ກົດໝາຍວ່າດ້ວຍ ການປົກປ້ອງຜູ້ຊົມໃຊ້ ຊຶ່ງໄດ້ປະກາດໃຊ້ໃນປີ 2010 ມາຮອດປັດຈຸບັນກໍ ເກຶອບ10 ປີ ຜົນການຈັດຕັ້ງປະຕິບັດ ກໍເຫັນວ່າປະຊາຊົນລາວບັນດາເຜົ່າ ກໍໄດ້ຮັບການປົກປ້ອງທາງດ້ານສິດ ແລະ ຜົນປະໂຫຍດຈາກກົດໝາຍສະບັບນີ້ ຫລາຍພໍສົມຄວນ ແລະ ຍັງຈະສຶບຕໍ່ປົກປ້ອງຕະຫຼອດໄປ. ການປະກາດໃຊ້ກົດໝາຍສະບັບດັ່ງກ່າວນີ້ ແນໃສ່ເຮັດໃຫ້ສັງຄົມມີຄວາມຍຸຕິທຳ ຄວາມສະຫງົບ ຄວາມເປັນລະບຽບຮຽບຮ້ອຍ ເຮັດໃຫ້ຊີວິດການເປັນຢູ່ຂອງປະຊາຊົນບັນດາເຜົ່າດີຂຶ້ນ ປະກອບສ່ວນເຂົ້າໃນການພັດທະນາເສດຖະກິດ?ສັງ ຄົມຂອງປະເທດເຮົາໃຫ້ນັບມື້ນັບເຂັ້ມແຂງ.
ການປົກປ້ອງຜູ້ຊົມໃຊ້ແມ່ນ ການປົກປ້ອງແນວໃດ? ກົດໝາຍໄດ້ກຳນົດວ່າ ແມ່ນການນຳໃຊ້ມາດຕະການ ເພື່ອຮັກສາຊີວິດ ສຸຂະພາບ ຊັບສິນ ສິດ ແລະ ຜົນປະໂຫຍດອັນຊອບທຳຂອງຜູ້ຊົມໃຊ້ ທີ່ເນື່ອງມາຈາກຜົນກະທົບຂອງການນຳໃຊ້ສິນຄ້າ ແລະ ການບໍລິການເປັນຕົ້ນ ອາຫານ ຢາ ເຄື່ອງສຳອາງ ການປິ່ນປົວສຸຂະພາບ ລວມທັງການແກ້ໄຂຂໍ້ຂັດແຍ່ງ ທີ່ເກີດຂຶ້ນລະຫວ່າງຜູ້ຊົມໃຊ້ ແລະ ຜູ້ສະໜອງຕາມທີ່ໄດ້ກຳນົດໄວ້ໃນລະບຽບກົດໝາຍ. ເພື່ອຮັບປະກັນໃນການປົກປ້ອງສິດ ແລະ ຜົນປະໂຫຍດຂອງແຕ່ລະຝ່າຍນັ້ນ ກົດໝາຍສະບັບນີ້ ກໍໄດ້ກຳນົດສິດ ແລະ ພັນທະຂອງຜູ້ຊົມໃຊ້ ແລະ ຜູ້ສະໜອງໄວ້ດັ່ງນີ້:
ສິດ ຂອງຜູ້ຊົມໃຊ້ມີດັ່ງນີ້: 1. ເລືອກ ແລະ ຕັດສິນໃຈຊື້ສິນຄ້າ ຫຼື ໃຊ້ບໍລິການຕາມຄວາມຕ້ອງການ; 2. ຮູ້ຂໍ້ມູນຂ່າວສານ ແລະ ຄຳແນະນຳ ທີ່ຊັດເຈນ ກ່ຽວກັບຄຸນນະພາບ ລາຄາ ສະຖານທີ່ຜະລິດ ຜູ້ຜະລິດ ວິທີນຳໃຊ້ ຫຼື ຄູ່ມືນຳໃຊ້ ລັກສະນະພິເສດ ສ່ວນປະກອບ ວັນເດືອນປີ ຜະລິດ ວັນໝົດອາຍຸນຳໃຊ້ ໃບຮັບຮອງສິນຄ້າ ການບໍລິການຫລັງການຂາຍ ແລະ ຂໍ້ມູນອື່ນທີ່ຈຳເປັນ; 3. ໄດ້ຮັບຄວາມປອດໄພດ້ານຊີວິດ ສຸຂະພາບ ແລະ ຊັບສິນ ໃນເວລານຳໃຊ້ສິນຄ້າ ແລະ ການບໍລິການ; 4. ຮ້ອງຂໍ ຫຼື ຮ້ອງຟ້ອງເອົາການທົດແທນຄ່າເສຍຫາຍ ທີ່ເນື່ອງມາຈາກການຊົມໃຊ້ສິນຄ້າ ແລະ ການບໍລິການ ທີ່ບໍ່ມີຄຸນນະພາບ ຫຼື ບໍ່ໄດ້ມາດຕະຖານ ແລະ ມີຜົນກະທົບຕໍ່ຊີວິດ ສຸຂະພາບ ແລະ ຊັບສິນຂອງຕົນ; 5. ສະເໜີຕໍ່ອົງການຈັດຕັ້ງປະຕິບັດວຽກງານປົກປ້ອງຜູ້ຊົມໃຊ້ທີ່ກ່ຽວຂ້ອງ ກ່ຽວກັບການດຳເນີນການຜະລິດ ທຸລະກິດ ແລະ ການບໍລິການ ທີ່ລະເມີດລະບຽບກົດໝາຍ ເປັນຕົ້ນ ການປອມແປງສິນຄ້າ ການສ້າງຜົນກະທົບຕໍ່ສິງແວດລ້ອມເກີນມາດຕະຖານ. ສຳລັບພັນທະແມ່ນ: 1. ຈ່າຍຄ່າສິນຄ້າ ແລະ ການບໍລິການເປັນເງິນກີບ; 2. ນຳໃຊ້ສິນຄ້າ ແລະ ການບໍລິການໂດຍການປະຕິບັດຕາມຄຳແນະນຳ ຫຼື ຄູ່ມືນຳໃຊ້ຢ່າງຖືກຕ້ອງ; 3. ສະໜອງຂໍ້ມູນຂ່າວສານ ກ່ຽວກັບສິນຄ້າ ແລະ ການບໍລິການ ທີ່ບໍ່ມີຄຸນນະພາບ ແລະ ບໍ່ໄດ້ມາດຕະຖານໃຫ້ແກ່ເຈົ້າໜ້າທີ່ ທີ່ກ່ຽວຂ້ອງ.
ສິດ ແລະ ພັນທະຂອງຜູ້ສະໜອງມີດັ່ງນີ້: 1. ດຳເນີນທຸລະກິດ ການຜະລິດ ການຄ້າ ການຈຳໜ່າຍ ແລະ ການບໍລິການ ຕາມລະບຽບກົດໝາຍ; 2. ກຳນົດ ຕິດລາຄາສິນຄ້າ ແລະ ການບໍລິການ ເປັນເງິນກີບ; 3. ໂຄສະນາ ກ່ຽວກັບຄຸນນະພາບຂອງສິນຄ້າ ແລະ ການບໍລິການໃຫ້ຊັດເຈນ ຖືກຕ້ອງຕາມຄວາມເປັນຈິງ; 4. ຍື່ນຄຳຮ້ອງ ຄຳສະເໜີ ກ່ຽວກັບວຽກງານປົກປ້ອງຜູ້ຊົມໃຊ້ ແລະ ການລະເມີດລິຂະສິດ ສິນຄ້າ ແລະ ການບໍລິການຂອງຕົນ ຕໍ່ອົງການຈັດຕັ້ງປະຕິບັດວຽກງານປົກປ້ອງຜູ້ຊົມໃຊ້ທີ່ກ່ຽວຂ້ອງ.
ສຳລັບພັນທະຂອງຜູ້ສະໜອງທີ່ຕ້ອງໄດ້ປະຕິບັດມີດັ່ງນີ້: 1. ຮັບປະກັນຄຸນນະພາບ ມາດຕະຖານ ຂອງສິນຄ້າ ແລະ ການບໍລິການ ຕາມການກຳນົດຂອງກົດໝາຍທີ່ກ່ຽວຂ້ອງ; 2. ຮັບປະກັນບໍ່ໃຫ້ການຜະລິດ ການນຳເຂົ້າ ການຈຳໜ່າຍສິນຄ້າ ການບໍລິການ ສົ່ງຜົນກະທົບຕໍ່ສິ່ງແວດລ້ອມເກີນມາດຕະຖານທີ່ໄດ້ກຳນົດ; 3. ສະໜອງຂໍ້ມູນຂ່າວສານ ກ່ຽວກັບການຜະລິດ ການນຳເຂົ້າ ການຈຳໜ່າຍສິນຄ້າ ແລະ ການບໍລິການ ແກ່ຜູ້ຊົມໃຊ້ໃຫ້ຊັດເຈນ ແລະ ຖືກຕ້ອງຕາມຄວາມເປັນຈິງ; 4. ຮັບຜິດຊອບຕໍ່ຄວາມເສຍຫາຍ ທີ່ເນື່ອງມາຈາກຜະລິດຕະພັນ ສິນຄ້າ ແລະ ການບໍລິການທີ່ບໍ່ມີຄຸນນະພາບ ແລະ ບໍ່ໄດ້ມາດຕະຖານ ຊຶ່ງຕົນໄດ້ສະໜອງ; 5. ປະຕິບັດສັນຍາ ກັບຜູ້ຊົມໃຊ້ຢ່າງເຂັ້ມງວດ ແລະ ຕິດສະຫຼາກສິນຄ້າ ຕາມລະບຽບການ; 6. ໃຫ້ການຮ່ວມມື ແລະ ສະໜອງຂໍ້ມູນຂ່າວສານ ກ່ຽວກັບສິນຄ້າ ແລະ ການບໍລິການຂອງຕົນໃຫ້ແກ່ເຈົ້າໜ້າທີ່ກ່ຽວຂ້ອງ. ສິ່ງທີ່ຍົກເອົາມາສະເໜີ ແມ່ນກ່ຽວຂ້ອງກັບພົນລະເມືອງລາວທຸກຄົນ ຄົນຕ່າງດ້າວ ແລະ ຄົນບໍ່ມີສັນຊາດ ລວມທັງຜູ້ສະໜອງທີ່ເປັນຊາວຕ່າງປະເທດຕ້ອງໄດ້ເອົາໃຈໃສ່ປະຕິບັດຢ່າງເຂັ້ມງວດ ຖ້າໃຜຫາກລະເມີດຈະຕ້ອງຮັບຜິດຊອບຕາມກົດໝາຍນີ້ ແລະ ກົດໝາຍອື່ນທີ່ໄດ້ກຳນົດໂທດທາງອາຍາເອົາແລ້ວ ໂດຍສະເພາະ ແມ່ນປະມວນກົດໝາຍອາຍາ ຂອງ ສປປ ລາວ ຕາມສະຖານເບົາ ຫຼື ໜັກ. ສ່ວນບັນດາຂໍ້ຫ້າມ ການລະເມີດຂໍ້ຫ້າມ ແລະ ອົງການແກ້ໄຂ ຂັ້ນຕອນການແກ້ໄຂ ຈະນຳສະເໜີໃນບົດຕໍ່ໄປ. ທ່ານຜູ້ອ່ານທີ່ຮັກແພງທັງຫຼາຍເຖິງແມ່ນວ່າພວກເຮົາມີກົດໝາຍ ມີຂໍ້ຫ້າມຢ່າງລະອຽດຈະແຈ້ງແລ້ວກໍຕາມ ຖ້າພວກເຮົາຫາກຍັງຂາດການຕິດຕາມກວດກາ ຂາດການບັງຄັບໃຊ້ກົດໝາຍທີ່ກ່ຽວຂ້ອງຢ່າງແຂງແຮງ ຂາດການເຄື່ອນໄຫວຢ່າງເປັນຮູບປະທຳ ກົດໝາຍກໍເປັນພຽງກົດໝາຍ ຫາກຈະບໍ່ເກີດຄວາມສັກສິດໃນຕົວຂອງມັນເອງໄດ້.