ບ້ານໜອງແຫ້ວ ເມືອງຫາດຊາຍຟອງ ນະຄອນຫຼວງວຽງຈັນ ເປີດກອງປະຊຸມໃຫຍ່ເລືອກຕັ້ງເອົາຄະນະບ້ານຊຸດໃໝ່ ແລະ ສະຫຼຸບຄືນການເຄື່ອນໄຫວວຽກງານຮອບດ້ານໃນໄລຍະ 5 ປີຜ່ານມາ ພ້ອມວາງທິດທາງແຜນການໃນ 5 ປີຕໍ່ໜ້າ ຈັດຂື້ນທີ່ວັດບ້ານດັ່ງກ່າວ ເມື່ອວັນທີ 15 ມັງກອນ 2022 ຜ່ານມາ ເປັນປະທານຂອງທ່ານ ບຸນລົມ ສີທອນ ນາຍບ້ານໜອງແຫ້ວ ໂດຍມີທ່ານ ບຸນເພັງ ສີນະວົງພອນ ເຈົ້າເມືອງຫາດຊາຍຟອງ ມີຄະນະຊີ້ນຳວຽກງານກໍ່ສ້າງຮາກຖານເມືອງ ພາກສ່ວນກ່ຽວຂ້ອງ ພ້ອມດ້ວຍປະຊາຊົນເຂົ້າຮ່ວມ.
ທ່ານນາຍບ້ານໜອງແຫ້ວ ໄດ້ລາຍງານໃຫ້ຮູ້ກ່ຽວກັບການເຄື່ອນໄຫວວຽກງານໃນໄລຍະຜ່ານມາ ສະແດງໃຫ້ເຫັນເຖິງຜົນງານໃນການຈັດຕັ້ງປະຕິບັດຈົນສາມາດຍາດໄດ້ຜົນສຳເລັດ ດ້ວຍຄວາມຕັ້ງໜ້າເອົາໃຈໃສ່ຂອງຄະນະບ້ານ ແລະ ພໍ່ແມ່ປະຊາຊົນ ໂດຍໄດ້ຮັບການຊີ້ນຳ-ນຳພາຢ່າງໃກ້ຊິດຈາກຄະນະພັກ-ຄະນະນຳປົກຄອງເມືອງຫາດຊາຍຟອງ ຈື່ງເຮັດໃຫ້ວຽກງານທາງດ້ານບໍລິຫານ ນຳພາ ການຈັດຕັ້ງ ພາຍໃນບ້ານໄດ້ຮັບການຊຸກຍູ້ປັບປຸງແກ້ໄຂ ແລະ ມີການພັດທະນາໄດ້ເປັນຢ່າງດີ ວຽກງານປາກົດການຫຍໍ້ທໍ້ໃນສັງຄົມໄດ້ຮັບການແກ້ໄຂ ແລະ ມີທ່າອ່ຽງຈຳກັດໃຫ້ຫຼຸດລົງເທື່ອລະກ້າວ ແຕ່ເຖິງຢ່າງໃດກໍຕາມ ກໍຍັງບໍ່ປາສະຈາກໄດ້ໃນສີ່ງທີ່ເກີດຂື້ນ ແຕ່ກໍບໍ່ເປັນບັນຫາໃຫຍ່ ແລະ ໄດ້ຮັບການແກ້ໄຂ ຍ້ອນຄວາມເອົາໃຈໃສ່ຂອງຄະນະບ້ານ ໄດ້ນຳເອົາວຽກງານແນວທາງນະໂຍບາຍແນວຄິດ-ການເມືອງຂອງພັກ ກົດໝາຍຂອງລັດ ມະຕິຄໍາສັ່ງແຈ້ງການຕ່າງໆເປັນໃຈກາງ ແລະ ເປັນເຈົ້າການເຜີຍແຜ່ໃຫ້ພໍ່ແມ່ປະຊາຊົນຮັບຊາບເປັນແຕ່ລະໄລຍະ ເພື່ອສ້າງຄວາມສະຫງົບ ແລະ ຄວາມເປັນລະບຽບຮຽບຮ້ອຍໃນສັງຄົມ ການປະຕິບັດວຽກງານຖືກຕາມພາລະບົດບາດ ມີຫຼັກການ ມີຄວາມສາມັກຄີ ແລະ ເຮັດສຳເລັດໜ້າທີ່ ສ່ວນໃນຕໍ່ໜ້າ ຄະນະບ້ານຈະຕ້ອງເອົາໃຈໃສ່ເພີ່ມທະວີວຽກງານການບໍລິຫານນຳພາບ້ານ ເພື່ອສ້າງຄວາມໜັກແໜ້ນ ຄວາມເຊື່ອໝັ້ນ ແລະ ນຳໄປສູ່ການພັດທະນາບ້ານຢ່າງມີຄວາມເຂັ້ມແຂງ
ຕໍ່ບັນຫາດັ່ງກ່າວ ທ່ານເຈົ້າເມືອງໄດ້ຊີ້ນຳວຽກງານການຈັດຕັ້ງບ້ານ ແລະ ສະແດງຄວາມຊົມເຊີຍທີ່ສາມາດຍາດໄດ້ຜົນສຳເລັດ ພ້ອມທັງຊີ້ນຳໃຫ້ເອົາໃຈໃສ່ຕໍ່ວຽກງານການປະຕິບັດວາລະແຫ່ງຊາດ ເພື່ອໃຫ້ບ້ານສຸມໃສ່ຕິດຕາມກວດກາຊຸກຍູ້ຫົວໜ່ວຍທຸລະກິດທີ່ບ້ານຄຸ້ມຄອງ ໃຫ້ມີສ່ວນຮ່ວມປະກອບສ່ວນເພື່ອແກ້ໄຂບັນຫາທາງດ້ານເສດຖະກິດໃຫ້ຄ່ອງຕົວ ຕິດພັນກັບການແກ້ໄຂບັນຫາຢາເສບຕິດທີ່ເປັນໄພຮ້າຍແຮງຕໍ່ໄວໜຸ່ມ ແລະ ເຮັດໃຫ້ສັງຄົມບໍ່ມີຄວາມສະຫງົບ ເອົາໃຈໃສ່ແກ້ໄຂບັນຫານ້ຳອັ່ງຂັງເປື້ອນເປິຕາມແຄມຖະໜົນຫົນທາງ ເພື່ອຮັກສາຄວາມສະອາດຈົບງາມ ແລະ ປ້ອງກັນບໍ່ໃຫ້ພະຍາດຕ່າງໆເກີດຂື້ນຕາມມາ ພ້ອມດຽວກັນນັ້ນ ໃນກອງປະຊຸມ ພໍ່ແມ່ປະຊາຊົນຍັງໄດ້ໃຊ້ສິດປ່ອນບັດເລືອກເອົາຄະນະບ້ານຊຸດໃໝ່ເພື່ອສືບຕໍ່ບໍລິຫານນຳພາບ້ານໃນຊຸດຕໍ່ໄປ.
# ຂ່າວ – ພາບ : ນັກຂ່າວ ຖວທ ເມືອງຫາດຊາຍຟອງ