ວັນທີ 9 ພະຈິກ 2021 ທີ່ອົງການປົກຄອງເມືອງຈັນທະບູລີ ນະຄອນຫຼວງວຽງຈັນ ໄດ້ມີພິທີມອບຖົງປັນນໍ້າໃຈ ອົງການປົກຄອງນະຄອນຫຼວງວຽງຈັນ ຈໍານວນ 191 ຖົງ ຕາງໜ້າໃຫ້ອົງການປົກຄອງນະຄອນຫຼວງວຽງຈັນ ມອບໂດຍທ່ານ ບຸນໜາ ຜາທຸມມະວົງ ຫົວໜ້າຄະນະຈັດຕັ້ງນະຄອນຫຼວງວຽງຈັນ ແລະ ຮັບແມ່ນທ່ານ ດວງຕາ ສຸລິວົງ ເຈົ້າເມືອງຈັນທະບູລີ ພ້ອມດ້ວຍຄະນະ ແລະ ອົງການຈັດຕັ້ງກ່ຽວຂ້ອງເຂົ້າຮ່ວມ.
![](https://v2.vientianemai.net/wp-content/uploads/2021/11/252793423_191333979848663_4220299089153415576_n-1024x687.jpg)
ທ່ານ ດວງຕາ ສຸລິວົງ ກ່າວວ່າ: ເຄື່ອງຖົງປັນນໍ້າໃຈດັ່ງກ່າວ ທາງອົງການປົກຄອງນະຄອນຫຼວງວຽງຈັນ ໄດ້ລະດົມຈາກບໍລິສັດຕ່າງໆພາຍໃນນະຄອນຫຼວງວຽງຈັນ ເພື່ອມາໃຫ້ປະຊາຊົນຄອບຄົວຫຍຸ້ງຍາກ ໃນໄລຍະການລະບາດຂອງພະຍາດໂຄວິດ-19 ຢູ່ເມືອງຈັນທະບູລີ ພາຍຫຼັງໄດ້ຮັບເຄື່ອງແລ້ວ ອົງການປົກຄອງເມືອງຈັນທະບູລີ ກໍມອບໃຫ້ປະທານສະຫະພັນແມ່ຍິງເມືອງຈັນທະບູລີ ແລະ ຄະນະພັກ ຜູ້ຊີ້ນໍາວຽກງານຢູ່ແຕ່ລະບ້ານ ນໍາເອົາເຄື່ອງຈໍານວນດັ່ງກ່າວໄປມອບໃຫ້ປະຊາຊົນໃຫ້ທົ່ວເຖິງ ໂດຍມີພີທີເຊັນຮັບເຄື່ອງຈາກຄອບຄົວຄັກແນ່ ແລະ ເພື່ອຄວາມຖືກຕ້ອງຕາມຈໍານວນທີ່ກໍານົດໄວ້.
![](https://v2.vientianemai.net/wp-content/uploads/2021/11/252837333_1395670124181473_8881298197086993992_n-1024x687.jpg)
ສໍາລັບບ້ານເປົ້າໝາຍທີ່ໄດ້ຮັບຖົງປັນນໍ້າໃຈ ປະກອບມີ: ບ້ານໂພນສະຫວ່າງ 15 ຄອບຄົວ ໜອງທາເໜືອ 10 ຄອບຄົວ ດອນແດງ 13 ຄອບຄົວ ດົງປ່າແຫຼບ 30 ຄອບຄົວ ທົ່ງສ້າງນາງ 7 ຄອບຄົວ ໂພນຕ້ອງສະຫວາດ 31 ຄອບຄົວ ສະຫວ່າງ 16 ຄອບຄົວ ວັດຈັນ 8 ຄອບຄົວ ຊຽງຍືນ 13 ຄອບຄົວ ສີສະຫວາດ 28 ຄອບຄົວ ສີດໍາດວນ 7 ຄອບຄົວ ຂົວຫຼວງ 3 ຄອບຄົວ ແລະ ບ້ານທົ່ງຕູມອີກ 10 ຄອບຄົວ.
# ຂ່າວ & ພາບ : ວຽງມາ