ທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດ ສປປ ລາວ ສົນທະນາທາງໂທ ລະສັບກັບທ່ານນາງ Marise Payne ລັດຖະມົນຕີກະຊວງການຕ່າງປະເທດ ແລະ ລັດຖະມົນຕີຮັບຜິດ ຊອບວຽກງານແມ່ຍິງອົດສະຕຣາລີ ວັນທີ 6 ຕຸລາ 2021 ຢູ່ກະຊວງການຕ່າງປະເທດ ເພື່ອສືບຕໍ່ຮັດແໜ້ນສາຍພົວພັນມິດຕະພາບ ແລະ ການຮ່ວມມືອັນດີງາມ ລະຫວ່າງ ລາວ ແລະ ອົດສະຕຣາລີ.
ການໂອ້ລົມໂທລະສັບທາງໄກຄັ້ງນີ້ ທັງສອງຝ່າຍໄດ້ຕີລາຄາສູງ ແລະ ຢໍ້າຄືນສາຍພົວພັນມິດຕະພາບອັນຍາວນານ ແລະ ການຮ່ວມມືອັນດີງາມຕະຫຼອດໄລຍະຜ່ານມາ ນັບແຕ່ສອງປະເທດສ້າງຕັ້ງສາຍພົວພັນການທູດນໍາກັນ ວັນທີ 15 ມັງກອນ 1952 ເຊິ່ງທັງສອງຝ່າຍຈະຮ່ວມກັນສະເຫຼີມສະຫຼອງວັນສ້າງ ຕັ້ງສາຍພົວພັນການທູດ ລາວ ແລະ ອົດສະຕຣາລີ ຄົບຮອບ 70 ປີ ໃນປີ 2022 ຢ່າງຟົດຟື້ນ ແລະ ມີຄວາມໝາຍສໍາຄັນ ໃນນີ້ ທ່ານ ສະເຫຼີມໄຊ ກົມມະສິດ ໄດ້ຕາງໜ້າໃຫ້ລັດຖະບານ ແລະ ປະຊາຊົນລາວ ສະແດງຄວາມຮູ້ບຸນຄຸນ ແລະ ຂອບໃຈລັດຖະບານ ແລະ ປະຊາຊົນອົດສະຕຣາລີ ທີ່ໃຫ້ການສະໜັບສະໜູນ ແລະ ຊ່ວຍເຫຼືອເພື່ອການພັດທະນາແກ່ ສປປ ລາວ ໃນຂົງເຂດຕ່າງໆໃນຊຸມປີຜ່ານມາ ໂດຍສະ ເພາະ ນັບແຕ່ປີ 2022 ເປັນຕົ້ນໄປ ລັດຖະບານອົດສະຕຣາລີຈະເພີ່ມທຶນການສຶກສາ ຈາກ 30 ທຶນ ເປັນ 60 ທຶນຕໍ່ປີ ແລະ ລວມເຖິງການຊ່ວຍເຫຼອເພີ່ມຕື່ມຂອງອົດສະຕຣາລີດ້ານເຕັກນິກການປ້ອງກັນ ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ໃນໄລຍະຜ່ານມາ ແລະ ແຜນການຊ່ວຍເຫຼືອໃນອະນາຄົດຕໍ່ໜ້າ.
ພ້ອມນີ້ ທັງສອງຝ່າຍຍັງໄດ້ຢໍ້າຄືນທີ່ຈະເຮັດວຽກຢ່າງໃກ້ຊິດຮ່ວມກັບປະເທດສະມາຊິກອາຊຽນ ແລະ ອົດສະຕຣາລີ ເພື່ອເຮັດໃຫ້ການການພົວພັນຮ່ວມມື ອາຊຽນ-ອົດສະຕຣາລີ ກ້າວຂຶ້ນສູ່ລະດັບໃໝ່ ໃນໂອກາດທີ່ ສປປ ລາວ ເປັນປະເທດຜູ້ສານງານ ອາຊຽນ-ອົດສະຕຣາລີ ປີ 2021-2024 ລວມທັງຂໍ້ສະເໜີຂອງອົດສະຕຣາລີ ໃນການຍົກລະດັບການພົວພັນຮ່ວມມື ອາຊຽນ-ອົດສະຕຣາລີ ຈາກຄູ່ຮ່ວມມືຍຸດທະສາດ ຂຶ້ນເປັນຄູ່ຮ່ວມມືຍຸດທະສາດຮອບດ້ານ ນອກນີ້ ທ່ານ ສະເຫຼີມໄຊ ກົມມະສິດ ຍັງໄດ້ສະແດງຄວາມຂອບໃຈຝ່າຍອົດສະຕຣາລີ ທີ່ໄດ້ໃຫ້ການສະໜັບສະໜູນ ແລະ ຊ່ວຍເຫຼືອແກ່ ສປປ ລາວ ໃນການກະ ກຽມເປັນປະທານອາຊຽນ ປີ 2024 ໂດຍສະເພາະການສົ່ງພະນັກງານ ສປປ ລາວ ໄປເຝິກງານຢູ່ສຳນັກ ງານຜູ້ຕາງໜ້າຖາວອນ ສປປ ລາວ ປະຈຳອາຊຽນ ພ້ອມທັງໄດ້ປືກສາຫາລືເພື່ອຮັດແໜ້ນການຮ່ວມມືໃນຂົງເຂດພາກພື້ນ ແລະ ສາກົນ ທີ່ສອງຝ່າຍມີຄວາມສົນໃຈຮ່ວມກັນ.
# ຂ່າວ & ພາບ : ສະບາໄພ