ຄະນະໂຄສະນາອົບຮົມນະຄອນຫຼວງວຽງຈັນ (ນວ) ຈັດກອງປະຊຸມຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງພັກ ຕິດພັນກັບມະຕິກອງປະຊຸມໃຫຍ່ຄັ້ງທີ VII ຂອງອົງຄະນະພັກ ນວ ຜ່ານລະບົບທາງໄກ ວັນທີ 16 ກັນຍາ 2021 ທີ່ຫ້ອງວ່າການ ນວ ເປັນປະທານຂອງສະຫາຍ ອານຸພາບ ຕຸນາລົມ ເລຂາທິການສູນກາງພັກ ເລຂາຄະນະພັກ ປະທານສະພາປະຊາຊົນນະຄອນຫຼວງວຽງຈັນ ມີຮອງເລຂາຄະນະພັກ ກໍາມະການປະຈໍາພັກ ກໍາມະການພັກນະຄອນຫຼວງວຽງຈັນ ເລຂາ ຮອງເລຂາຄະນະພັກ 9 ເມືອງ ພ້ອມດ້ວຍຫົວໜ້າໂຄສະນາອົບຮົມ ຫ້ອງການແຜນການ ແລະ ການລົງທຶນ ຫ້ອງວ່າການຄະນະຈັດຕັ້ງ ແລະ ອົງການກວດກາພັກ-ລັດເມືອງ ນອກນີ້ ຍັງມີ ເລຂາຄະນະພັກ ກອງບັນຊາການ ປກຊ-ປກສ ຄະນະພັກ ຄະນະນໍາພະແນກການ-ອົງການທຽບເທົ່າຂັ້ນ ນວ ເຂົ້າຮ່ວມຢ່າງພ້ອມພຽງ.
ການຈດກອງປະຊຸມຄັ້ງນີ້ ຢູ່ໃນໄລຍະທີ່ຄະນະພັກ-ຄະນະນຳ ສະມາຊິກພັກ ພະນັກງານ ແລະ ປະຊາຊົນຊາວ ນວ ພວມສຸມໃສ່ການປະຕິບັດມາດຕະການຕ່າງໆໃນການຕ້ານ ແລະ ສະກັດກັ້ນການແຜ່ລະບາດຂອງພະຍາດໂຄວິດ-19 ທີ່ມີທ່ວງທ່າຂະຫຍາຍເປັນວົງກວ້າງ ແຕ່ເນື່ອງຈາກພວກເຮົາເອງກໍມີຄວາມຈໍາເປັນຕ້ອງໄດ້ຈັດກອງປະຊຸມເພື່ອເປັນການຈັດຕັ້ງຜັນຂະຫຍາຍມະຕິດັ່ງກ່າວໃຫ້ຫັນເຂົ້າສູ່ລວງເລິກຂອງທຸກຂົງເຂດວຽກງານໃນ ນວ ແຕ່ນີ້ຮອດປີ 2025 ແຕ່ຫົວທີ ດັ່ງນັ້ນ ເພື່ອຮັບປະກັນໃຫ້ແກ່ການຈັດຕັ້ງປະຕິບັດມາດຕະການປ້ອງກັນ ແລະ ສະກັດກັ້ນພະຍາດໂຄວິດ-19 ຈຶ່ງໄດ້ຈັດກອງປະຊຸມຜ່ານວີດີໂອທາງໄກ ເຊິ່ງໄດ້ແບ່ງອອກເປັນ 28 ຈຸດ ໃນນີ້ 19 ຈຸດຢູ່ ນວ ແລະ 9 ຈຸດ ຢູ່ຕາມ 9 ເມືອງ ໂດຍລວມແລ້ວ ເນື້ອໃນຈິດໃຈເປັນການຜັນຂະຫຍາຍມະຕິຂອງພັກຖືເອົາເປັນການກຽມຄວາມພ້ອມດ້ານເນື້ອໃນ-ແຜນການ ເພື່ອເປັນບ່ອນອີງໃຫ້ແກ່ຄະນະພັກແຕ່ລະຂັ້ນ ໃນທົ່ວ ນວ ນຳໄປຈັດຕັ້ງຜັນຂະຫຍາຍເຂົ້າສູ່ວຽກງານຕົວຈິງຂອງຕົນ.
.
# ຂ່າວ – ພາບ : ຂັນທະວີ