ຄໍລຳປະຈຳວັນນີ້ ເລີ່ມດ້ວຍຂ່າວປິດໂຮງຮຽນຢູ່ອິນໂດເນເຊຍ ເພື່ອໜີໄພໂຄວິດ-19 ຕໍ່ໃສ່ໂຄງການສົ່ງເສີມສິ່ງແວດລ້ອມທີ່ອົດສະຕຣາລີ ແລະ ປິດທ້າຍກັບຂ່າວຄະດີຕົ້ມຕຸ໋ນທາງອິນເຕີເນັດຢູ່ສິງກະໂປ.
ທີ່ ອິນໂດເນເຊຍ: ຂ່າວຕ່າງປະເທດໃນວັນທີ 25 ເດືອນມີນາຜ່ານມານີ້ (ວຽງຈັນທາມ) ໄດ້ໃຫ້ຮູ້ວ່າ: ລັດຖະບານ ແລະ ສະພາຜູ້ແທນລາຊະດອນອິນໂດເນເຊຍໄດ້ຕົກລົງຍົກເລີກການສອບເສັງແຫ່ງຊາດສຳລັບນັກຮຽນປະຖົມ ມັດທະ ຍົມຕົ້ນ ແລະ ມັດທະຍົມປາຍ ຍ້ອນບັນຫາການແຜ່ລະບາດຂອງໂຄວິດ-19.
ການຕົກລົງຮ່ວມຂອງລັດຖະບານ ແລະ ລັດຖະສະພາຄັ້ງນີ້ໄດ້ເຜີຍແຜ່ຜ່ານລະບົບກອງປະຊຸມທາງໄກ (ຜ່ານຈໍວິດີໂອ) ໃນວັນທີ 23 ເດືອນມີນາປີນີ້ ສະມາຊິກລັດຖະສະພາຈາກພັກສະດຸ້ງແຫ່ງຊາດ (National Awakening Party) ໄດ້ມີຄຳເຫັນກ່ຽວກັບບັນຫານີ້ວ່າ “ຄາດວ່າໃນເດືອນເມສານີ້ ໂຄວິດ-19 ຍັງຄົງສືບຕໍ່ລະບາດຢູ່ ດັ່ງນັ້ນ ຈຶ່ງບໍ່ອາດຈະບັງຄັບໃຫ້ເຫຼົ່ານັກຮຽນມານັ່ງສອບເສັງພາຍໃຕ້ການຂົ່ມຂູ່ຂອງພະຍາດຮ້າຍແຮງນີ້ໄດ້” ຕາມແຜນການແລ້ວ ການສອບເສັງໃນທົ່ວປະເທດ (ປະຈຳປີ) ສຳລັບນັກຮຽນມັດທະຍົມປາຍນັ້ນຈະຈັດຂຶ້ນໃນລະຫວ່າງທ້າຍເດືອນມີນາ ຫາຕົ້ນເດືອນເມສາ ປີນີ້ ສ່ວນການສອບເສັງສຳລັບຂັ້ນມັດທະຍົມຕົ້ນ ແລະ ໂຮງຮຽນປະຖົມນັ້ນຈະຈັດຂຶ້ນໃນທ້າຍເດືອນເມສາ.
ທີ່ ອົດສະຕຣາລີ: ໂຄງການອະນຸຮັກສິ່ງແວດລ້ອມຢູ່ປະເທດອົດສະຕຣາລີນັ້ນ ເນັ້ນບົດບາດການມີສ່ວນຮ່ວມຂອງທ້ອງຖິ່ນເປັນສຳຄັນ ດັ່ງຂ່າວຕ່າງປະເທດທີ່ໃຫ້ຮູ້ໃນຕົ້ນເດືອນມີນາ 2019 ວ່າ: ທ່ານ ສະກອດ ມໍຣິສັນ ນາຍົກລັດຖະມົນຕີອົດສະຕຣາລີ ໄດ້ເປີດເຜີຍກ່ຽວກັບແຜນສະໜອງເປັນຈຳນວນ 22 ລ້ານໂດລາອົດສະຕຣາລີ (ປະມານ 15 ລ້ານປາຍໂດລາສະຫະລັດ) ໃຫ້ແກ່ບັນດາໂຄງການປົກປັກຮັກສາສິ່ງແວດລ້ອມລະດັບທ້ອງຖິ່ນໃນທົ່ວປະເທດ.
ທ່ານນາຍົກໃຫ້ເຫດຜົນກ່ຽວກັບເລື່ອງນີ້ວ່າ ປະຊາຊົນຢູ່ທ້ອງຖິ່ນຫັ້ນລະຮູ້ດີທີ່ສຸດກ່ຽວກັບຄວາມຈຳເປັນໃນການອະນຸຮັກສິ່ງແວດລ້ອມບ່ອນທີ່ພວກເຮົາດຳລົງຊີວິດຢູ່ ເງິນທີ່ສະໜອງໃຫ້ແກ່ໂຄງການນີ້ຈະນຳໃຊ້ເຂົ້າວຽກປູກຕົ້ນໄມ້ລຽບຕາມແຄມແມ່ນ້ຳສາຍຕ່າງໆ ແລະ ຕາມບໍລິເວນດິນຕົມ ເຮັດອະນາໄມຕາມສວນສາທາລະນະເຂດອະນຸຮັກ ແລະ ວຽກຟື້ນຟູເຂດດິນຊາຍຕາມແຄມຝັ່ງທະເລອື່ນໆ.
ເງິນສະໜັບສະໜູນ ຈຳນວນ 22 ລ້ານໂດລານັ້ນຈະຈັດສັນໃຫ້ກວ່າ 20 ໂຄງການ ໃນ 150 ເຂດເລືອກຕັ້ງທົ່ວປະເທດ ໂດຍແບ່ງລະອຽດໃຫ້ບັນດາສະໂມສອນທ້ອງຖິ່ນ ບັນດາກຸ່ມຊົນພື້ນເມືອງ ໂຮງຮຽນ ກໍຄື ບັນດາອົງການຈັດຕັ້ງຊຸມຊົນ ເຊິ່ງຈະໄດ້ຮັບບ້ວງເງິນຊ່ວຍເຫຼືອຕາມບໍລິມາດວຽກຂອງຕົນ ແຕ່ 2.500 ຫາ 20.000 ໂດລາອົດສະຕຣາລີ ເພື່ອອະນຸຮັກສັດພື້ນບ້ານ ຂະຫຍາຍເນື້ອທີ່ປູກຕົ້ນໄມ້ ເກັບມ້ຽນຂີ້ເຫຍື້ອ ສິ່ງໂສໂຄກ ແລະ ອື່ນໆ.
ທີ່ ສິງກະໂປ: ຂ່າວຕ່າງປະເທດໃຫ້ຮູ້ໃນວັນທີ 27 ເດືອນມີນາ ປີນີ້ (Vientiane Times) ເຫຍື່ອຂອງການຫຼອກລວງ ແລະ ການພະນັນຜ່ານເວັບໄຊຢູ່ສິງກະໂປ ໃນປີ 2019 ນັ້ນໄດ້ເສຍເງິນໄປເປັນຈຳນວນຢ່າງໜ້ອຍ 874.000 ໂດລາສະຫະລັດ ເຈົ້າໜ້າທີ່ຕຳຫຼວດສິງກະໂປ ໄດ້ໃຫ້ຮູ້ວ່າ: ໄດ້ຮັບລາຍງານກ່ຽວກັບເວັບໄຊຜິດກົດໝາຍດັ່ງກ່າວຈຳນວນຢ່າງໜ້ອຍ 13 ເລື່ອງ ໃນປີ 2019 ພວກທີ່ຕົກເປັນເຫຍື່ອຂອງການຫຼອກລວງທັງໝົດ ຖືກຊັກຊວນໃຫ້ຫຼິ້ນການພະນັນທາງອອນລາຍ ໂດຍເຊື່ອວ່າຈະມີວິທີສວຍໂອກາດໄດ້ກຳໄລຢ່າງມະຫາສານ ຕາມຄຳຕົວະຍົວະຂອງພວກຕົ້ມຕຸ໋ນ ໃນການລົງເງິນຫຼິ້ນການພະນັນນັ້ນ ຜູ້ເຂົ້າຮ່ວມຕ້ອງເປີດບັນຊີກັບທາງເວັບໄຊ ບ່ອນນີ້ລະຄືຈຸດທີ່ຖືກນັກຕົ້ມປອກລອກຈົນຖົງກ້ຽງເອີດເຕີດ !.