ສະຖານະການການລະບາດພະຍາດໂຄວິດ-19 ຢູ່ ສປປ ລາວ ຍັງບໍ່ມີທ່າອ່ຽງຈະຫຼຸດລົງ ໂດຍສະເພາະຢູ່ນະຄອນຫຼວງວຽງຈັນ ໂດຍວັນທີ 28 ກັນຍາ 2021 ໄດ້ກວດພົບຜູ້ຕິດເຊື້ອໂຄວິດໃໝ່ຈໍານວນ 500 ຄົນໃນນັ້ນ ນໍາເຂົ້າ 29 ຄົນ ຕິດເຊື້ອໃນຊຸມຊົນ 471 ຄົນ ໃນນີ້ຫຼາຍກວ່າໝູ່ແມ່ນນະຄອນຫຼວງວຽງຈັນ 363 ຄົນ ຮອງລົງມາແມ່ນແຂວງຫຼວງພະບາງ 29 ຄົນ.
![](https://v2.vientianemai.net/wp-content/uploads/2021/09/243609998_163239842649871_6187353921638523951_n-1024x592.jpg)
ທ່ານ ດຣ ສີສະຫວາດ ສຸທານີລະໄຊ ຮອງຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກຖະແຫຼງຂ່າວປະຈໍາວັນທີ 28 ກັນຍາ 2021 ຢູ່ກະຊວງສາທາລະນະສຸກວ່າ: ວັນນີ້ ໄດ້ເກັບຕົວຢ່າງມາກວດເຊື້ອທັງໝົດ 5.911 ຄົນ ຜົນວິໄຈ ກວດພົບຜູ້ຕິດເຊື້ອໃໝ່ຈໍານວນ 500 ຄົນ ໃນນີ້ ມີກໍລະນີນໍາເຂົ້າ 29 ຄົນ ຄື ຈາກແຂວງສະຫວັນນະເຂດ 20 ຄົນ ນະຄອນຫຼວງວຽງຈັນ 6 ຄົນ ຈໍາປາສັກ 3 ຄົນ ສໍາລັບການຕິດເຊື້ອໃນຊຸມຊົນມີທັງໝົດ 471 ຄົນຈາກນະຄອນຫຼວງວຽງຈັນ 363 ຄົນ ຫຼວງພະບາງ 29 ຄົນ ຄໍາມ່ວນ 19 ຄົນ ຈໍາປາສັກ 16 ຄົນ ໄຊສົມບູນ 13 ຄົນ ແຂວງວຽງຈັນ 12 ຄົນ ບໍ່ແກ້ວ 7 ຄົນ ສະຫວັນນະເຂດ 7 ຄົນ ບໍລິຄໍາໄຊ 3 ຄົນ ຊຽງຂວາງ 1 ຄົນ ແລະ ແຂວງສາລະວັນ 1 ຄົນ.
ມາຮອດວັນທີ 28 ກັນຍາ ນີ້ ລວມມີຍອດຜູ້ຕິດເຊື້ອສະສົມມີທັງໝົດ 22.941 ຄົນ ເສຍຊີວິດສະສົມ 16 ຄົນ ແລະ ຄົນເຈັບກໍາລັງປິ່ນປົວ 5.088 ຄົນ. ສໍາລັບກຸ່ມການຕິດເຊື້ອໃນຊຸມຊົນຢູ່ນະຄອນຫຼວງໃນຈໍານວນ 363 ຄົນ ສ່ວນຫຼາຍຍັງແມ່ນກຸ່ມຜູ້ສໍາພັດໃກ້ຊິດກັບຜູ້ຕິດເຊື້ອຜ່ານມາ ເຊິ່ງລາຍລະອຽດມີດັ່ງນີ້:
- ພະນັກງານໂຮງງານ Trio: 115 ຄົນ
- ພະນັກງານໂຮງງານ Alpilao: 1 ຄົນ
- ໂຮງງານກຽນວິໄລ: 3 ຄົນ
- ບໍລິສັດຊີມັງ 1 ຄົນ (ເອື້ອຍຕິດເຊື້ອ ເຮັດວຽກຢູ່ໂຮງງງານ Trio )
- ພະນັກງານໂຮງໝໍມິດຕະພາບ 1 ຄົນ (ພະຍາບານພະແນກສຸກເສີນ)
- ວິທະຍາຄານການແພດກອງທັບ 1 ຄົນ
- ຕະຫຼາດທົ່ງຂັນຄຳ 35 ຄົນ
- ຕະຫຼາດອົດຊີ 2 ຄົນ
- ຕະຫຼາດທ່າງ່ອນ 3 ຄົນ
ສ່ວນທີ່ເຫຼືອ ທີມງານກຳລັງສອບຖາມເອົາຂໍ້ມູນຕື່ມອີກ ລາຍລະອຽດຈະແຈ້ງຜ່ານທາງສື່ອອນລາຍໃຫ້ຊາບພາຍຫຼັງ.
ມາຮອດປັດຈຸບັນ ສະພາບການລະບາດໃນຊຸມຊົນຢູ່ລາວເຮົາຍັງມີສະພາບໜ້າເປັນຫ່ວງຫຼາຍທີ່ສຸດ ແລະ ເປັນສັນຍານເຕືອນບອກວ່າ ທຸກຄົນແມ່ນມີຄວາມສ່ຽງສູງທີ່ສາມາດຕິດເຊື້ອພະຍາດນີ້ໄດ້ທຸກເວລາ ຖ້າຫາກບັນດາທ່ານລະເຫຼີງໃນການປ້ອງກັນຕົນເອງ ແລະ ບໍ່ປະຕິບັດມາດຕະການ ຈົ່ງພ້ອມໃຈກັນປະຕິບັດມາດຕະການຕ່າງໆທີ່ທາງຄະນະສະເພາະກິດວາງອອກຢ່າງເຄັ່ງຄັດ ແລະ ເຂັ້ມງວດ ເພື່ອຫລຸດຜ່ອນການຕິດເຊື້ອໃນຊຸມຊົນໃຫ້ຫຼຸດລົງ
# ຂ່າວ – ພາບ : ລັດເວລາ