ງານສຳມະນາທາງວິຊາການ ກ່ຽວກັບທ່າບົກທ່ານາແລ້ງ ແລະ ເຂດໂລຈິສຕິກພາກ ໃນຫົວຂໍ້” ທ່າແຮງການປ່ຽນແປງຂອງສະພາບແວດລ້ອມໂລຈິສຕິກໃນ ສປປ ລາວ” ຈັດຂຶ້ນວັນທີ 2 ພະຈິກ 2021 ທີ່ສຳນັກງານບໍລິສັດ ວຽງຈັນໂລຈິສຕິກພາກ ຈຳກັດ ບ້ານດົງໂພສີ ເມືອງຫາດຊາຍຟອງ ນະຄອນຫຼວງວຽງຈັນ ຈັດໂດຍບໍລິສັດ ວຽງຈັນໂລຈິສຕິກພາກ ຈຳກັດ ແລະ ອົງການສົ່ງເສີມການຄ້າຍີ່ປຸ່ນປະຈຳ ສປປ ລາວ ມີທ່ານ ສາຄອນ ພິລາງາມ ຜູ້ອຳນວຍການໃຫຍ່ທ່າບົກທ່ານາແລ້ງ ທ່ານ Katsuichi IWAKAMI ຫົວໜ້າອົງການສົ່ງເສີມການຄ້າຍີ່ປຸ່ນປະຈຳ ສປປ ລາວ ທ່ານ TeeChee Seng ຮອງປະທານບໍລິສັດ ວຽງຈັນໂລຈິສຕິກພາກ ຈຳກັດ ທ່ານ Yasushi KIKUCHI ຫົວໜ້າອົງການສົ່ງເສີມການຄ້າຍີ່ປຸ່ນປະຈຳລາວ (ຄົນໃໝ່) ນັກທຸລະກິດຍີ່ປຸ່ນ (ເຂົ້າຮ່ວມທາງອອນລາຍ) ແລະ ວິຊາການທີ່ກ່ຽວຂ້ອງທັງສອງຝ່າຍເຂົ້າຮ່ວມ.
ທ່ານ ສາຄອນ ພິລາງາມ ໄດ້ຍົກໃຫ້ເຫັນກ່ຽວກັບໂຄງການທ່າບົກທ່ານາແລ້ງໂດຍຫຍໍ້ ຈາກນັ້ນ ຝ່າຍຍີ່ປຸ່ນໄດ້ມີຄຳເຫັນແລກປ່ຽນບາງບັນຫາກ່ຽວກັບການບໍລິການຢູ່ທ່າບົກທ່ານາແລ້ງ ເປັນຕົ້ນ: ທ່າບົກທ່ານາແລ້ງມີບົດບາດສຳຄັນແນວໃດຕໍ່ກັບການເຊື່ອມຕໍ່ທາງລົດໄຟລາວ-ຈີນ ແລະ ທາງລົດໄຟລາວ-ໄທ ການຮັບສິນຄ້າຈາກປະເທດໄທໄປຍັງປະເທດຈີນ ກໍຄືຈາກປະເທດທີໜຶ່ງໄປປະເທດທີສາມ ການຈັດສົ່ງສິນຄ້າຂອງໂຮງງານຍີ່ປຸ່ນຢູ່ ສປປ ລາວ ໄປຍັງປະເທດຍີ່ປຸ່ນ ການເກັບຄ່າບໍລິການການຂົນສິນຄ້າ ແລະ ອື່ນໆທີ່ຝ່າຍຍີ່ປຸ່ນສົນໃຈໃນດ້ານການບໍລິການຢູ່ທ່າບົກທ່ານາແລ້ງຂອງບໍລິສັດ ວຽງຈັນໂລຈິສຕິກພາກ ຈຳກັດ ເຊິ່ງແຕ່ລະຄຳຖາມນັ້ນທ່ານ ສາຄອນ ພິລາງາມ ກໍໄດ້ອະທິບາຍໃຫ້ຂໍ້ມູນຢ່າງລະອຽດ ຈະແຈ້ງ ກ່ຽວກັບດ້ານການບໍລິການຕ່າງໆເປັນຕົ້ນ ທ່າບົກທ່ານາແລ້ງເປັນຈຸດເຊື່ອມຕໍ່ ແລະ ການບໍລິການຂົນສົ່ງ ເປັນຈຸດຮອງຮັບສິນຄ້າທີ່ຈະຂົນສົ່ງສິນຄ້າໄປຍັງປະເທດຕ່າງໆດ້ວຍທາງລົດໄຟ ໂດຍທ່າບົກທ່ານາແລ້ງ ຈະເປັນຜູ້ບໍລິການສິ່ງອຳນວຍຄວາມສະດວກດ້ານຕ່າງໆໃຫ້ແກ່ການຂົນສົ່ງສິນຄ້າທາງບົກຂອງບໍລິສັດຕ່າງໆ ໂດຍລວມແລ້ວ ງານສຳມະນາຄັ້ງນີ້ໄດ້ເຮັດໃຫ້ຜູ້ເຂົ້າຮ່ວມຝ່າຍຍີ່ປຸ່ນ ໄດ້ມີຄວາມເຂົ້າໃຈກ່ຽວກັບການບໍລິການຢູ່ທ່າບົກທ່ານາແລ້ງ ຂອງບໍລິສັດ ວຽງຈັນໂລຈິສຕິກພາກ ຈຳກັດ ຫຼາຍຂຶ້ນຕື່ມອີກ ຈະເປັນຂໍ້ມູນທີ່ເປັນປະໂຫຍດໃຫ້ແກ່ຝ່າຍຍີ່ນປຸ່ນນຳໄປກະຈ່າຍໃຫ້ບັນດານັກທຸລະກິດຍີ່ປຸ່ນ ໂດຍສະເພາະ ນັກທຸລະກິດຍີ່ປຸ່ນທີ່ມາລົງທຶນສ້າງຕັ້ງບໍລິສັດ ແລະ ໂຮງຈັກໂຮງງານຜະລິດສິນຄ້າຢູ່ ສປປ ລາວ ເພື່ອສົ່ງອອກຕ່າງປະເທດ ເປັນຕົ້ນແມ່ນປະເທດຍີ່ປຸ່ນ.
# ຂ່າວ & ພາບ : ສົມສະຫວັນ