ທ່ານ ແສງ ສຸຂະທິວົງ ເອກອັກຄະລັດຖະທູດວິສາມັນຜູ້ມີອໍານາດເຕັມ ສປປ ລາວ ປະຈຳລາຊະອານາຈັກໄທ ຕ້ອນຮັບການເຂົ້າຢ້ຽມອຳລາຂອງທ່ານນາງ Maria Alicia Cuzzoni de Sonschein ເອກອັກຄະລັດຖະທູດວິສາມັນຜູ້ມີອຳນາດເຕັມ ສ ອາກຊັງຕິນ ປະຈຳ ສປປ ລາວ ທີ່ມີສຳນັກງານຕັ້ງຢູ່ບາງກອກ ລາຊະອານາຈັກໄທ ວັນທີ 5 ຕຸລາ 2021 ໃນໂອກາດທີ່ສຳເລັດໜ້າທີ່ການທູດປະຈໍາ ສປປ ລາວ.
ໂອກາດນີ້ ທ່ານ ແສງ ສຸຂະທິວົງ ກໍໄດ້ຕາງໜ້າໃຫ້ປະທານປະເທດ ແລະ ລັດຖະມົນຕີກະຊວງການຕ່າງປະເທດ ສປປ ລາວ ສະແດງຄວາມຊົມເຊີຍ ແລະ ຕີລາຄາສູງຕໍ່ຜົນສຳເລັດຂອງການປະຕິບັດໜ້າທີ່ການທູດຢ່າງຫ້າວຫັນຂອງທ່ານນາງ Maria Alicia Cuzzoni de Sonschein ໃນການສົ່ງເສີມສາຍພົວພັນມິດຕະພາບ ແລະ ການຮ່ວມມື ລະຫວ່າງ ສປປ ລາວ ແລະ ສ ອາກຊັງຕິນ ກໍຄືລະຫວ່າງສອງສະຖານເອກອັກຄະລັດຖະທູດລາວ ແລະ ອາກຊັງຕິນ ໃຫ້ມີທ່າຂະຫຍາຍຕົວເພີ່ມຂຶ້ນທັງໃນຂອບການຮ່ວມມືສອງຝ່າຍ ແລະ ຫຼາຍຝ່າຍ ກໍຄືການສະໜັບສະໜູນເຊິ່ງກັນ ແລະ ກັນໃນເວທີສາກົນ ເພື່ອຜົນປະໂຫຍດຂອງສອງຝ່າຍລາວ ແລະ ອາກຊັງຕິນ ພ້ອມນີ້ທ່ານ ແສງ ສຸຂະທິວົງ ຍັງໄດ້ອວຍພອນໃຫ້ທ່ານນາງ Maria Alicia Cuzzoni de Sonschein ມີສຸຂະພາບເຂັ້ມແຂງ ແລະ ເດີນທາງກັບຄືນປະເທດດ້ວຍຄວາມສະຫວັດດີພາບ ພ້ອມທັງຫວັງວ່າທ່ານທູດອາກຊັງຕິນ ຈະມີຄວາມຊົງຈຳອັນດີ ແລະ ກັບຄືນມາຢ້ຽມຢາມ ສປປ ລາວ ອີກ ໃນອະນາຄົດ.
ທ່ານນາງ Maria Alicia Cuzzoni de Sonschein ໄດ້ສະແດງຄວາມຂອບໃຈທ່ານ ແສງ ສຸຂະທິວົງ ທີ່ໄດ້ໃຫ້ການຕ້ອນຮັບຢ່າງອົບອຸ່ນ ແລະ ຝາກຄວາມຂອບໃຈຢ່າງສູງໄປຍັງທ່ານປະທານປະເທດ ລັດຖະບານ ແລະ ປະຊາຊົນລາວ ທີ່ໄດ້ໃຫ້ການຮ່ວມມືທີ່ດີ ແລະ ອຳນວຍຄວາມສະດວກທຸກຢ່າງ ຕະຫຼອດໄລຍະການປະຕິບັດໜ້າທີ່ການທູດຂອງຕົນປະຈຳ ສປປ ລາວ ເຊິ່ງເຮັດໃຫ້ບັນລຸຜົນສຳເລັດຢ່າງຈົບງາມ ພ້ອມນີ້ ທ່ານຍັງໄດ້ສະແດງຄວາມດີໃຈ ແລະ ພາກພູມໃຈທີ່ໄດ້ມີໂອກາດໄປຢ້ຽມຢາມ ແລະ ທ່ຽວຊົມສະຖານທີ່ຕ່າງໆຢູ່ນະຄອນຫຼວງວຽງຈັນ ແລະ ແຂວງຫຼວງພະບາງ ໃນໂອກາດທີ່ຕົນໄປຍື່ນສານຕາຕັ້ງຕໍ່ພະນະທ່ານ ບຸນຍັງ ວໍລະຈິດ ປະທານປະເທດ ສປປ ລາວ ປີ 2017 ແລະ ໄດ້ພົບປະບັນດາຄະນຳຂອງກະຊວງການຕ່າງປະເທດ ແລະ ຂະແໜງການທີ່ກ່ຽວຂ້ອງຂອງ ສປປ ລາວ ເພື່ອປຶກສາຫາລືຫຼາຍຂົງເຂດວຽກງານ ພ້ອມທັງໄດ້ສະແດງຄວາມເສຍດາຍທີ່ບໍ່ມີໂອກາດເດີນທາງໄປຢ້ຽມອຳລາການນຳຂອງ ສປປ ລາວ ແລະ ໄປທ່ຽວຊົມສະຖານທີ່ທຳມະຊາດ ແລະ ວັດທະນະທຳອັນສວຍງາມຂອງ ສປປ ລາວ ຍ້ອນການແຜ່ລະບາດຂອງພະຍາດໂຄວິດ-19 ແຕ່ກໍຈະຊອກໂອກາດກັບໄປຢ້ຽມຢາມໃນຖານະນັກທ່ອງທ່ຽວ ເພາະ ສປປ ລາວ ມີສະຖານທີ່ທ່ອງທ່ຽວທີ່ສວຍສົດງົດງາມຫຼາຍແຫ່ງ.
ການພົວພັນ ແລະ ການຮ່ວມມືສອງຝ່າຍ ລາວ-ອາກຊັງຕິນ ແມ່ນຢູ່ໃນລະດັບປົກກະຕິດີ ໂດຍໄດ້ມີການແລກປ່ຽນສານອວຍພອນເຊິ່ງກັນ ແລະ ກັນ ເນື່ອງໃນໂອກາດວັນສຳຄັນຕ່າງໆຂອງຊາດ ສປປ ລາວ ແລະ ສ ອາກຊັງຕິນ ສ້າງຕັ້ງສາຍພົວພັນການທູດນຳກັນ ວັນທີ 24 ກໍລະກົດ 1975.
# ຂ່າວ & ພາບ : ສະບາໄພ