ວັນທີ 10 ກັນຍາ 2021 ກົມເຕັກໂນໂລຊີການສື່ສານຂໍ້ມູນຂ່າວສານ ກະຊວງເຕັກໂນໂລຊີ ແລະ ການສື່ສານ ໄດ້ຈັດງານແຂ່ງຂັນລາວໄອຊີທີ ປະຈໍາປີ 2021 (Lao ICT Award 2021) ຂຶ້ນທີ່ສະຖາບັນເຕັກໂນໂລຊີການສື່ສານຂໍ້ມູນມູນຂ່າວສານ ນະຄອນຫຼວງວຽງຈັນ ມີທ່ານ ສັນຕິສຸກ ສິມມະລາວົງ ຮອງລັດຖະມົນຕີກະຊວງເຕັກໂນໂລຊີ ແລະ ການສື່ສານ ທ່ານ ພູທອງ ສີສະຫວັດ ຮັກສາການຫົວໜ້າກົມເຕັກໂນໂລຊີການສື່ສານຂໍ້ມູນຂ່າວສານ ບັນດາຜູ້ຕາງໜ້າກົມ ບໍລິສັດ ທະນາຄານ ຫົວໜ່ວຍທຸລະກິດ ຄະນະກຳມະການ ແລະ ສະຖາບັນການສຶກສາເຂົ້າຮ່ວມ.
ງານແຂ່ງຂັນລາວໄອຊີທີຄັ້ງນີ້ ເປັນຄັ້ງທີ 4 ເຊິ່ງເລີ່ມຈັດມາແຕ່ປີ 2017 ເປັນຕົ້ນມາ (ຍົກເວັ້ນປີ 2020) ແຕ່ຄັ້ງນີ້ຈະແຕກຕ່າງຈາກທຸກປີທີ່ຜ່ານມາ ເນື່ອງຈາກການລະບາດຂອງພະຍາດໂຄວິດ-19 ແລະ ເພື່ອເປັນການປະຕິບັດມາດຕາການຂອງຄະນະສະ ເພາະກິດໃນການຄວບຄຸມການແຜ່ລະບາດຂອງພະຍາດ ທາງຄະນະຮັບຜິດຊອບຈັດງານຈຶ່ງໄດ້ມີມາດຕະການຈໍາກັດຜູ້ເຂົ້າຊົມງານ ສະນັ້ນ ຈຶ່ງໄດ້ຫັນການຈັດງານມາເປັນຮູບແບບການຖ່າຍທອດສົດຜ່ານສື່ສັງຄົມອອນລາຍ ເພື່ອໃຫ້ຜູ້ທີ່ສົນໃຈສາມາດຮັບຊົມງານແຂ່ງຂັນຄັ້ງນີ້ໄດ້ຢ່າງສະດວກ.
ງານແຂ່ງຂັນໄອຊີທີລາວ 2021 ມີຫຼາຍກວ່າ 20 ຜະລິດຕະພັນຖືກສົ່ງເຂົ້າຮ່ວມແຂ່ງຂັນ ແລະ ຜ່ານການຄັດເລືອກເຂົ້າມາຮອບສຸດທ້າຍ 13 ຜະລິດຕະພັນ ຈາກ 10 ບໍລິສັດ ໂດຍແບ່ງອອກເປັນ 6 ໝວດຄື: ໝວດພາກລັດ ໝວດພາກເອກະຊົນ ໝວດເພື່ອສັງຄົມ ໝວດເນື້ອໃນດີຈິຕອນ ໝວດບໍລິສັດສ້າງຕັ້ງໃໝ່ດ້ານໄອຊີທີ ແລະ ໝວດຄົ້ນຄ້ວາ ແລະ ພັດທະນາດ້ານໄອຊີທີ.
ຜ່ານການແຂ່ງຂັນ ອັນດັບທີ 1 ທີມ Lailao CF ລະບົບ SME ຂ່າວເຄື່ອງອອນລາຍຜ່ານເຟສບຸກ ຈາກບໍລິສັດ ລາຍລາວຄລັບ ໄດ້ຮັບໂລ້ລາງວັນ ພ້ອມເງິນ 5 ລ້ານກີບ ໃບຍ້ອງຍໍຈາກກະຊວງ ແລະ ເຄື່ອງທີ່ລະລຶກຈາກບັນດາບໍລິສັດທີ່ໃຫ້ການສະໜັບສະໜູນ ອັນດັບທີ 2 ທີມບັນຊີ .la ຈາກບໍລິສັດ ຫ້າສິບເຈັດໄບ້ສ ຈຳກັດຜູ້ດຽວ ໄດ້ຮັບໂລ້ລາງວັນ ພ້ອມເງິນ 3 ລ້ານກີບ ໃບຊົມເຊີຍຈາກກະຊວງ ແລະ ເຄື່ອງທີ່ລະລຶກ ອັນດັບທີ 3 ທີມລະບົບຂໍ້ມູນຊ່ວຍເຫຼືອປະຊາຊົນພາຍຫຼັງໄດ້ຮັບວັກຊີນ ຈາກບໍລິສັດ ດິຈີຕອນບິຊີເນັສ ຈຳກັດຜູ້ດຽວ ໄດ້ຮັບໂລ້ລາງວັນ ພ້ອມເງິນ 2 ລ້ານກີບ ແລະ ເຄື່ອງທີ່ລະລຶກ ນອກນີ້ຍັ ງມີລາງວັນຊົມເຊີຍ 2 ລາງວັນ ລາງວັນລະ 1 ລ້ານກີບ ພ້ອມຂອງທີ່ລະລຶກ ມີທີມ LaoApp Mocha ຈາກບໍລິສັດ ສະຕາໂທລະຄົມ ຈຳກັດ ແລະ ທີມ LAO SUSU ຈາກບໍລິສັດ Sblab 856 ຈຳກັດ.
ນອກນັ້ນ ຍັງມີເຄື່ອງທີ່ລະລຶກສໍາລັບຜູ້ເຂົ້າແຂ່ງຂັນທັງໝົດ ສ່ວນຜະລິດຕະພັນດີເດັ່ນໃນການແຂ່ງຂັນຄັ້ງນີ້ ຈະໄດ້ຮັບບູລິມະສິດເປັນຕົວແທນຂອງປະເທດໃນການເຂົ້າແຂ່ງຂັນຜະລິດຕະພັນໄອຊີທີລະດັບອາຊຽນ (ASEAN ICT Award 2021) ທີ່ຈະຈັດຂຶ້ນເດືອນທັນວາ 2021 ທີ່ປະເທດມຽນມາຕື່ມອີກ.
# ຂ່າວ & ພາບ : ສົມສະຫວັນ