ເພື່ອສະກັດກັ້ນ ຄວບຄຸມ ແລະ ປ້ອງກັນເຊື້ອພະຍາດໂຄວິດ-19 ບໍ່ໃຫ້ແຜ່ລະບາດໃນຊຸມຊົນອອກເປັນວົງກວ້າງ ດັ່ງນັ້ນ ໃນວັນທີ 14 ກັນຍາ 2021 ເຈົ້າແຂວງຄຳມ່ວນ ໄດ້ອອກຄຳສັ່ງເລກທີ 08/ຈຂ ວ່າດ້ວຍການສືບຕໍ່ເພີ່ມທະວີຄວາມເຂັ້ມງວດໃນການຈັດຕັ້ງປະຕິບັດມາດຕະການ ປ້ອງກັນ ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ຢູ່ແຂວງຄຳມ່ວນຕື່ມອີກ 14 (ວັນແຕ່ວັນທີ 14 ກັນຍາ ຫາວັນທີ 27 ກັນຍາ 2021) ຜ່ານການຈັດຕັ້ງປະຕິບັດຄຳສັ່ງດັ່ງກ່າວ ເຫັນວ່າ ພະນັກງານ ທະຫານ ຕຳຫຼວດ ນັກຮຽນ-ນັກສຶກສາ ຜູ້ຄ້າຂາຍ ປະຊາຊົນບັນດາເຜົ່າ ແລະ ຊາວຕ່າງປະເທດທີ່ດຳລົງຊີວິດຢູ່ແຂວງຄຳມ່ວນ ແມ່ນມີຄວາມຕື່ນຕົວສູງໃນການຈັດຕັ້ງປະຕິບັດຄຳສັ່ງເລກທີ 08/ຈຂ ໄດ້ດີພໍສົມຄວນ ເຊິ່ງສະແດງໃຫ້ເຫັນວ່າ ບັນດາຜູ້ປະກອບການຫ້າງຮ້ານຂາຍເຄື່ອງຕ່າງໆແມ່ນປິດການບໍລິການ ພໍ່ແມ່ປະຊາຊົນຢຸດຕິການເດີນທາງອອກຈາກບ້ານ ຈາກເຮືອນ ເຮັດໃຫ້ເສັ້ນທາງແຕ່ລະສາຍຂອງຕົວເມືອງທ່າແຂກບໍ່ມີຜູ້ຄົນ ບວດຍານພາຫະນະທຽວໄປມາ ບັນດາເຈົ້າໜ້າທີ່ກຳລັງ ປກສ ປກຊ ແລະ ການຈັດຕັ້ງບ້ານ ກໍໄດ້ຈັດຕັ້ງການປ້ອງກັນເວນຍາມແຕ່ລະຈຸດຢ່າງຕັ້ງໜ້າ ແລະ ເປັນເຈົ້າການ ເພື່ອຮັກສາຄວາມສະຫງົບ ແລະ ປອດໄພຂອງປະຊາຊົນ.
ທ່ານ ພັຕ ຫຼອງ ຈັນທະວົງ ເຈົ້າໜ້າທີ່ປ້ອງກັນຈຸດທີ 2 ໄດ້ກ່າວຕໍ່ສື່ມວນຊົນຂອງແຂວງວ່າ: ຂ້າພະເຈົ້າຮູ້ສຶກດີໃຈທີ່ໄດ້ເປັນສ່ວນໜຶ່ງໃນການປະກອບສ່ວນເຂົ້າໃນວຽກງານປ້ອງກັນການລະບາດຂອງພະຍາດໂຄວິດ-19 ການລົງມາປະຕິບັດໜ້າທີ່ຄັ້ງນີ້ ຂ້າພະເຈົ້າຖືກຮັບຜິດຊອບຢູ່ເຂດເທດສະບານເມືອງທ່າແຂກ ແລະ ໄດ້ແບ່ງກັນເປັນຈຸປະຈຳໃນແຕ່ລະຈຸດ ເພື່ອຕິດຕາມກວດກາການເຄື່ອນໄຫວຂອງຜູ້ຄົນ ທັງນີ້ກໍເພື່ອເຮັດໜ້າທີ່ປ້ອງກັນຄວາມສະຫງົບ ແລະ ປອດໄພຂອງປະຊາຊົນ.
ເພື່ອເປັນການຜັນຂະຫຍາຍເນື້ອໃນຄຳສັ່ງຂອງທ່ານເຈົ້າແຂວງຄຳມ່ວນເລກທີ 08/ຈຂ ພ້ອມນີ້ ຄະນະສະເພາະກິດແຂວງຄໍາມ່ວນ ຍັງໄດ້ອອກແຈ້ງການເລກທີ 06/ສພກ ລົງວັນທີ 15 ກັນຍາ 2021 ເຖິງບຸກຄົນ ນິຕິບຸກຄົນ ການຈັດຕັ້ງທຸກພາກສ່ວນທັງພາຍໃນ ແລະ ຕ່າງປະເທດທີ່ເຄື່ອນໄຫວ ແລະ ດຳລົງຊີວິດຢູ່ແຂວງຄຳມ່ວນ ເລື່ອງການຈັດຕັ້ງປະຕິບັດມາດຕະການຕໍ່ຜູ້ລະເມີດຄຳສັ່ງ ຂອງເຈົ້າແຂວງ ເລກທີ 08/ຈຂ ມີດັ່ງນີ້
- ຈອດລົດຂົນສົ່ງສິນຄ້າ ລົດໂດຍສານສ່ວນບຸກຄົນຜ່ານແຂວງ ຈອດເອົາຄົນຂຶ້ນ-ລົງ ປັບໃໝ 500.000 ກີບ
- ຄັ້ງທີສອງ 2 ລ້ານກີບ
- ກໍລະນີລະເມີດອອກຈາກເຮືອນໄປນອກ ບໍ່ໃສ່ຜ້າອັດປາກ-ດັງ ປັບໃໝ 50.000 ກີບ ພ້ອມທັງກັກພາຫະນະໄລຍະປິດເມືອງ
- ຜູ້ສໍາພັດກັບຜູ້ຕິດເຊື້ອບໍ່ກັກຕົວ ແລະ ປິດບັງທາມລາຍ ປັບໃໝ 1 ລ້ານກີບ ພ້ອມທັງດຳເນີນຄະດີຕາມກົດໝາຍ
- ກໍລະນີລະເມີດໂມງເວລາການສັນຈອນ ບໍ່ໄດ້ຮັບອະນຸຍາດຈາກການຈັດຕັ້ງ ປັບໃໝ 200.000 ກີບ ຄັ້ງທີສອງ 500.000 ກີບ ກໍລະນີຈັດງານຊຸມແຊວ ງານລ້ຽງອື່ນໆ ປັບໃໝ 100.000 ກີບ/ຄົນ ເຈົ້າຂອງສະຖານທີ່ 500.000 ກີບ
- ຄັ້ງທີສອງ 1 ລ້ານກີບ/ຄົນ ເຈົ້າຂອງສະຖານທີ່ 2 ລ້ານກີບ.
- ກໍລະນີລະເມີດຂາຍສິ່ງມຶນເມົາ ກັກຕຸນສິນຄ້າ ປັບໃໝ 1 ລ້ານກີບ/ເຮັດບົດບັນທຶກ ຄັ້ງທີສອງ 3-5 ລ້ານກີບ/ພ້ອມໂຈະການດຳເນີນທຸລະກິດ
- ກໍລະນີຫຼິ້ນໄພ້ ຕີໄກ່ການພະນັນອື່ນໆ ປັບໃໝ 2 ລ້ານກີບ/ຄົນ ເຈົ້າຂອງສະຖານທີ່ 5 ລ້ານກີບ ຄັ້ງທີສອງ 5 ລ້ານກີບ/ຄົນ ເຈົ້າຂອງສະຖານທີ່ 10 ລ້ານກີບ
- ກໍລະນີລະເມີດເປີດບໍລິການທີ່ລະບຸໄວ້ຂໍ້ທີ 11 ຂອງຄຳສັ່ງເລກທີ 08/ຈຂ ປັບໃໝ 1 ລ້ານກີບ ຄັ້ງທີສອງ 3-5 ລ້ານກີບ/ໂຈະການດຳເນີນທຸລະກິດຊົ່ວຄາວ
- ກໍລະນີລະເມີດໂມງເວລາ ເຮືອຫາປາທຽບທ່າ ແລະ ລັກລອບແຮງງານນຳເຂົ້າບໍ່ຖືກຕ້ອງ ປັບໃໝ 200.000 ກີບ/ລຳ ຄັ້ງທີສອງ 1 ລ້ານກີບ/ຍຶດເຮືອຜູ້ກ່ຽວຕະຫຼອດໄລຍະປິດເມືອງ.
ແນວໃດກໍຕາມ ໃຫ້ປະຊາຊົນທຸກຊັ້ນຄົນເປັນເຈົ້າການຕິດຕາມ ໃນກໍລະນີພົບເຫັນຕໍ່ຜູ້ລະເມີດຄຳສັ່ງດັ່ງກ່າວ ໃຫ້ລາຍງານຕໍ່ຄະນະສະເພາະກິດແຂວງໄດ້ທີ່ເບີໂທ: ທ່ານ ບຸນໂຮມ ມຸກດາສັກ 020 5585 9996 ທ່ານ ພັທ ຄໍາຮຸ່ງ ອາລຸນສັກ 020 9951 4229 ແລະ ທ່ານ ສີຫງວນ ອິນທິລາດ 020 5522 3315.
# ຂ່າວ – ພາບ ສີພອນ ຈັນທະດາລາ