ພິທີມອບ-ຮັບວັກແຊັງປ້ອງກັນພະຍາດໂຄວິດ-19 ໂດຍການຊ່ວຍເຫຼືອລ້າຈາກລັດຖະບານ ສປ ຈີນ ໃຫ້ແກ່ ສປປ ລາວ ຈັດຂຶ້ນວັນທີ 13 ຕຸລາ 2021 ຢູ່ສະໜາມບິນສາກົນວັດໄຕ ກ່າວມອບໂດຍທ່ານ ຈຽງ ຈ້າຍຕຸ່ງ ເອກອັກຄະລັດຖະທູດ ສປ ຈີນ ປະຈຳລາວ ແລະ ໃຫ້ກຽດກ່າວກ່າວຮັບໂດຍທ່ານ ກິແກ້ວ ໄຂຄໍາພິທູນ ຮອງນາຍົກລັດຖະມົນຕີ ມີທ່ານ ບຸນແຝງ ພູມມະໄລສິດ ລັດຖະມົນຕີກະຊວງສາທາລະນະສຸກ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
![](https://v2.vientianemai.net/wp-content/uploads/2021/10/245077997_858487841700870_659506636953772813_n-1-1024x568.jpg)
ທ່ານ ກິແກ້ວ ໄຂຄໍາພິທູນ ກ່າວວ່າ: ເປັນອີກວັນໜຶ່ງ ທີ່ພັກ ລັດ ແລະ ປະຊາຊົນລາວບັນດາເຜົ່າທົ່ວປະເທດ ມີຄວາມເບີກບານ ແລະ ພາກພູມໃຈເປັນຢ່າງຍິ່ງທີ່ໄດ້ຮັບຢາວັກແຊັງປ້ອງກັນພະຍາດໂຄວິດ-19 ເພີ່ມຕື່ມຈໍານວນ 1 ລ້ານໂດສ (ຊິໂນຟາມ) ພ້ອມດ້ວຍເຂັມສັກຢາຈາກລັດຖະບານ ແຫ່ງ ສປ ຈີນ ທີ່ມອບໂດຍຜ່ານ ສະຫາຍ ຈຽງ ຈ້າຍຕຸ່ງ ເພື່ອໃຊ້ເຂົ້າໃນການຕ້ານ ແລະ ສະກັດກັ້ນການແຜ່ລະບາດຂອງພະຍາດໂຄວິດ-19 ຢູ່ ສປປ ລາວ ພັກ ລັດ ແລະ ປະຊາຊົນລາວທຸກທົ່ວໜ້າ ຕີລາຄາສູງ ແລະ ຂໍສະແດງຄວາມຂອບອົກຂອບໃຈຢ່າງຈິງໃຈ ຮູ້ບຸນຄຸນຢ່າງລົ້ນເຫຼືອ ຕໍ່ການຊ່ວຍເຫຼືອອັນບໍລິສຸດ ຈິງໃຈ ລໍ້າຄ່າ ທັນເວລາ ແລະ ສະເໝີຕົ້ນສະເໝີປາຍ ຂອງພັກ ລັດ ແລະ ປະຊາຊົນຈີນ ໃນຄັ້ງນີ້.
![](https://v2.vientianemai.net/wp-content/uploads/2021/10/245034935_4553710628054220_1487721117850137252_n-1024x1024.jpg)
ວັກແຊັງຈຳນວນດັ່ງກ່າວ ທີ່ໄດ້ຮັບໃນຄັ້ງນີ້ ຈະສົມທົບກັບວັກແຊັງ ສປ ຈີນ ຊ່ວຍເຫຼືອຜ່ານມາ 3.302.000ໂດສ (ບໍ່ລວມທີ່ກະຊວງປ້ອງກັນປະເທດຮັບ 400.000 ໂດສ) ແລະ ຮ່ວມກັບການຊ່ວຍເຫຼືອຂອງປະເທດຕ່າງໆ ອົງການສາກົນອື່ນໆ ຈະຊ່ວຍໃຫ້ ສປປ ລາວ ສາມາດບັນລຸຄາດໝາຍສັກວັກແຊັງໃຫ້ປະຊາ ກອນທົ່ວປະເທດໄດ້ 50% ຂຶ້ນໄປ ໃນປີ 2021 ເພື່ອຕ້ານແລະ ສະກັດກັ້ນໂຄວິດ-19.
![](https://v2.vientianemai.net/wp-content/uploads/2021/10/245237152_1008229573297101_1799682880849094822_n.jpg)
ພວກເຮົາຮູ້ດີ ແລະ ເຫັນແຈ້ງທີ່ສຸດວ່າໃນສະພາບການລະບາດຂອງໂຄວິດ-19 ທີ່ຜັນແປໄປຢ່າງສັບສົນ ໄວວາ ຄາດຄະເນໄດ້ຍາກ ອັນໄດ້ສ້າງຄວາມເສຍຫາຍໃຫຍ່ຫຼວງດ້ານຊີວິດ ແລະ ສົ່ງຜົນກະທົບຮ້າຍແຮງໃສ່ທຸກໆດ້ານຂອງການດໍາລົງຊີວິດກໍຄືການພັດທະນາຢູ່ໃນໂລກ ນັ້ນ ສປ ຈີນ ໄດ້ມີບົດບາດສໍາຄັນພົ້ນເດັ່ນໃນການຊ່ວຍເຫຼືອປະຊາຄົມໂລກ ດ້ວຍການສະໜອງຢາວັກແຊັງທີ່ມີຄຸນນະພາບ ອຸປະກອນການແພດສະໜອງ ແລະ ແລກປ່ຽນຂໍ້ມູນຂ່າວສານອັນຈໍາເປັນ ສົ່ງຄະນະຜູ້ຊ່ຽວຊານ ນັກວິຊາການ ຈຳນວນຫຼວງຫຼາຍ ໄປຊ່ວຍເຫຼືອປະເທດຕ່າງໆໃນໂລກທີ່ພວມປະເຊີນໜ້າກັບການແຜ່ລະບາດຂອງພະຍາດດັ່ງກ່າວລວມທັງ ສປປ ລາວ.
![](https://v2.vientianemai.net/wp-content/uploads/2021/10/245236437_443477960450863_3664621056755149325_n-1024x780.jpg)
ສຳລັບ ສປປ ລາວ ເຮົາໄດ້ຢຶດໝັ້ນຈຸດໝາຍທີ່ວາງອອກຄື: ໃຫ້ມີຜູ້ຕິດເຊື້ອໜ້ອຍທີ່ສຸດ ຜູ້ເສຍຊີວິດໜ້ອຍທີ່ສຸດ ແລະ ຫັນທົ່ວສັງຄົມໄປສູ່ການດໍາລົງຊີວິດປົກກະຕິຕາມວິຖີໃໝ່ ໃຫ້ວ່ອງໄວ ກວ້າງຂວາງທົ່ວເຖິງນັ້ນ ສາມາດຍາດໄດ້ຜົນສໍາເລັດສໍາຄັນຫຼາຍດ້ານ ສະແດງອອກຄື ມາຮອດວັນທີ 13 ຕຸລາ 2021 ມີຜູ້ຕິດເຊື້ອ 29.964 ຄົນ ເທົ່າກັບ 0,41% ຂອງພົນລະເມືອງ ປົວດີ 22.431 ຄົນ ເທົ່າກັບ 74,90% ຂອງຜູ້ຕິດເຊື້ອທັງໝົດເສຍຊີວິດ 35 ຄົນ ເທົ່າກັບ 0,11% ຂອງຜູ້ຕິດເຊື້ອທັງໝົດ ຫຼື ເທົ່າກັບ 0,00047% ຂອງພົນລະເມືອງ ສັກຢາວັກແຊັງ ເຂັ້ມ 1 ໄດ້ 3.079.546 ຄົນ ເທົ່າກັບ 42% ຂອງພົນລະເມືອງ ສັກຢາວັກແຊັງຄົບ 2 ເຂັ້ມ ໄດ້ 2.295.297 ຄົນ ເທົ່າກັບ 31.28% ຂອງພົນລະເມືອງ ພ້ອມນັ້ນກໍຈະສືບສູ້ຊົນສັກວັກຊີນໃຫ້ປະຊາຊົນໃນກຸ່ມເປົ້າໝາຍຂອງທົ່ວປະເທດໃຫ້ໄດ້ຢ່າງທົ່ວເຖິງ ແລະ ສຳເລັດຕາມລະດັບຄາດໝາຍທີ່ວາງໄວ້.
ຮູບຂ່າວ (ນັດ 13.10.21)