ວັນທີ 3 ທັນວາ ຜ່ານມາ ທ່ານ ທອງລຸນ ສີສຸລິດ ເລຂາທິການໃຫຍ່ ປະທານປະເທດ ສປປ ລາວ ໄດ້ພົບປະກັບທ່ານ ສີ ຈິ້ນຜິງ ເລຂາທິການໃຫຍ່ ປະທານປະເທດ ສປ ຈີນ ເປັນທາງການ ແບບທາງໄກ ພ້ອມທັງເປັນສັກຂີພິຍານໃນພິທີເປີດນໍາໃຊ້ເສັ້ນທາງລົດໄຟ ລາວ-ຈີນ ເຊິ່ງມີຄວາມຍາວ 1.035 ກິໂລແມັດ ຈາກນະຄອນຄຸນໝິງ ສປ ຈີນ ເຖິງນະຄອນຫຼວງວຽງຈັນ ສປປ ລາວ ເສັ້ນທາງລົດໄຟດັ່ງກ່າວມີຄວາມສໍາຄັນຢ່າງຍິ່ງຕໍ່ການແລກປ່ຽນເສດຖະກິດ ສັງຄົມ ແລະ ວັດທະນະທຳ ລະຫວ່າງສອງປະເທດ ຕະຫຼອດເຖິງການເຊື່ອມໂຍງລະດັບພາກພື້ນ ສ້າງຄວາມໝັ້ນໃຈ ແລະ ຊຸກຍູ້ການພັດທະນາໃນພາກພື້ນ.
ການເດີນທາງຈາກຊາຍແດນ ລາວ-ຈິນ ສູ່ນະຄອນຫຼວງວຽງຈັນ ຈະສັ້ນລົງຈາກ 2 ວັນ ເປັນ 3 ຊົ່ວໂມງ ແລະ ການເດີນທາງຈາກນະຄອນຄຸນໝິງ ເຖິງນະຄອນຫຼວງວຽງຈັນ ຈະໃຊ້ເວລາພຽງແຕ່ 1 ວັນ ນີ້ແມ່ນເສັ້ນທາງລົດໄຟສາຍທຳອິດຂອງລາວ ທີ່ຈະປ່ຽນລາວຈາກ “ປະເທດທີ່ບໍ່ມີຊາຍແດນຕິດຈອດ” ເປັນ “ປະເທດທີ່ມີຊາຍແດນຕິດຈອດ” ເພີ່ມທະວີການເຊື່ອມຕໍ່ພາກພື້ນ ແລະ ຄວາມຍືດຍຸ່ນຂອງຕ່ອງໂສ້ອຸປະທານ ການເຄື່ອນໄຫວທຸລະກິດ ແລະ ການເດີນທາງ ລະຫວ່າງ ຈີນ ກັບ ອາຊີຕາເວັນອອກສຽງໃຕ້ ໄດ້ຮັບຄວາມສະດວກກວ່າ ທາງລົດໄຟ ລາວ-ຈີນ ໄດ້ນຳພາປະເທດ ເຂົ້າສູ່ຍຸກໃໝ່ຂອງເຄືອຂ່າຍຄົມມະນາ ຄົມໃນພາກພື້ນ ເສັ້ນທາງລົດໄຟຈະຊ່ວຍຊຸກຍູ້ຂະແໜງການຕ່າງໆໃນພາກພື້ນ ແລະ ຊ່ວຍໃຫ້ລາວຟື້ນຟູເສດຖະກິດ ທີ່ໄດ້ຮັບຜົນກະທົບຈາກການແຜ່ລະບາດຂອງພະຍາດໂຄວິດ-19.
ໂຊລູເຊິນລົດໄຟອັດສະລິຍະຂອງຫົວເຫວີຍ ໄດ້ໃຫ້ການສະໜັບສະໜູນທາງລົດໄຟ ລາວ-ຈີນ ໃນຄວາມພະຍາຍາມຫັນເປັນດີຈີຕອນ ສ້າງຄວາມກ້າວໜ້າດ້ານຄວາມປອດໄພ ແລະ ການຮັກສາຄວາມປອດໄພໃນທຸກດ້ານຂອງທາງລົດໄຟ ລວມທັງການກໍ່ສ້າງ ການດໍາເນີນງານ ແລະ ບໍາລຸງຮັກສາ ພ້ອມນີ້ຫົວເຫວີຍ ຍັງໄດ້ເຮັດວຽກຢ່າງໃກ້ຊິດກັບຜູ້ໃຫ້ບໍລິການດ້ານໂທລະຄົມມະນາຄົມໃນລາວ ເພື່ອສ້າງເຄືອຂ່າຍຄວາມໄວສູງ ຮັບປະກັນການເຊື່ອມຕໍ່ທີ່ສະຖຽນ ໝັ້ນຄົງ ເຕັກໂນໂລຊີທີ່ກ້າວໜ້າທີ່ໃຫ້ຜົນປະໂຫຍດແກ່ປະຊາຊົນ ແລະ ຜູ້ໂດຍສານຂອງລາວ.
ທ່ານ ບໍ່ວຽງຄໍາ ວົງດາລາ ລັດຖະມົນຕີກະຊວງເຕັກໂນໂລຊີ ແລະ ການສື່ສານ ກ່າວວ່າ: ການເປີດນໍາໃຊ້ທາງລົດໄຟ ລາວ-ຈີນ ແມ່ນວິໄສທັດອັນໃຫຍ່ຫຼວງຂອງການນຳຂອງທັງສອງປະເທດ ດ້ວຍຄວາມພະຍາຍາມອັນໃຫຍ່ຫຼວງຂອງກຳມະກອນທຸກຄົນ ເຮັດໃຫ້ສິ່ງດັ່ງກ່າວເປັນຈິງໃນໄລຍະ 5 ປີ ຫົວເຫວີຍ ໄດ້ເຮັດວຽກຮ່ວມກັບຜູ້ໃຫ້ບໍລິການໂທລະຄົມມະນາຄົມຂອງລາວ ເພື່ອສ້າງເຄືອຂ່າຍໄຮ້ສາຍຕາມເສັ້ນທາງລົດໄຟ ການຄຸ້ມຄອງ 5G ຈະພ້ອມນຳໃຊ້ໃນອະນາຄົດອັນໃກ້ນີ້ ທີ່ປະຊາຊົນຈະສາມາດເພີດເພີນກັບການເຊື່ອມຕໍ່ທີ່ສະຖຽນ ຄວາມໄວສູງ ແລະ smart ຫຼາຍກວ່າ ການເຮັດວຽກຢູ່ເທິງລົດໄຟ ແລະ ການຕິດຕໍ່ກັບໝູ່ເພື່ອນ ແລະ ຄອບຄົວໄດ້ທຸກທີ່ທຸກເວລາ ກາຍເປັນສິ່ງທີ່ເປັນໄປໄດ້ ເຊິ່ງຕ້ອງຂໍຂອບໃຈກັບຜົນງານອັນໃຫຍ່ຫຼວງຂອງເຂົາເຈົ້າ ຫຼັງຈາກທີ່ເປີດທາງລົດໄຟ ເສັ້ນທາງດີຈີຕອນ ແລະ ດີຈີຕອນໜຶ່ງແລວ ໜຶ່ງເສັ້ນທາງ ກໍຄວນເປີດເຊັ່ນດຽວກັນ.
ທ່ານ ສົມລິດ ນາມມະນີນິນ ຫົວໜ້າໂຄງການຫົວເຫວີຍລາວ ກ່າວວ່າ: ຕົນ ຮູ້ສຶກເປັນກຽດຢ່າງຍິ່ງທີ່ໄດ້ມີສ່ວນຮ່ວມໃນການຮັບປະກັນພິທີເປີດຄັ້ງນີ້ ໃນຖານະທີ່ເປັນຄົນລາວ ກໍຮູ້ສຶກຕື່ນເຕັ້ນຫຼາຍທີ່ໃນທີ່ສຸດກໍມີທາງລົດໄຟໃນບ້ານເກີດຂອງຕົນ ເປັນສິ່ງທີ່ຄິດບໍ່ເຖິງໃນ 2-3 ປີກ່ອນ ຕົນ ເຊື່ອວ່າທາງລົດໄຟ ລາວ-ຈີນ ຈະເປັນແຮງຊຸກຍູ້ດ້ານເສດຖະກິດ ຊ່ວຍປະເທດລາວໃຫ້ເຊື່ອມໂຍງເຂົ້າກັບຕະຫຼາດສາກົນທີ່ກວ້າງໃຫຍ່ ແລະ ສ້າງໂອກາດຫຼາຍຂຶ້ນໃຫ້ການທຸລະກິດ ແລະ ຜູ້ຄົນໃນທ້ອງຖິ່ນ ໃນຖານະທີ່ເປັນພະນັກງານຂອງຫົວເຫວີຍ ທີ່ມີສ່ວນຮ່ວມໃນການສ້າງເຄືອຂ່າຍຕາມທາງລົດໄຟ ຕົນ ຮູ້ສຶກພາກພູມໃຈທີ່ລະບົບການປະຊຸມ HUAWEI CLOUD ເຕັກໂນໂລຊີ 5G ແລະ ໂຊລູເຊິນ FTTX ໄດ້ເຮັດໃຫ້ການພົບທາງໄກແບບອອນລາຍຂອງໄລຍະເວລາແຫ່ງປະຫວັດສາດເປັນໄປຢ່າງຈົບງາມ ຕົນ ຫວັງວ່າຈະໄດ້ເຫັນການປະ ສົມປະສານຂອງເຕັກໂນໂລຊີດີຈີຕອນ ແລະ ການຂົນສົ່ງທີ່ທັນສະໄໝ ເພື່ອນໍາເອົາຄວາມສົດໃສ ແລະ ສີ ວິໄລມາສູ່ປະເທດລາວ.
ຫົວເຫວີຍ ສ້າງຕັ້ງຢູ່ປະເທດລາວ ມາເປັນເວລາ 23 ປີແລ້ວ “ຢູ່ລາວ ເພື່ອລາວ” ແມ່ນພັນທະກິດຂອງພວກເຮົາໃນການພັດທະນາມາໂດຍຕະຫຼອດ ພວກເຮົາໄດ້ເຫັນ ແລະ ມີສ່ວນຮ່ວມໃນໄລຍະເວລາແຫ່ງປະຫວັດສາດອັນຍິ່ງໃຫຍ່ນີ້ ຫົວເຫວີຍລາວ ຈະຍັງຄົງມີສ່ວນຮ່ວມໃນເສດຖະກິດດີຈີຕອນ ແລະ ການປ່ຽນອຸດສາຫະກຳໃນລາວ. (ສະບາໄພ 5/12/2021)