ວັນທີ 12 ຕຸລາ 2021 ທີ່ອົງການກາແດງລາວ ມີພິທີມອບ-ຮັບເງິນ ແລະ ເຄື່ອງຊ່ວຍເຫຼືອໃນວຽກງານຕ້ານພະຍາດໂຄວິດ-19 ຈາກຄອບຄົວຂອງທ່ານ ກ້ອງຟ້າ ແລະ ທ່ານ ນາງ ອາມອນ ພູມມະສັກ ພ້ອມດ້ວຍລູກຫຼານ ແລະ ພະນັກງານຮ້ານຟ້າວັດທະນາ ມອບເງິນສົດຈຳນວນ 16 ລ້ານກີບ ທ່ານ ອິນປົງ ຫານຊົມພູ ຄົນເຊື້ອຊາດລາວທີ່ປະເທດອົດສະຕຣາລີ ມອບເງິນສົດຈຳນວນ 600 ໂດລາສະຫະລັດ ປະມານ 6 ລ້ານກວ່າກີບ ຮ້ານອາຫານສະຕະວັດທີ 21 ມອບເງິນສົດຈຳນວນ 5 ລ້ານກີບ ບໍລິສັດ ດາວເຮືອງ ແລະ ຮ້ານອາຫານ ຟູຈິວາລະ ມອບນ້ຳດື່ມ 100 ແກັດ ແລະ ກາເຟ ມູນຄ່າ 7 ລ້ານກີບ ຄອບຄົວມາລີນີ ອິນທະວົງ ມອບເງິນສົດຈຳນວນ 5 ລ້ານກີບ ລວມມູນຄ່າການຊ່ວຍເຫຼືອໃນຄັ້ງນີ້ 39 ລ້ານກວ່າກີບ ກ່າວຮັບໂດຍ ທ່ານ ຮສ ດຣ ພູທອນ ເມືອງປາກ ປະທານອົງການກາແດງລາວ ມີພະນັກງານທີ່ກ່ຽວຂ້ອງ ເຂົ້າຮ່ວມເປັນສັກຂີພະຍານ.
ໂອກາດນີ້ ທ່ານ ຮສ ດຣ ພູທອນ ເມືອງປາກ ໄດ້ສະແດງຄວາມຂອບໃຈຕໍ່ທາງ 5 ພາກສ່ວນທີ່ໄດ້ປະກອບສ່ວນວັດຖຸປັດໄຈຊ່ວຍເຫຼືອໃນວຽກງານຕ້ານພະຍາດໂຄວິດ-19 ທ່ານຍັງໄດ້ໃຫ້ຮູ້ຕື່ມອີກວ່າ ໃນໄລຍະຜ່ານມາອົງການກາແດງລາວ ໄດ້ແຕ່ງຕັ້ງຄະນະສະເພາະກິດຂອງອົງການກາແດງລາວ ລວມທັງພະນັກງານ ແລະ ອາສາສະໝັກກາແດງ ປະສານງານ ແລະ ເຮັດວຽກຮ່ວມກັບຄະນະສະເພາະກິດແຕ່ລະແຂວງ ປະກອບສ່ວນໃນວຽກງານໂຄສະນາເຜີຍແຜ່ມາດຕະການປ້ອງກັນການຕິດເຊື້ອ ແຜ່ເຊື້ອ ຢູ່ໃນຊຸມຊົນ ແລະ ສູນຈຳກັດບໍລິເວນ ນຳພາເຮັດກິດຈະກຳອອກກຳລັງກາຍ ອະນາໄມ ບຳບັດສຸຂະພາບຈິດໃຫ້ແກ່ຜູ້ຈຳກັດບໍລິເວນຢູ່ສູນຈຳກັດບໍລິເວນ ພົ່ນຢາຂ້າເຊື້ອຢູ່ໃນຊຸມຊົນ ສູນຈຳກັດບໍລິເວນ ແຈກຢາຍອາຫານຢູ່ສູນຈຳກັດບໍລິເວນ ແລະ ໂຮງໝໍພາກສະໜາມບາງແຫ່ງທີ່ມີການຊ່ວຍເຫຼືອຈາກກາແດງ ຈັດຕັ້ງໃຫ້ມີລົດກູ້ໄພປະຈຳຢູ່ສູນຈຳກັດບໍລິເວນເພື່ອແກ້ໄຂສຸກເສີນ ແລະ ສົ່ງຄົນເຈັບທີ່ຢູ່ສູນຈໍາກັດບໍລິເວນໄປໂຮງໝໍ.
ສຳລັບເງິນຈຳນວນດັ່ງກ່າວນີ້ ທາງອົງການກາແດງລາວ ຈະໄດ້ນຳໄປປະກອບສ່ວນສະໜອງອາຫານ ນ້ຳດື່ມ ແລະ ເຄື່ອງສຸຂະອະນາໄມ ໃຫ້ແກ່ຜູ້ຈຳກັດບໍລິເວນຢູ່ພາຍໃນສູນຈຳກັດບໍລິເວນ ແລະ ຜູ້ທີ່ຕິດເຊື້ອພະຍາດໂຄວິດ-19 ທີ່ພວມປິ່ນປົວຢູ່ໂຮງໝໍພາກສະໜາມ ໃນທົ່ວປະເທດ ພ້ອມທັງໃຫ້ຄຳໝັ້ນສັນຍາວ່າ ຈະນຳເງິນຊ່ວຍເຫຼືອດັ່ງກ່າວໃຫ້ຖືກກັບຈຸດປະສົງ ແລະ ເປົ້າໝາຍໃຫ້ເກີດປະໂຫຍດສູງສຸດ.
# ຂ່າວ & ພາບ : ບຸນມີ