຫະກິດ ວິສາຫະກິດຂະໜາດນ້ອຍ ແລະ ກາງ (ຈວນກ) ສະບັບປັບປຸງ ຈັດຂຶ້ນວັນທີ 25 ມັງກອນ 2022 ຢູ່ໂຮງແຮມຄຣາວພລາຊາ ໂດຍການເປັນປະທານຂອງທ່ານ ບຸນເຖິງ ດວງສະຫວັນ ຮອງລັດຖະມົນຕີກະຊວງອຸດສາຫະກຳ ແລະ ການຄ້າ ຫົວໜ້າຄະນະຮັບຜິດຊອບປັບປຸງກົດໝາຍ ພ້ອມດ້ວຍຜູ້ເຂົ້າຮ່ວມຈາກຄະນະປັບປຸງກົດໝາຍຂັ້ນສູນກາງ ຜູ້ຕາງໜ້າຈາກບັນດາກະຊວງ ຂະແໜງການທີ່ກ່ຽວຂ້ອງ ທັງພາກລັດ ພາກທຸລະກິດ ແລະ ອົງການຈັດຕັ້ງສາກົນປະຈຳ ສປປ ລາວ ລວມທັງໝົດ 60 ທ່ານ.
![](https://v2.vientianemai.net/wp-content/uploads/2022/01/received_467478764958567-1024x683.jpeg)
ກອງປະຊຸມທາບທາມໃນຄັ້ງນີ້ ເພື່ອຮັບຟັງບັນດາຄຳຄິດເຫັນຈາກຂະແໜງການທີ່ກ່ຽວຂ້ອງ ທັງພາກລັດ ພາກທຸລະກິດ ແລະ ອົງການຈັດຕັ້ງສາກົນ ຕໍ່ເນື້ອໃນຂອງຮ່າງກົດໝາຍສະບັບປັບປຸງ ແນໃສ່ເຮັດໃຫ້ເນື້ອໃນຂອງຮ່າງກົດໝາຍສະບັບດັ່ງກ່າວມີຄວາມຄົບຖ້ວນ ສົມບູນ ຮັບປະກັນໄດ້ຕໍ່ກັບການສົ່ງເສີມ ຈວນກ ໃນສະພາບການພັດທະນາເສດຖະກິດສັງຄົມໃນປັດຈຸບັນ ແລະ ຕໍ່ໜ້າ ເພື່ອເຮັດໃຫ້ ຈວນກ ມີຄວາມເຂັ້ມແຂງ ແລະ ສາມາດເຊື່ອມໂຍງກັບພາກພື້ນ ແລະ ສາກົນ.
![](https://v2.vientianemai.net/wp-content/uploads/2022/01/received_941492986740841-1024x683.jpeg)
ທ່ານ ບຸນເຖິງ ດວງສະຫວັນ ໄດ້ໃຫ້ຮູ້ວ່າ: ກົດໝາຍວ່າດ້ວຍການສົ່ງເສີມວິສາຫະກິດຂະໜາດນ້ອຍ ແລະ ກາງ ສະບັບເລກທີ 11/ສພຊ ລົງວັນທີ 21 ທັນວາ 2011 ໄດ້ຮັບການສ້າງຂຶ້ນເພື່ອກຳນົດຫຼັກການ ລະບຽບການ ລວມເຖິງການຈັດຕັ້ງ ແລະ ການເຄື່ອນໄຫວໃນວຽກງານສົ່ງເສີມ SME ແນໃສ່ຍົກລະດັບການສົ່ງເສີມ SME ຢູ່ປະເທດເຮົາໃຫ້ມີລັກສະນະຈຸດສຸມ ເປັນລະບົບ ເພື່ອເຮັດໃຫ້ SME ມີຄວາມເຂັ້ມແຂງ ແລະ ເຕີບໃຫຍ່ຂະຫຍາຍຕົວ ສ້າງວຽກເຮັດງານທຳ ສ້າງລາຍຮັບ ແລະ ຍົກລະດັບຊີວິດການເປັນຢູ່ຂອງປະຊາຊົນ ປະກອບສ່ວນເຂົ້າໃນການພັດທະນາເສດຖະກິດ-ສັງຄົມແຫ່ງຊາດ ໃຫ້ຂະຫຍາຍຕົວຢ່າງໝັ້ນຄົງ ເຊິ່ງຕະຫຼອດໄລຍະ 10 ປີ ຜ່ານມາ ກົດໝາຍສະບັບດັ່ງກ່າວ ໄດ້ຖືກນຳໃຊ້ເປັນພື້ນຖານໃນການຈັດຕັ້ງປະຕິບັດວຽກງານສົ່ງເສີມວິສາຫະກິດຂະໜາດນ້ອຍ ແລະ ກາງ ຢ່າງໄດ້ຮັບຜົນດີພໍສົມຄວນ
![](https://v2.vientianemai.net/wp-content/uploads/2022/01/received_392785225950081-1024x683.jpeg)
ເຖິງແນວໃດກໍຕາມ ເພື່ອຕອບສະໜອງໃຫ້ແກ່ການສົ່ງເສີມວິສາຫະກິດຂະໜາດນ້ອຍ ແລະ ກາງ ໃນໄລຍະໃໝ່ ຈຶ່ງມີຄວາມຈຳເປັນຕ້ອງໄດ້ປັບປຸງກົດໝາຍສະບັບດັ່ງກ່າວໃຫ້ສອດຄ່ອງກັບສະພາບຄວາມເປັນຈິງຂອງການພັດທະນາວຽກງານດັ່ງກ່າວ ພ້ອມທັງຕອບສະໜອງກັບບັນດາທິດຊີ້ນຳຂອງພັກ ແລະ ລັດຖະບານ ໂດຍສະເພາະແມ່ນການຜັນຂະຫຍາຍຕໍ່ມະຕິກອງປະຊຸມໃຫຍ່ ຄັ້ງທີ XI ຂອງສູນກາງພັກ ແຜນພັດທະນາເສດຖະກິດ-ສັງຄົມ ຄັ້ງທີ IX ຂອງລັດ ເຊິ່ງກຳນົດໃນແຜນວຽກຈຸດສຸມທີ 4 ເປົ້າໝາຍທີ 1 ວ່າດ້ວຍເສດຖະກິດແຫ່ງຊາດຂະຫຍາຍຕົວຢ່າງຕໍ່ເນື່ອງ ມີຄຸນນະພາບ ໝັ້ນທ່ຽງ ແລະ ຍືນຍົງ ແລະ ການການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ ແລະ ການເງິນ.
![](https://v2.vientianemai.net/wp-content/uploads/2022/01/received_511827200370552-1024x683.jpeg)
ກອງປະຊຸມໃນຄັ້ງນີ້ ເປັນອີກໜຶ່ງກອງປະຊຸມທີ່ມີຄວາມສຳຄັນເປັນຢ່າງຍິ່ງ ໃນຂະບວນການປັບປຸງກົດໝາຍສະບັບດັ່ງກ່າວ ເນື່ອງຈາກເປັນກອງປະຊຸມເພື່ອທາບທາມຄຳຄິດຄຳເຫັນໃນຂັ້ນສູນກາງ ເຊິ່ງມີທ່ານຜູ້ຕາງໜ້າຈາກພາກສ່ວນກ່ຽວຂ້ອງ ທັງພາກລັດ ພາກທຸລະກິດ ແລະ ອົງການຈັດຕັ້ງສາກົນຕ່າງໆເຂົ້າຮ່ວມຢ່າງພ້ອມພຽງກັນ ກ່ອນໜ້ານີ້ ກະຊວງອຸດສາຫະກຳ ແລະ ການຄ້າ ໄດ້ຈັດກອງປະຊຸມລະດົມຄຳຄິດຄຳເຫັນທົ່ວປະເທດຂຶ້ນ ໃນລະຫວ່າງວັນທີ 17-18 ມັງກອນ 2022 ໂດຍຜ່ານລະບົບກອງປະຊຸມທາງໄກ.
ພາຍຫຼັງກອງປະຊຸມໃນຄັ້ງນີ້ ຄະນະປັບປຸງກົດໝາຍຈະໄດ້ດຳເນີນການປັບປຸງເນື້ອໃນຂອງຮ່າງກົດໝາຍໃຫ້ມີຄວາມຄົບຖ້ວນ ແລະ ສົມບູນ ກ່ອນນຳເຂົ້າພິຈາລະນາໃນກອງປະຊຸມລັດຖະບານ ໃນເດືອນກຸມພາ 2022 ແລະ ນຳເຂົ້າພິຈາລະນາຮັບຮອງໃນກອງປະຊຸມສະໄໝສາມັນ ເທື່ອທີ 3 ຂອງສະພາແຫ່ງຊາດ ຊຸດທີ IX ທີ່ຈະຈັດຂຶ້ນໃນກາງປີ 2022 ນີ້.
# ຂ່າວ & ພາບ : ສີພອນ