ທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ ເດີນທາງໄປຢ້ຽມຢາມເມືອງວິລະບູລີ ເພື່ອ ກວດກາມາດຕະການຮັບມືກັບການລະບາດຂອງພະຍາດໂຄວິດ-19 ວັນທີ 21 ກັນຍາ 2021 ໂດຍໄດ້ຮັບການຕ້ອນຮັບຈາກທ່ານ ຄຳຜຸຍ ສີບຸນເຮືອງ ເຈົ້າເມືອງວິລະບູລີ ແລະ ພາກສ່ວນກ່ຽວຂ້ອງ.
ໂອກາດນີ້ ທ່ານ ຄຳຜຸຍ ສີບຸນເຮືອງ ກໍໄດ້ສະເໜີເຈດຈຳນົງໃນການລົດລະດັບຄວາມສ່ຽງຕໍ່ການລະບາດຂອງພະຍາດໂຄວິດ-19 ໃຫ້ໂຄງການຄຳ-ທອງເຊໂປນ ຂອງບໍລິສັດ ລ້ານຊ້າງ ມິເນໂຣນສ໌ ລິມິເຕັດ (ລຊມລ) ໃຫ້ພົ້ນອອກຈາກເຂດແດງ ມາເປັນເຂດເຫຼືອງ ພາຍຫຼັງທີ່ພາກສະໜາມບໍ່ຄຳ-ທອງ ເຊໂປນ ບໍ່ ພົບການຕິດເຊື້ອໃໝ່ຜ່ານມາ 17 ວັນຕິດຕໍ່ກັນ ປັດຈຸບັນ ທຸກໆບ້ານໃນເມືອງວິລະບູລີ ໄດ້ຖືກປະກາດໃຫ້ເປັນເຂດປອດເຊື້ອພະຍາດໂຄວິດ-19 ເປັນບ້ານຂຽວ ໂດຍການຜ່ອນຜັນມາດຕະການຈຳນວນໜຶ່ງ.
ພາຍຫຼັງທີີ່ພົບກໍລະນີຕິດເຊື້ອພະຍາໂຄວິດ-19 ໃນພະນັກງານຂອງບໍລິສັດຮັບເໝົາຂົນສົ່ງຈຳນວນໜຶ່ງ ໂຄງການບໍໍ່ຄຳ-ທອງເຊໂປນ ກໍໄດ້ຍົກລະດັບມາດຕະການດ້ານສຸຂະອະນາໄມ ການຈຳກັດບໍລິເວນ ການຄົ້ນຫາຜູ້ສຳຜັດໃກ້ຊິດ ແລະ ການກວດຫາເຊື້ອຢ່າງຕັ້ງໜ້າ ແລະ ທັນການ ສອດຄ່ອງກັບຄຳສັ່ງການປ້ອງກັນ ແລະ ຮັບມືກັບການລະບາດ ທີ່ລັດຖະບານລາວໄດ້ວາງອອກ ເພື່ອໃຫ້ສາມາດລະບຸແຫຼ່ງທີ່ມາຂອງການຕິດເຊື້ອ ລວມທັງການແຍກປ່ຽວຕໍ່ກໍລະນີສ່ຽງ ເພື່ອຕັດວົງຈອນການຕິດເຊື້ອທັນທີທີ່ໄດ້ກວດພົບການຕິດເຊື້ອ ບໍລິສັດກໍໄດ້ລ໋ອກດາວພາກສະໜາມເຊໂປນ ໂດຍຫ້າມຄົນເຂົ້າ-ອອກ ແລະ ເຮັດວຽກຢ່າງໃກ້ຊິດກັບອຳນາດການປົກຄອງເມືອງ ແຂວງ ແລະ ຂັ້ນສູນກາງ ກໍຄືບໍລິສັດຮັບເໝົາທ້ອງຖິ່ນ ເພື່ອປ້ອງກັນບໍ່ໃຫ້ມີການລະບາດ ເພີ່ມຕື່ມ.
ໂດຍລວມ ໄດ້ມີການລາຍງານກໍລະນີຕິດເຊື້ອຢູ່ສະໜາມເຊໂປນ 33 ຄົນ ໃນນີ້ ຜູ້ຮັບເໝົາ 25 ຄົນ ແລະ ພະນັກງານ ລຊມລ 8 ຄົນ ທຸກໆກໍລະນີແມ່ນຕິດພັນກັບຜູ້ຮັບເໝົາຂົນສົ່ງ 25 ຄົນ ດັ່ງທີ່ໄດ້ລາຍງານເບື້ອງຕົ້ນ ບຸກຄົນທີ່ຕິດເຊື້ອແມ່ນໄດ້ເຂົ້າຮັບການປິ່ນປົວຢູ່ສູນປິ່ນປົວຢູ່ແຂວງສະຫວັນນະເຂດຕາມທີ່ພາກລັດໄດ້ກຳນົດໃຫ້ ແລະ ໄດ້ປິ່ນປົວຫາຍດີຢ່າງປອດໄພ ພາຍຫຼັງສຳເລັດການປິ່ນປົວ ທຸກໆກໍລະນີໄດ້ສືບຕໍ່ຈຳກັດບໍລິເວນຢູ່ສູນຄົບຕາມກຳນົດເວລາທີ່ລັດຖະບານກຳນົດໃຫ້ ແລະ ຍັງໄດ້ກັກຕົວຢູ່ເຮືອນຂອງຕົນ ຕື່ມອີກ 7 ວັນ.
ນັບແຕ່ວັນທີ 22 ສິງຫາ ທີ່ເລີ່ມມີການຕິດເຊື້ອ ລຊມລ ໄດ້ດຳເນີນການກວດເຊື້ອພະຍາດໂຄວິດ-19 ໃຫ້ພະນັກງານ ແລະ ຜູ້ຮັບເໝົາ 11.000 ຕົວຢ່າງ ໃນນີ້ນັບແຕ່ວັນທີ 5 ກັນຍາ ເປັນຕົ້ນມາ ກໍບໍ່ພົບຜູ້ຕິດເຊື້ອອີກເລີຍ ຍ້ອນການສະໜັບສະໜູນຂອງພະແນກສາທາລະນະສຸກແຂວງສະຫວັນນະເຂດ ພະນັກງານ ແລະ ຜູ້ຮັບເໝົາຂອງ ລຊມລ 5.000 ຄົນ (99% ຂອງແຮງງານທັງໝົດ) ໄດ້ຮັບການສັກວັກຊີນຕ້ານພະຍາດໂຄວິດ-19 ທຸກຄົນທີ່ຈະເຂົ້າພາກສະໜາມເຊໂປນ ຫ້ອງການຢູ່ນະຄອນຫຼວງວຽງຈັນ ແລະ ສະຫວັນນະເຂດ ຕ້ອງມີໃບຢັ້ງຢືນການສັກວັກຊີນ ລຊມລ ໄດ້ຕັ້ງໜ້າປະຕິບັດຕາມລະບຽບການຈຳກັດບໍລິເວນ ແລະ ກວດຫາເຊື້ອຂອງລັດຖະບານ ກໍຄືຄະນະສະເພາະກິດວາງອອກສະເໝີມາ.
ລຊມລ ມີຄວາມມຸ່ງໝັ້ນເຮັດວຽກຮ່ວມມືຢ່າງໃກ້ຊິດກັບລັດຖະບານ ເພື່ອຍົກລະດັບຄວາມສາມາດໃນການປ້ອງກັນການແຜ່ລະບາດຂອງພະຍາດໂຄວິດ-19 ໂດຍໄດ້ສະໜອງເຄື່ອງມືກວດເຊື້ອພະຍາດໂຄວິດ-19 ແບບໄວ ພ້ອມທັງສະໜັບສະໜູນອຸປະກອນ ທຶນຮອນຈຳນວນໜຶ່ງແກ່ເມືອງວິລະບູລີ ໃນການກະກຽມໂຮງໝໍພາກສະໜາມ ພ້ອມທັງໃຫ້ການສະໜັບສະໜູນແກ່ແຂວງສະຫວັນນະເຂດ ໃນການຍົກລະດັບສູນຈຳກັດບໍລິເວນ ແລະ ເຄື່ອງກວດເຊື້ອແບບ PCR ເຂົ້າໃນວຽກງານຂອງແຂວງ ເພື່ອປົກປ້ອງປະຊາກອນ ໃຫ້ສາມາດຫຼີກເວັ້ນຈາກການລະບາດຂອງພະຍາດໂຄວິດ-19 ປັດຈຸບັນ ລຊມລ ໄດ້ສະໜັບສະໜູນລັດຖະບານລາວໃນການປ້ອງກັນ ແລະ ແກ້ໄຂການລະບາດພະຍາດໂຄວິດ-19 ທັງໝົດ 450.000 ໂດລາສະຫະລັດ ແລະ ນັບແຕ່ໄດ້ເລີ່ມດຳເນີນງານ ປີ 2003 ລຊມລ ໄດ້ປະກອບສ່ວນ 1,5 ຕື້ໂດລາສະຫະລັດ ເພື່ອເປັນລາຍຮັບໂດຍກົງແກ່ລັດຖະບານ ບວກກັບຫຼາຍຮ້ອຍລ້ານໂດລາສະຫະລັດ ທີ່ເປັນຜົນປະໂຫຍດທາງອ້ອມ ໂດຍຜ່ານການພັດທະນາຊຸມຊົນ ການສ້າງວຽກເຮັດງານທຳ ການເຝິກອົບຮົມ ແລະ ການພັດທະນາສີມືແຮງງານ ກໍຄືສະໜັບສະໜູນຫົວໜ່ວຍທຸລະກິດທ້ອງຖິ່ນ ຢູ່ແຂວງສະຫວັນນະເຂດ ແລະ ສປປ ລາວ.
# ຂ່າວ – ພາບ : ສະບາໄພ