ເພື່ອປະກອບສ່ວນໃນການຕ້ານ ແລະ ສະກັດກັ້ນການແຜ່ລະບາດຂອງພະຍາດໂຄວິດ-19 ໃຫ້ສື່ມວນຊົນ ຫ່າງໄກຈາກພະຍາດດັ່ງກ່າວ ບໍລິສັດ AI-Sport ຈຳກັດ ໄດ້ນຳຜ້າອັດປາກ-ດັງ 50 ອັນ ມູນຄ່າ 750.000 ກີບ ມາມອບໃຫ້ໜັງສືພິມວຽງຈັນໃໝ່ ວັນທີ 6 ຕຸລາ 2021 ເຊິ່ງມອບໂດຍທ່ານ ແກ່ນຄຳ ມ່ວນເມືອງໄຊ ຜູ້ຊ່ວຍອໍານວຍການບໍລິສັດ AI-Sport ຈຳກັດ ແລະ ຮັບໂດຍທ່ານາງ ແກ້ວຊ້ອນ ຈັນທະນາມ ຫົວໜ້າບັນນາທິການໜັງສືພິມວຽງໃໝ່ ມີພາກສ່ວນກ່ຽວຂ້ອງ ເຂົ້າຮ່ວມ.
ໂອກາດນີ້ທ່ານນາງ ແກ້ວຊ້ອນ ຈັນທະນາມ ກໍໄດ້ສະແດງຄວາມຂອບໃຈບໍລິສັດ AI-Sport ຈຳ ກັດ ທີ່ເຫັນໄດ້ຄວາມສຳຄັນ ແລະ ເປັນຫ່ວງເປັນໄຍຕໍ່ສຸຂະພາບ ກໍຄືຄວາມປອດໄພຂອງພະນັກງານສື່ມວນຊົນ ພ້ອມທັງຈະນຳເອົາເຄື່ອງຈຳນວນດັ່ງກ່າວແຈກຢາຍໃຫ້ພະນັກງານນໍາໃຊ້ໃຫ້ເກີດຜົນປະໂຫຍດ ນອກນີ້ທ່ານຍັງໄດ້ອວຍພອນໃຫ້ຄະນະຜູ້ບໍລິຫານ ແລະ ພະນັກງານຂອງບໍລິສັດ AI-Sport ຈຳກັດ ຈົ່ງຊື້ໄດ້ຂາຍໝານ ບັນລຸຕາມເປົ້າໝາຍທີ່ຕັ້ງງໄວ້ ແລະ ສືບຕໍ່ໃຫ້ການສະໜັບໜູນສື່ມວນຊົນ ເວົ້າສະເພາະໜັງສືພິມວຽງຈັນໃໝ່ ໄປເລື້ອຍໆ.
ບໍລິສັດ AI-Sport ຈຳກັດ ເປັນບໍລິສັດທີ່ຜະລິດ ແລະ ຈໍາໜ່າຍເຄື່ອງກີລາ ມາໄດ້ 1 ປີກວ່າ ເຊິ່ງຜ້າອັດປາກ-ດັງທີ່ນໍາມາມອບໃນຄັ້ງນີ້ ກໍແມ່ນໜຶ່ງໃນບັນດາຜະລິດຕະພັນຂອງບໍລິສັດດັ່ງກ່າວ ທີ່ບໍລິສັດເປັນຜູ້ຜະລິດເອງ ສາມາດກັນນໍ້າ ກັນຝຸ່ນ ປ້ອງກັນພະຍາດໂຄວິດ-19 ແລະ ສາມາດນຳໄປຊັກແລ້ວໃຊ້ຄືນໄດ້ ສໍາລັບແຜນການປະກອບສ່ວນຜ້າອັດປາກ-ດັງໃຫ້ສືມວນຊົນຂອງບໍລິສັດ AI-Sport ຈຳກັດ ແມ່ນຈະມອບໃຫ້ສື່ມວນຊົນ 9 ພາກສ່ວນ ລວມ 500 ອັນ ມູນຄ່າ 7 ລ້ານກວ່າກີບ ໃນນີ້ປະກອບມີສູນໂຄ ສະນາຂ່າວສານ 100 ອັນ ໂທລະພາບລາວສະຕາຣ 50 ອັນ ໜັງສືພິມວຽງຈັນໃໝ່ 50 ອັນ ໜັງສືພິມເສດຖະກິດ-ການຄ້າ 50 ອັນ ໂທລະພາບແຫ່ງຊາດ 50 ອັນ ໜັງສືພິມວຽງຈັນທາມ 50 ອັນ ໜັງສືພິມປະຊາຊົນ 50 ອັນ ກົມສື່ມວນຊົນກະຊວງ ປກສ 50 ອັນ ແລະ ວິທະຍຸແຫ່ງຊາດ 50 ອັນ.