ຄະນະພັກຮາກຖານ ດ່ານຊາຍແດນສາກົນວັງເຕົ່າ ເມືອງໂພນທອງ ແຂວງຈໍາປາສັກ ຈັດພິທີປະກາດສ້າງຕັ້ງ ແລະ ບົ່ງຕົວແຕ່ງຕັ້ງຄະນະໜ່ວຍພັກຕໍາຫຼວດກວດຄົນເຂົ້າ-ອອກເມືອງ ທີ່ຂຶ້ນກັບຄະນະພັກຮາກຖານດ່ານຊາຍແດນສາກົນວັງເຕົ່າ ຂຶ້ນວັນທີ 1 ທັນວາ 2021 ຢູ່ເຂດເສດຖະກິດພິເສດວັງເຕົ່າ ໂດຍມີສະຫາຍ ສະນັ່ນ ສີພາພົມມະຈັນ ຮອງເລຂາຄະນະພັກ ຫົວໜ້າຄະນະຈັດຕັ້ງແຂວງຈຳປາສັກ ສະຫາຍ ພັນເອກ ສຸກັນ ໄຕໄຊຍະວົງ ເລຂາຄະນະພັກຮາກຖານ ຫົວໜ້າຄະນະຄຸ້ມຄອງດ່ານຊາຍແດນສາກົນວັງເຕົ່າ ພ້ອມດ້ວຍຄະນະປັບປຸງກົງຈັກການຈັດຕັ້ງພັກ-ລັດ ຂັ້ນແຂວງ ແລະ ພາກສ່ວນກ່ຽວຂ້ອງເຂົ້າຮ່ວມ.
ສະຫາຍ ແກ້ວອຸດອນ ພາລີຈັນ ປະທານກວດກາຄະນະພັກຮາກຖານດ່ານຊາຍແດນສາກົນວັງເຕົ່າ ໄດ້ຜ່ານບົດສະຫຼຸບການນໍາພາ-ຊີ້ນໍາວຽກງານຮອບດ້ານຂອງຄະນະພັກຮາກຖານໃນ 11 ເດືອນ ປີ 2021 ແລະ ທິດທາງແຜນການເດືອນທັນວາ ປີ 2021 ຈາກນັ້ນ ສະຫາຍ ສາທິດ ປັດສາພັນ ຮອງຫົວໜ້າຄະນະຈັດຕັ້ງແຂວງ ກໍໄດ້ຂຶ້ນຜ່ານມະຕິຕົກລົງຂອງຄະນະປະຈໍາພັກແຂວງ ວ່າດ້ວຍການອະນຸມັດສ້າງຕັ້ງໜ່ວຍພັກຕໍາຫຼວດກວດຄົນເຂົ້າ-ອອກເມືອງ ແລະ ເຫັນດີບົ່ງຕົວແຕ່ງຕັ້ງຄະນະໜ່ວຍພັກ ໂດຍເຫັນດີບົ່ງຕົວແຕ່ງຕັ້ງເອົາສະຫາຍ ພັນໂທ ດໍາລົງ ບຸດສາຄອນ ເປັນເລຂາໜ່ວຍພັກ ສະຫາຍ ພັນໂທ ຄໍາໝານ ໄຊກອງພັນ ເປັນຮອງເລຂາ ແລະ ສະຫາຍ ພັນຕີ ສຸກສາຄອນ ຈະເລີນສຸກ ເປັນຄະນະ ທັງເປັນປະທານກວດກາໜ່ວຍພັກ.
ປັດຈຸບັນ ຄະນະພັກຮາກຖານດ່ານຊາຍແດນສາກົນວັງເຕົ່າມີ 4 ໜ່ວຍພັກທີ່ຂຶ້ນກັບ ຄື: ໜ່ວຍພັກຫ້ອງການບໍລິຫານດ່ານຊາຍແດນສາກົນວັງເຕົ່າ ໜ່ວຍພັກດ່ານພາສີສາກົນວັງເຕົ່າ ໜ່ວຍພັກທ່າບົກວັງເຕົ່າ ແລະ ໜ່ວຍພັກຕໍາຫຼວດກວດຄົນເຂົ້າ-ອອກເມືອງ ມີສະມາຊິພັກທັງໝົດ 55 ສະຫາຍ ຍິງ 12 ສະຫາຍ ໃນນັ້ນ ສະມາຊິກພັກສໍາຮອງ 2 ສະຫາຍ.
# ຂ່າວ & ພາບ : ລັດເວລາ