ວັນທີ 17 ມັງກອນ 2022 ຜ່ານມາ ທີ່ຫໍປະຊຸມບ້ານເມືອງຫານ ເມືອງຫົງສາ ແຂວງໄຊຍະບູລີ ທ່ານ ເຕີ່ຍ ສົມສັກ ກຳມະການສູນກາງແນວລາວສ້າງຊາດ ຄະນະປະຈຳ ຄະນະບໍລິຫານງານຊາວໜຸ່ມແຂວງໄຊຍະບູລີ ປະທານບໍລິສັດ ທີທີພາວເວີ ໂຕ່ໂທ່ ຈຳກັດ ໄດ້ລົງເຄື່ອນໄຫວຢ້ຽມຢາມ ພ້ອມທັງມອບທຶນສະໜັບສະໜູນເຂົ້າໃນການເຄື່ອນໄຫວນຳພາປະຕິບັດມາດຕະການປ້ອງກັນ ຄວບຄຸມ ແລະ ສະກັດກັ້ນການແຜ່ລະບາດຂອງພະຍາດໂຄວິດ-19 ໃຫ້ອົງການປົກຄອງບ້ານເມືອງຫານ ເປັນເງິນສົດຈຳນວນ 2.400.000 ກີບ ໂດຍມີທ່ານ ສົມຍົດ ອານຸວົງ ປະທານແນວລາວສ້າງຊາດເມືອງ ພ້ອມດ້ວຍອຳນາດການປົກຄອງ ແລະ ພາກສ່ວນກ່ຽວຂ້ອງ ໃຫ້ການຕ້ອນຮັບ.
ໂອກາດນີ້ ທ່ານ ວັນດີ ສິງມະນີ ນາຍບ້ານໆເມືອງຫານ ໄດ້ສະແດງຄວາມຂອບໃຈຕໍ່ການປະກອບສ່ວນເຂົ້າໃນວຽກງານສຳຄັນຄັ້ງນີ້ ພ້ອມທັງລາຍງານວຽກງານຮອບດ້ານໂດຍຫຍໍ້ ການເຄື່ອນໄຫວ ນຳພາຈັດຕັ້ງປະຕິບັດມາດຕະການປ້ອງກັນ ຄວບຄຸມ ແລະ ສະກັດກັ້ນ ການແຜ່ລະບາດຂອງພະຍາດໂຄວິດ-19 ຢູ່ບ້ານເມືອງຫານ ນອກນີ້ ອົງການປົກຄອງບ້ານຍັງໄດ້ເອົາໃຈໃສ່ສຶກສາອົບຮົມການເມືອງແນວຄິດໃຫ້ພໍ່ແມ່ປະຊາຊົນບັນດາເຜົ່າ ການເຕົ້າໂຮມຄວາມສາມັກຄີເປັນປຶກແຜ່ນແໜ້ນໜາ ສືບຕໍ່ນຳພາປະຕິບັດແຜນພັດທະນາບ້ານ ຕະຫຼອດເຖິງການກໍ່ສ້າງປະຕິສັງຂອນວັດວາອາຮາມ ສະໂມສອນບ້ານ ພື້ນຖານໂຄງລ່າງ ແລະ ການປົກປັກຮັກສາສິ່ງສາທາລະນະປະໂຫຍດຂອງບ້ານ
ໃນໂອກາດດຽວກັນ ທ່ານ ເຕີ່ຍ ສົມສັກ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານດ້ານຕ່າງໆທີ່ທາງບ້ານພ້ອມກັນຍາດມາໄດ້ຕະຫຼອດໄລຍະຜ່ານມາ ເປັນການຊຸກຍູ້ຂະບວນການແຂ່ງຂັນຮັກຊາດ ແລະ ພັດ ທະນາບ້ານໃຫ້ມີຄວາມເຂັ້ມແຂງ ແລະ ເນັ້ນພ້ອມກັນສືບຕໍ່ຈັດຕັ້ງປະຕິບັດມາດຕະການປ້ອງກັນ ຄວບຄຸມ ແລະ ສະກັດກັ້ນ ການແຜ່ລະບາດ ຂອງພະຍາດໂຄວິດ-19 ບ້ານເມືອງຫານ ໃຫ້ມີປະສິດທິຜົນສູງ.