ສະຖາບັນຄົ້ນຄວ້າກົມໃຫຍ່ວິທະຍຸ ແລະ ໂທລະພາບແຫ່ງຊາດຈີນ ຈັດ “ສໍາມະນາກ່ຽວກັບການໂຄສະນາເຜີຍແຜ່ ແລະ ການນໍາໃຊ້ເຕັກໂນໂລຊີສື່ມວນຊົນຂອງລາວ” ໃນຮູບແບບທາງໄກ ຂຶ້ນວັນທີ 3 ພະ ຈິກ 2021 ໂດຍມີທ່ານ Chang Jin ຮອງຫົວໜ້າກົມການຮ່ວມມືສາກົນ ກົມໃຫຍ່ວິທະຍຸ ແລະ ໂທລະພາບແຫ່ງຊາດຈີນ ທ່ານ ຣັດສະໝີ ດວງສັດຈະ ເລຂາທິການສະມາຄົມນັກຂ່າວແຫ່ງ ສປປ ລາວ ທ່ານ Liu Linhai ຮອງຄະນະບໍດີສະຖາບັນຄົ້ນຄວ້າ ກົມໃຫຍ່ວິທະຍຸ ແລະ ໂທລະພາບແຫ່ງຊາດຈີນ ພ້ອມດ້ວຍສໍາມະນາກອນຈາກພາກສ່ວນຕ່າງໆທັງສູນກາງ ແລະ ທ້ອງຖິ່ນຂອງລາວ 70 ກວ່າທ່ານ ເຂົ້າຮ່ວມ.
![](https://v2.vientianemai.net/wp-content/uploads/2021/11/250600891_205712835033418_7340391149739311147_n-1024x537.jpg)
ສໍາມະນາຄັ້ງນີ້ ຈະດໍາເນີນແຕ່ວັນທີ 3-16 ພະຈິກ 2021 ເຊິ່ງມີຄວາມໝາຍສໍາຄັນຍິ່ງໃນການພັດທະນາຖັນແຖວສື່ມວນຊົນລາວໃຫ້ກ້າວໜ້າອີກຂັ້ນໜຶ່ງ ທັງເປັນການສ້າງເວທີແລກປ່ຽນປະສົບການ ຊ່ວຍຍົກລະດັບ ແລະ ພັດທະນາສື່ແບບໃໝ່ ໂດຍສະເພາະ ຈະລົງເລິກສົນທະນາ ແລະ ແລກປ່ຽນຫົວຂໍ້ຕ່າງໆກ່ຽວກັບສິ່ງທ້າທາຍ ແລະ ກາລະໂອກາດໃນການນໍາໃຊ້ສື່ແບບໃໝ່ (ສື່ອອນລາຍ) ການສ້າງສື່ແບບໃໝ່ໃຫ້ເປັນສື່ກະແສຫຼັກ ແລະ ເປັນທີ່ນິຍົມ ທິດທາງໃນການພັດທະນາສື່ມວນຊົນລາວໃນອະນາຄົດ ບົດຮຽນຕົວຈິງສື່ຫຼັກຂອງຈີນທີ່ໃຊ້ສື່ແບບໃໝ່ ການຮ່ວມມືດ້ານສື່ມວນຊົນ ລາວ-ຈີນ ແລະ ຫົວຂໍ້ສໍາຄັນອື່ນໆອີກ.
ນອກນີ້ ຍັງຈະໄດ້ສົນທະນາ ແລະ ແລກປ່ຽນຄໍາຄິດເຫັນບັນຫາຕ່າງໆທີ່ຕິດພັນກັບສື່ມວນຊົນ ແລະ ວຽກອື່ນໆທີ່ປິ່ນອ້ອມຈາກບັນດາຜູ້ຊ່ຽວຊານດ້ານວຽກງານຂ່າວ ແລະ ເຕັກນິກຈາກ ສປ ຈີນ ພ້ອມທັງຢ້ຽມຊົມສະຖານທີ່ທ່ອງທ່ຽວທີ່ສໍາຄັນຕ່າງໆຂອງຈີນແບບອອນລາຍ ຕື່ມອີກ.
![](https://v2.vientianemai.net/wp-content/uploads/2021/11/250697587_590629795598444_8518981391205959326_n-1024x561.jpg)
# ຂ່າວ & ພາບ : ສະບາໄພ