ບໍລິສັດ ຊິນເນສິສ ຈໍາກັດຜູ້ດຽວ (ໂຟຕອນລາວ) ຜູ້ນໍາເຂົ້າລົດຍີຫໍ້ ໂຟຕອນ (Foton) ໃນ ສປປ ລາວ ມອບລົດບັນທຸກນໍ້າມັນ ໂຟຕອນ ອໍແມນ ອີເອັດທີ (FOTON Auman EST) ຈໍານວນ 22 ຄັນໃຫ້ບໍລິສັດ ສີອໍາພອນ ຂາອອກ-ຂາເຂົ້າ ຈໍາກັດຜູ້ດຽວ ແລະ ບໍລິສັດ ນາຄາ ຂົນສົ່ງ ຈໍາກັດຜູ້ດຽວ ທີ່ໃຫ້ຄວາມໄວ້ວາງໃຈ ແລະ ເຊື່ອໝັ້ນໃນຄຸນນະພາບ ເຕັກໂນໂລຊີທີ່ທັນສະໄໝຂອງລົດ ໂຟຕອນ ດ້ວຍດີຕະ ຫຼອດມາ.
ພິທີມອບ-ຮັບລົດດັ່ງກ່າວ ຈັດຂຶ້ນວັນທີ 27 ພະຈິກ ຜ່ານມາ ຢູ່ເດີ່ນພະທາດຫຼວງ ນະຄອນຫຼວງວຽງຈັນ ເຊິ່ງມອບໂດຍທ່ານນາງ ວັນຄໍາ ສຸລິຍາ ອໍານວຍການບໍລິສັດ ຊິນເນສິສ ຈໍາກັດຜູ້ດຽວ (ໂຟຕອນລາວ) ແລະ ຮັບໂດຍທ່ານນາງ ສີອໍາພອນ ອາມາດມົນຕີ ປະທານບໍລິສັດ ສີອໍາພອນ ຂາອອກ-ຂາເຂົ້າ ຈໍາກັດຜູ້ດຽວ ແລະ ທ່ານ ອຸ່ນເຮືອນ ວົງສີປະສົມ ປະທານບໍລິສັດ ນາຄາ ຂົນສົ່ງ ຈໍາກັດຜູ້ດຽວ ມີພາກ ສ່ວນກ່ຽວຂ້ອງ ເຂົ້າຮ່ວມ.
ລົດບັນທຸກນໍ້າມັນຈໍານວນດັ່ງກ່າວ ຈະຖືກນໍາໃຊ້ໃນການປະກອບສ່ວນຂົນສົ່ງນໍ້າມັນດິບ ຈາກທ່າເຮືອ ສສ ຫວຽດນາມ ມາໃຫ້ໂຮງງານກັ່ນນໍ້າມັນໃນ ສປປ ລາວ ເພື່ອສົ່ງເສີມການກັ່ນນໍ້າມັນພາຍໃນປະເທດ ແນໃສ່ເຮັດໃຫ້ລາຄານໍ້າມັນໃນ ສປປ ລາວ ຖືກລົງ ທັງສາມາດສະໜອງນໍ້າມັນຮັບໃຊ້ພາຍໃນຢ່າງພຽງພໍ ແລະ ມີນໍ້າມັນໃນຄັງສໍາຮອງ ຫຼາຍຂຶ້ນ.