ບໍລິສັດ ລາວໂທລະຄົມມະນາຄົມ ມະຫາຊົນ (ລລທ) ຈັດພິທີສະເຫຼີມສະຫຼອງວັນສ້າງຕັ້ງແຫ່ງການເຕີບໃຫຍ່ຂະຫຍາຍຕົວ ແລະ ພັດທະນາ ບໍລິສັດລາວໂທລະຄົມ ຄົບຮອບ 25 ປີ (11 ພະຈິກ 1996-11 ພະຈິກ 2021) ຂຶ້ນວັນທີ 11 ພະຈິກ 2021 ທີ່ຫໍປະຊຸມແຫ່ງຊາດ ໂດຍມີທ່ານ ບໍ່ວຽງຄຳ ວົງດາລາ ລັດຖະມົນຕີກະຊວງເຕັກໂນລີຊີ ແລະ ການສື່ສານ ບັນດາຄະນະອຳນວຍການບໍລິສັດ ລາວໂທລະຄົມ ພ້ອມດ້ວຍແຂກຖືກເຊີນ ແລະ ພະນັກງານສາຂາທົ່ວປະເທດເຂົ້າຮ່ວມຜ່ານລະບົບອອນລາຍ.
ທ່ານ ສຸພົນ ຈັນທະວີໄຊ ຜູ້ອຳນວຍການໃຫຍ່ ບໍລິສັດ ລາວໂທລະຄົມມະນາຄົມ ມະຫາຊົນ ກ່າວວ່າ: ບໍລິສັດ ລລທ ໄດ້ຮັບການສ້າງຕັ້ງຂຶ້ນໃນວັນທີ 11 ພະຈິກ 1996 ເຊິ່ງເປັນການລວມເອົາບໍລິສັດ ໂທລະຄົມມະນາຄົມລາວ ແລະ ບໍລິສັດ ຊິນນະວັດຕຣາ ເທເລຄອມຈໍາກັດ ຮ່ວມທຶນເຂົ້າກັນ ໂດຍລັດຖະບານລາວ ຖືຮຸ້ນ 51% ແລະ ບໍລິສັດ ເຊັນນິງຕັນ ອິນເວສເມັນ ສິງກະໂປ ຖືຮຸ້ນ 49%.
ການຈັດພິທີຄັ້ງນີ້ ເປັນການສັງລວມຄືນບັນດາຜົນງານການເຄື່ອນໄຫວການດຳເນີນທຸລະກິດຂອງ ບໍລິສັດລາວໂທລະຄົມໃນ 25 ກວ່າປີທີ່ຜ່ານມາ. ຄະນະພັກ ຄະນະນຳບໍລິສັດ ໄດ້ນຳພາບໍລິສັດ ລາວໂທລະຄົມ ຜ່ານຜ່າທຸກຂໍ້ຫຍຸ້ງຍາກ ແລະ ສິ່ງທ້າທາຍຫຼາຍດ້ານ ຕັ້ງໜ້າຊີ້ນໍາ-ນໍາພາບໍລິສັດໃຫ້ເຕີບໃຫຍ່ ຂະຫຍາຍຕົວເປັນກ້າວໆ ທັງດ້ານປະລິມານ ແລະ ຄຸນນະພາບ ເຮັດໃຫ້ໂຄງລ່າງພື້ນຖານທາງດ້ານໂທລະຄົມມີການພັດທະນາໃຫ້ທັນສະໄໝຢູ່ສະເໝີ.
ໄລຍະ 25 ປີຜ່ານມາ ລລທ ສາມາດຂະຫຍາຍລູກຄ້າໃໝ່ ແລະ ຮັກສາຈຳນວນລູກຄ້າເກົ່າໄວ້ໄດ້ ມາເຖິງປັດຈຸບັນ ມີຖານລູກຄ້າ 3,5 ລ້ານກວ່າລູກຄ້າ ມີລູກຄ້າ FTTH 66.000 ກ່ວາລູກຄ້າ ມີສະຖານີຖານ (BTS) ທັງໝົດ 7.304 ແຫ່ງ ໃນນີ້ ສະຖານີ GSM 2G 2.000 ກວ່າສະຖານີ 3G 3.300 ກວ່າສະຖານີ 4G 4.000 ກວ່າສະຖານີ 4.5G 700 ກວ່າສະຖານີ 5G 10 ກວ່າສະຖານີ ແລະ FTTH PORT ຫຼາຍກວ່າ 100.000 Ports ມີລະບົບສາຍສົ່ງສາຍໄຍແກ້ວນຳແສງຍາວຫຼາຍກວ່າ 32.000 ກິໂລແມັດ ໃນນັ້ນ Backbone DWDM 4705 Km Capacity 100 Gbps.
ການເຄື່ອນໄຫວດໍາເນີນທຸລະກິດຂອງ ລລທ ສາມາດສ້າງລາຍຮັບໄດ້ 20.000 ຕື້ກີບ ແລະ ມີກໍາໄລສຸດທິຫຼາຍກວ່າ 5.000 ຕື້ກີບ ດ້ວຍຈັງຫວະການເຕີບໂຕຢ່າງຕໍ່ເນື່ອງ ສະເລ່ຍຫຼາຍກວ່າ 22% ຕໍ່ປີ ສາມາດປະຕິບັດພັນທະໃຫ້ລັດຖະບານມີມູນຄ່າຫຼາຍກວ່າ 5. 000 ຕື້ກີບ ມອບເງິນປັນຜົນໃຫ້ລັດຖະບານ ແລະ ຝ່າຍຂາຮຸ້ນໄດ້ 351 ລ້ານໂດລາສະຫະລັດ. ພ້ອມນັ້ນ ບໍລິສັດ ລາວໂທລະຄົມ ໄດ້ເອົາໃຈໃສ່ປະກອບສ່ວນດ້ານພັນທະຂອງຕົນຕໍ່ສັງຄົມ ອົງການຈັດຕັ້ງພັກ-ລັດຢ່າງຕັ້ງໜ້າ ສະແດງອອກໃຫ້ເຫັນມູນຄ່າການຊ່ວຍເຫຼືອສັງຄົມ ຕະຫຼອດໄລຍະ 25 ປີ ຜ່ານມາ ມີມູນຄ່າຫຼາຍກວ່າ 50 ຕື້ກີບ ໃນນີ້ ມີດ້ານການສືກສາ 3 ຕື້ກີບ ດ້ານສາທາລະນະ 30 ຕື້ກີບ ແລະ ກອງປະຊຸມໃຫຍ່ຂອງພັກແຕ່ລະສະໄໝຫຼາຍກວ່າ 2 ຕື້ກີບ ອັນພົ້ນເດັ່ນ ໄດ້ປະກອບສ່ວນຊ່ວຍເຫຼືອລັດຖະບານ ແລະ ສັງຄົມເພື່ອປ້ອງກັນ ຄວບຄຸມ ແລະ ຕ້ານການແຜ່ລະບາດຂອງເຊື້ອພະຍາດ COVID-19 ແລະ ຍັງໄດ້ລະດົມທຶນຈາກຝ່າຍຂາຮຸ້ນຕ່າງປະເທດເພື່ອມອບໃຫ້ລັດຖະບານ ໃນນາມຂາຮຸ້ນອີກ 10.000 ໂດລາສະຫະລັດ ເປັນເງິນສົດ 6 ຕື້ກີບ ວັດຖຸບວກຄ່າບໍລິການດ້ານໂທລະຄົມ 11 ຕື້ກີບ ແລະ ຊ່ວຍລັດຖະບານ ສສ ຫລວຽດນາມ 10.000 ໂດລາສະຫະລັດ.ນອກຈາກນີ້ ໄປຄຽງຄູ່ກັບການດໍາເນີນທຸລະກິດ ຍັງໄດ້ປັບປຸງລະບຽບ ນະໂຍບາຍສະຫວັດດີການສັງຄົມຕ່າງໆໃຫ້ສູງຂຶ້ນ ເພື່ອຍົກສູງລະດັບຊີວິດການເປັນຢູ່ໃຫ້ພະນັກງານກຳມະກອນໃຫ້ດີຂຶ້ນເລື້ອຍໆ.
ໃນພິທີດັ່ງກ່າວ ເພື່ອເປັນການສະແດງເຖິງຜົນງານຕະຫຼອດໄລຍະຜ່ານມາ ໄດ້ມີການປະດັບຫຼຽນໄຊ ແຮງງານຊັ້ນ I ຈາກລັດຖະບານ ໃຫ້ບໍລິສັດລາວໂທລະຄົມ ແລະ ປະດັບຫຼຽນໄຊແຮງງານຊັ້ນ I ໃຫ້ຝ່າຍຖືຮຸ້ນຕ່າງປະເທດ ແລະ ປະດັບຫຼຽນໄຊແຮງງານ ຊັ້ນ I.II.III. ຫຼຽນກາແຮງງານ ແລະ ໃບຍ້ອງຍໍຂັ້ນລັດຖະບານ ໃຫ້ພະນັກງານ ແລະ ພະນັກງານຝ່າຍຂາຮຸ້ນຕ່າງປະເທດທີ່ມີຜົນງານດີເດັ່ນໃນການປະກອບສ່ວນເຮັດໃຫ້ການຮ່ວມມືທາງດ້ານການດຳເນີນທຸລະກິດຂອງລາວໂທລະຄົມ ທີ່ມີການເຕີບໃຫຍ່ຂະຫຍາຍຕົວເປັນກ້າວໆມາ.
ໂອກາດນີ້ ທ່ານ ບໍ່ວຽງຄຳ ວົງດາລາ ຍັງໄດ້ຮັບກຽດໂອ້ລົມ ທ່ານໄດ້ຍ້ອງຍໍຊົມເຊີຍຜົນງານໃນໄລຍະຜ່ານມາ ທີ່ລາວ ໂທລະຄົມ ຍາດມາໄດ້ ແລະ ສາມາດຕອບສະໜອງຄວາມຮຽກຕ້ອງການຂອງສັງຄົມ ການພັດທະນາພື້ນຖານໂຄງລ່າງດ້ານໂທລະຄົມ ກໍໄດ້ຮັບການພັດທະນາຢ່າງຕໍ່ເນື່ອງແຕ່ລະປີ ໃນຂອບເຂດທົ່ວປະເທດ ສິ່ງທີ່ຄວນເອົາໃຈໃສ່ໃນຊຸມປີຕໍ່ໜ້າ ລລທ ຕ້ອງໄດ້ກຽມພ້ອມຮອບດ້ານ ຈຳເປັນຕ້ອງໄດ້ພັດທະນາຕົນເອງຢ່າງບໍ່ຢຸດຢັ້ງ ເພື່ອໃຫ້ກາຍເປັນໜຶ່ງໃນຜູ້ໃຫ້ບໍລິການດ້ານສື່ສານໂທລະຄົມມະນາຄົມຄົບວົງຈອນໃນ ສປປ ລາວໃຫ້ຫຼາຍຂຶ້ນ.
..# ຂ່າວ – ພາບ : ລັດເວລາ