ວັນທີ 27 ກັນຍາ 2021 ທີ່ດ່ານຂົວມິດຕະພາບລາວ-ໄທ ແຫ່ງທີ 1 ນະຄອນຫຼວງວຽງຈັນ ກົມຄວາມຮ່ວມມືລະຫວ່າງປະເທດ ກະຊວງການຕ່າງປະເທດໄທ ຕາງໜ້າລັດຖະບານ ໄດ້ສົ່ງມອບເຄື່ອງໃຊ້ການແພດຈຳນວນ 9 ລາຍການ ແລະ ອຸປະກອນການແພດຈຳນວນ 47 ລາຍການ ມູນຄ່າ 4.694.926 ບາດ ຫຼື ປະມານ 1.643.224.100 ກີບ ໃຫ້ແກ່ໂຮງໝໍເມືອງໂພນໂຮງ ແຂວງວຽງຈັນ ຂອງ ສປປ ລາວ ເພື່ອນໍາໃຊ້ເຂົ້າໃນວຽກງານການແພດ ໂດຍສະເພາະ ການສະກັດກັ້ນການແຜ່ລະບາດພະຍາດໂຄວິດ-19 ໃຫ້ມີປະສິດທິຜົນ ໂດຍມີທ່ານ ບຸນສະຖຽນ ພິມມະແສນ ຫົວຫນ້າພະແນກເງິນຊ່ວຍເຫຼືອຈາກຕ່າງປະເທດ ກະຊວງສາທາລະນະສຸກ ເປັນຜູ້ກ່າວຮັບ.
ການຊ່ວຍເຫຼືອຄັ້ງນີ້ ເປັນໜື່ງໃນກິດຈະກຳການຮ່ວມມືເພື່ອສະເຫຼີມສະຫຼອງຄົບຮອບ 70 ປີ ແຫ່ງການສ້າງຕັ້ງສາຍພົວພັນທາງການທູດ ລາວ-ໄທ ໃຫ້ມີຄວາມແໜ້ນແຟ້ນຍິ່ງຂື້ນ.
.
# ຂ່າວ – ພາບ : ລັດເວລາ