ໃນວັນທີ 28 ກັນຍາ 2021 ຢູ່ຫ້ອງວ່າການແຂວງຄໍາມ່ວນ ອົງການພັດທະນາສາກົນແຫ່ງປະເທດສະຫະລັດອາເມຣິກາ ຕາງໜ້າໂດຍທ່ານ ໄກຍະສິດ ເດດວົງສາ ໄດ້ນໍາເອົາເຄື່ອງອຸປະໂພກ-ບໍລິໂພກ ອຸປະກອນປ້ອງກັນພະຍາດ ລວມມູນຄ່າ 323.494.000 ກີບ ມາມອບໃຫ້ແກ່ແຂວງຄໍາມ່ວນ ໂດຍການກ່າວຮັບຂອງທ່ານ ບຸນມີ ພິມມະສອນ ຫົວໜ້າສະເພາະກິດເພື່ອປ້ອງກັນຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ຂັ້ນແຂວງ ພ້ອມດ້ວຍບັນດາທ່ານໃນກອງເລຂາຄະນະສະເພາະກິດ .
ຕໍ່ມາໃນວັນດຽວກັນ ບໍລິສັດ ຊີໂນ-ອາກຣີໂປຣ ຕັສ ຈໍາກັດ ໄດ້ເຂົ້າປະກອບສ່ວນເງິນຈໍານວນ 100 ລ້ານກີບ ເຂົ້າໃນວຽກງານປ້ອງກັນ ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ພາຍໃນແຂວງຄໍາມ່ວນ.
ໂດຍຜ່ານການຕິດຕາມ ແລະ ປະເມີນຂອງການນໍາແຂວງກັບຄະນະສະເພາະກິດຂັ້ນແຂວງ ແລະ ອົງການອະນາໄມໂລກ ເຫັນວ່າສະພາບການລະບາດຂອງພະຍາດໂຄວິດ-19 ຢູ່ໃນຊຸມຊົນເທສະບານເມືອງທ່າແຂກ ແລະ ບ້ານຕ່າງໆໄດ້ຫຼຸດລົງ ແຕ່ກໍຍັງມີຜູ້ຕິດເຊື້ອເປັນຈໍານວນຫຼາຍໃນພະນັກງານ-ກໍາມະກອນຈີນ ແລະ ລາວ ຢູ່ໂຮງງານເກືອກາລີລາວຄາຍຢວນ ຈໍາກັດ ເຊິ່ງມີຄວາມສ່ຽງສູງທີ່ຈະແຜ່ລະບາດສູ່ຊຸມຊົນ ໂດຍສະເພາະແມ່ນເມືອງທ່າແຂກ.
ດັ່ງນັ້ນ ຈຶ່ງມີຄວາມຈໍາເປັນຕ້ອງໄດ້ສືບຕໍ່ປະຕິບັດມາດຕະການປ້ອງກັນ ແລະ ສະກັດກັ້ນພະຍາດດັ່ງກ່າວບໍ່ໃຫ້ແຜ່ເຊື້ອເພີ່ມຂຶ້ນສູ່ວົງກວ້າງ ດັ່ງນັ້ນ ທາງແຂວງຈຶ່ງໄດ້ຂະຫຍາຍເວລາປິດການເຂົ້າ – ອອກເມືອງເພີ້ມໄປອີກ 14 ວັນ ເລີ່ມແຕ່ວັນ ທີ 28 ກັນຍາ ເຖິງວັນທີ 11 ຕຸລາ 2021 ຕາມຄໍາສັ່ງຂອງທ່ານເຈົ້າແຂວງໆຄໍາມ່ວນ ວ່າດ້ວຍການເພີ່ມທະວີຄວາມເຂັ້ມງວດໃນການຈັດຕັ້ງປະຕິບັດມາດຕະການປ້ອງກັນ ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ຢູ່ແຂວງຄໍາມ່ວນ.