ໄຊທານີ ເປັນເມືອງໜຶ່ງທີ່ມີທ່າແຮງໃນການຜະລິດກະສິກຳເປັນສິນຄ້າ ເປັນຕົ້ນແມ່ນຜະລິດເຂົ້າ ແລະ ພືດຜັກຕ່າງໆ ປັດຈຸບັນ ຊາວກະສິກອນກຳລັງຂຸ້ນຂ້ຽວເກັບກ່ຽວເຂົ້ານາປີ ແລະ ກະກຽມການປູກພືດລະດູແລ້ງໃຫ້ທັນຕາມລະດູການ.
![](https://v2.vientianemai.net/wp-content/uploads/2021/10/244785288_240904648096997_5202981191517001582_n.jpg)
ທ່ານ ທອງສຸກ ບົວລີຂັນ ຫົວໜ້າຫ້ອງການກະສິກຳ ແລະ ປ່າໄມ້ເມືອງໄຊທານີ ໃຫ້ສຳພາດວັນທີ 12 ຕຸລາ ປີ 2021 ໃຫ້ຮູ້ວ່າ ສຳລັບປີ 2021 ການຜະລິດເຂົ້ານາປີຂອງຊາວກະສິກອນ ເນື້ອທີ່ແຜນການແມ່ນ 15.300 ເຮັກຕາ ປູກເຂົ້າຈ້າວ 550 ເຮັກຕາ ແນວພັນ 1.224 ໂຕນ ສະມັດຕະພາບສະເລ່ຍ 4,6 ໂຕນຕໍ່ເຮັກຕາ ຜ່ານການຈັດຕັ້ງປະຕິບັດຕົວຈິງ ແມ່ນປະຕິບັດໄດ້ 100% ຂອງເນື້ອທີ່ແຜນການ ໃນນັ້ນ ດຳດ້ວຍກົນຈັກ 220 ເຮັກຕາ ດຳດ້ວຍແຮງງານຄົນ 5.868 ເຮັກຕາ ນາຫວ່ານ 9.410 ເຮັກຕາ ນາຢອດ 22 ເຮັກຕາ ມາຮອດວັນທີ 11 ຕຸລາ ປະຊາຊົນເກັບກ່ຽວສຳເລັດ 5.355 ເຮັກຕາ ເທົ່າກັບ 35% ຄາດວ່າຈະສຳເລັດໃນຕົ້ນເດືອນໜ້ານີ້.
![](https://v2.vientianemai.net/wp-content/uploads/2021/10/244700491_398334078464810_3010634302247593278_n-1024x576.jpg)
ນອກຈາກນີ້ ຊາວກະສິກອນຍັງສຸມໃສ່ກະກຽມປູກພືດຜັກຕ່າງໆ ໃນເນື້ອນທີ່ແຜນການ 3.47 ເຮັກຕາ (ແຜນການທ້າຍປີ 944 ເຮັກຕາ) ມາຮອດປັດຈຸບັນ ປະຕິບັດໄດ້ 641 ເຮັກຕາ ເທົ່າກັບ 98,61% ປູກໝາກໄມ້ໃຫ້ເນື້ອທີ່ແຜນການ 170 ເຮັກຕາ ປັດຈຸບັນປະຕິບັດໄດ້ 372 ເຮັກຕາ ເທົ່າກັບ 218,82% ປູກເຫັດຕາມແຜນການ 6 ທ້າຍປີໃຫ້ໄດ້ 1,5 ລ້ານເບົ້າ ປັດຈຸບັນປະຕິບັດໄດ້ 1.030.000 ເບົ້າ ພ້ອມກັນນັ້ນກໍໄດ້ກະກຽມ ກວດກາ ສ້ອມແປງຈັກສູບນໍ້າເພື່ອສະໜອງນໍ້າເຂົ້າໃນການຜະລິດເຂົ້ານາແຊງອີກດ້ວຍ.
![](https://v2.vientianemai.net/wp-content/uploads/2021/10/244792147_885740842080351_2478214533748874392_n-1021x1024.jpg)
# ຂ່າວ: ອົ່ນ ໄຟສົມທອງ