ແຂວງສະຫວັນນະເຂດ ອອກໜັງສືຮັບຮອງບໍ່ຄຳ-ທອງເຊໂປນ ຂອງບໍລິສັດລ້ານຊ້າງ ມີເນໂຣນສ໌ ລິມິເຕັດ (ລຊມລ) ເປັນເຂດ ‘ສີຂຽວ’ ວັນທີ 6 ຕຸລາ 2021 ພາຍຫຼັງ 30 ວັນ ທີ່ບໍ່ພົບກໍລະນີຕິດເຊື້ອພະຍາດໂຄວິດ-19 ໃໝ່ໃນຂົງເຂດໂຄງການ ເຊິ່ງນັບແຕ່ພົບກໍລະນີຢັ້ງຢືນຕິດເຊື້ອທຳອິດ ວັນທີ 22 ສິງຫາ 2021 ບໍ່ຄຳ-ທອງ ເຊໂປນ ມີການລາຍງານກໍລະນີຕິດເຊື້ອສະສົມ 33 ຄົນ ໃນນີ້ ເປັນຜູ້ຮັບເໝົາ 25 ຄົນ ແລະ ພະນັກງານບໍລິສັດ ລຊມລ 8 ຄົນ ໂດຍທຸກກໍລະນີແມ່ນຕິດພັນກັບກໍລະນີຕິດເຊື້ອໃນເບື້ອງຕົ້ນ ໃນຜູ້ຮັບເໝົາຂົນສົ່ງ ແລະ ຫຼາຍກໍລະນີກໍໄດ້ກວດພົບຢູ່ນອກສະໜາມ ດ້ວຍການດຳເນີນມາດຕະການກວດເຊື້ອພະຍາດໂຄວິດ-19 ແລະ ຈຳກັດບໍລິເວນ.
ຈໍານວນຜູ້ຕິດເຊື້ອເຫຼົ່ານັ້ນ ໄດ້ຮັບການປິ່ນປົວຢູ່ສູນປິ່ນປົວທີ່ພາກລັດກຳນົດ ແລະ ທຸກຄົນໄດ້ປິ່ນປົວຫາຍດີຢ່າງປອດໄພ ໂດຍໄດ້ສືບຕໍ່ຈໍາກັດບໍລິເວນ 14 ວັນຢູ່ສູນຈຳກັດບໍລິເວນ ທີ່ລັດຖະບານກຳນົດໃຫ້ ແລະ ຍັງໄດ້ກັກຕົວຢູ່ເຮືອນຂອງຕົນເອງຕື່ມອີກ 14 ວັນ ນັບແຕ່ພົບກໍລະນີຕິດເຊື້ອທຳອິດ ລຊມລ ໄດ້ດຳເນີນການກວດເຊື້ອພະຍາດໂຄວິດ-19 ຫຼາຍກວ່າ 15.500 ຕົວຢ່າງ ໃຫ້ພະນັກງານ ແລະ ຜູ້ຮັບເໝົາຂອງ ລຊມລ ແລະ ບໍ່ພົບກໍລະນີຕິດເຊື້ອເພີ່ມຕື່ມ ລຊມລ ຍັງສະໜອງການກວດເຊື້ອໃຫ້ຊຸມຊົນທ້ອງຖິ່ນເຊັ່ນກັນ ໃນຂະນະທີ່ການປິດເມືອງທີ່ຍືດຍາວ ແລະ ຂໍ້ຈຳກັດຕ່າງໆໄດ້ສົ່ງຜົນກະທົບຕໍ່ການດຳລົງຊີວິດ ເຮັດໃຫ້ພວກເຮົາຫ່າງໄກຈາກຄອບຄົວ ແລະ ຈາກກິດຈະກຳທີ່ມັກ-ຮັກຕ່າງໆ ກໍລະນີຕິດເຊື້ອພະຍາດໂຄວິດ-19 ໃນຊຸມຊົນຢູ່ ສປປ ລາວ ຍັງສືບຕໍ່ແຜ່ລະບາດໃນວົງກວ້າງ ລຊມລ ກໍສືບຕໍ່ປະຕິບັດຕາມາດຕະການປ້ອງກັນພະຍາດດັ່ງກ່າວຢ່າງສະໝ່ຳສະເໝີ ເພື່ອຮັບປະກັນຄວາມປອດໄພຂອງພະນັກງານ ຜູ້ຮັບເໝົາ ແລະ ຊຸມຊົນທ້ອງຖິ່ນ.
ລຊມລ ໄດ້ຍົກລະດັບມາດຕະການດ້ານສຸຂະອະນາໄມ ການຈຳກັດບໍລິເວນ ການຄົ້ນຫາຜູ້ສຳຜັດໃກ້ຊິດ ແລະ ການກວດຫາເຊື້ອຢ່າງຕັ້ງໜ້າ ແລະ ທັນການ ທີ່ສອດຄ່ອງກັບການປ້ອງກັນ ແລະ ຮັບມືການລະບາດທີ່ລັດຖະບານວາງອອກ ເພື່ອໃຫ້ສາມາດລະບຸແຫຼ່ງທີ່ມາຂອງການຕິດເຊື້ອ ແລະ ແຍກປ່ຽວກໍລະນີສ່ຽງທັນທີ ເພື່ອຕັດວົງຈອນການຕິດເຊື້ອໃນເວລາທີ່ພົບກໍລະນີຕິດເຊື້ອຢູ່ພາກສະໜາມ ບໍລິສັດໄດ້ລັອກດາວພາກສະໜາມທັນທີ ແລະ ເຮັດວຽກຢ່າງໃກ້ຊິດກັບອຳນາດການປົກຄອງເມືອງ ແຂວງ ແລະ ຂັ້ນສູນກາງ ເຊັ່ນດຽວກັບຜູ້ຮັບເໝົາທ້ອງຖິ່ນ ເພື່ອປ້ອງກັນການແຜ່ລະບາດໃນວົງກວ້າງ ຍ້ອນການສະໜັບສະໜູນຂອງພະແນກສາທາລະນະສຸກແຂວງສະຫວັນນະເຂດ ພະນັກງານ ແລະ ຜູ້ຮັບເໝົາຂອງ ລຊມລ 5.000 ຄົນ (99% ຂອງແຮງງານທັງໝົດ) ໄດ້ຮັບວັກຊີນປ້ອງກັນພະຍາດໂຄວິດ-19 ທຸກຄົນທີ່ຈະເຂົ້າພາກສະໜາມເຊໂປນ ຫ້ອງການຢູ່ນະຄອນຫຼວງວຽງຈັນ ແລະ ສະຫວັນນະເຂດ ຕ້ອງມີໃບຢັ້ງຢືນການສັກວັກຊີນ.
ລຊມລ ມີຄວາມມຸ່ງໝັ້ນເຮັດວຽກຮ່ວມມືຢ່າງໃກ້ຊິດກັບລັດຖະບານ ເພື່ອຍົກລະດັບຄວາມສາມາດໃນການປ້ອງກັນການແຜ່ລະບາດຂອງພະຍາດໂຄວິດ-19 ໂດຍໄດ້ສະໜອງເຄື່ອງມືກວດເຊື້ອພະຍາດໂຄວິດ-19 ແບບໄວອັງຕີເຈນ ພ້ອມທັງສະໜັບສະໜູນອຸປະກອນ ແລະ ສະໜອງທຶນໂດຍກົງໃຫ້ເມືອງວິລະບູລີ ໃນການກະກຽມໂຮງໝໍພາກສະໜາມ ສະໜັບສະໜູນໃຫ້ແຂວງສະຫວັນນະເຂດ ໃນການຍົກລະດັບສູນຈຳກັດບໍລິເວນ ແລະ ເຄື່ອງກວດເຊື້ອແບບ PCR ໃນວຽກງານຂອງແຂວງ ເພື່ອປົກປ້ອງປະຊາກອນໃຫ້ສາມາດຫຼີກເວັ້ນຈາກການລະບາດຂອງພະຍາດໂຄວິດ-19 ປັດຈຸບັນ ລຊມລ ໄດ້ສະໜັບສະໜູນລັດຖະບານ ໃນການປ້ອງກັນ ແລະ ແກ້ໄຂການລະບາດພະຍາດໂຄວິດ-19 ມູນຄ່າ 450.000 ໂດລາສະຫະລັດ.
ນັບແຕ່ເລີ່ມດຳເນີນງານ ປີ 2003 ລຊມລ ໄດ້ປະກອບສ່ວນ 1,5 ຕື້ ເພື່ອເປັນລາຍຮັບໂດຍກົງໃຫ້ລັດຖະບານ ບວກກັບຫຼາຍຮ້ອຍລ້ານໂດລາສະຫະລັດ ທີ່ເປັນຜົນປະໂຫຍດທາງອ້ອມ ໂດຍຜ່ານການພັດທະນາຊຸມຊົນ ການສ້າງວຽກເຮັດງານທຳ ການເຝິກອົບຮົມ ແລະ ການພັດທະນາສີມືແຮງງານ ແລະ ການສະໜັບສະໜູນຫົວໜ່ວຍທຸລະກິດທ້ອງຖິ່ນຢູ່ແຂວງສະຫວັນນະເຂດ ແລະ ສປປ ລາວ.
# ຂ່າວ & ພາບ : ສະບາໄພ