ເນື່ອງໃນໂອກາດວັນສ້າງຕັ້ງກອງທັບປະຊາຊົນລາວ ຄົບຮອບ 73 ປີ (ວັນທີ 20 ມັງກອນ 1949-20 ມັງກອນ 2022) ໄດ້ໝູນວຽນມາອີກວາລະໜຶ່ງ ການນຳພັກ-ລັດ ເມືອງຫົງສາ ແຂວງໄຊຍະບູລີ ນໍາໂດຍສະຫາຍ ນາງ ດາວວິນ ລາດຊະກິດ ຮອງເລຂາຄະນະບໍລິຫານງານພັກເມືອງຫົງສາ ພ້ອມດ້ວຍຄະນະການນໍາທຸກພາກສ່ວນຂອງເມືອງ ມີກ້ອນກຳລັງນາຍ ແລະ ພົນທະຫານ ນາຍ ແລະ ພົນຕໍາຫຼວດ ກ້ອນກຳລັງຊາວໜຸ່ມ-ເຍົາວະຊົນ ເຂົ້າຮ່ວມວາງພວງມາລາຢູ່ອານຸສາວະລີນັກຮົມນິລະນາມ ແລະ ວາງກະຕ່າດອກໄມ້ຢູ່ອານຸສາວະລີຮູບປັ້ນປະທານໄກສອນ ພົມວິຫານ ຂອງວັນທີ 21 ມັງກອນ 2022 ພ້ອມຈັດປາຖະກາຖາຢູ່ທີ່ສະໂມສອນຂອງເມືອງ ປາຖະກະຖໂດຍສະຫາຍ ຄຳຫຼ້າ ຜິວວັນນາ ກຳມະການພັກແຂວງ ເລຂາພັກເມືອງ ເຈົ້າເມືອງຫົງສາ ມີຄະນະປະຈຳພັກເມືອງ ຄະນະພັກເມືອງ ຫົວໜ້າ ຮອງຫົວໜ້າຫ້ອງການ ກອງກຳລັງ ປກຊ-ປກສ ແລະ ພະນັກງານລັດຖະກອນອ້ອມຂ້າງເມືອງ ເຂົ້າຮ່ວມ.
ໂອກາດນີ້ ສະຫາຍ ຄຳຫຼ້າ ຜິວວັນນາ ໄດ້ຍົກໃຫ້ເຫັນປະຫວັດການກຳເນີດຂອງກອງທັບປະຊາຊົນລາວ ຄວາມໝາຍຄວາມສຳຄັນ ຜົນງານໄຊຊະນະ ແລະ ການເຕີບໃຫຍ່ຂະຫຍາຍຕົວຂອງກອງທັບປະຊາຊົນລາວ ໃນໄລຍະຕໍ່ສູ້ກູ້ຊາດ ລວມທັງໄລຍະປະຕິບັດພາລະກິດປົກປັກຮັກສາ ແລະ ສ້າງສາພັດທະນາປະເທດຊາດໃນໄລຍະໃໝ່ ໂດຍພາຍໃຕ້ການນຳພາອັນປີຊາສາມາດ ແລະ ສະຫລາດສ່ອງໃສຂອງພັກປະຊາຊົນປະຕິວັດລາວ ພ້ອມຍົກໃຫ້ເຫັນປະຫວັດມູນເຊື້ອອັນສະຫງ່າງາມຂອງກອງທັບປະຊາຊົນ
ທັງນີ້ເພື່ອສຶກສາອົບຮົມສະມາຊິກພັກ ພະນັກງານ ໃຫ້ມີຈິດໃຈຮັກຊາດ ຮັກລະບອບໃໝ່ ຮັກລະບອບປະຊາທິປະໄຕ ມີນໍ້າໃຈປະຕິວັດ ມີຄວາມກະຕັນຍູຮູ້ບຸນຄຸນ ແລະ ຮໍ່າຮຽນເອົາແບບຢ່າງ ຄຸນສົມບັດສິນທຳປະຕິວັດຂອງບັນດາຜູ້ນຳ ແລະ ນັກຮົບປະຕິວັດຮຸ່ນກ່ອນ
ໃນພິທີທີ່ມີຄວາມໝາຍສຳຄັນໃນຄັ້ງນີ້ ຍັງໄດ້ຈັດພິທີມອບໃບຍ້ອງຍໍ ແລະ ໃບຊົມເຊີຍໃຫ້ບຸກຄົນ ແລະ ຫ້ອງການທີ່ມີຜົນງານປະກອບສ່ວນເຂົ້າໃນການກໍ່ສ້າງສະໂມສອນຂອງກອງບັນຊາການທະຫານເມືອງຫົງສາ ແລະ ມອບຂອງຂວັນເນື່ອງໃນໂອກາດວັນສ້າງຕັ້ງກອງທັບປະຊາຊົນລາວ ຄົບຮອບ 73 ໃຫ້ກອງບັນຊາການທະຫານເມືອງ ກອງພັນ 410 ແລະ ກອງຮ້ອຍຊາຍແດນ 153 ຕື່ມອີກ.
# ຂ່າວ & ພາບ : ບຸນມີ